Ոտքի բութ մատի ծռում (բունիոն)

2 րոպե

Սա ոտքի առաջին (մեծ) մատը ոտնաթաթին միացնող գլխավոր հոդի ախտահարում է, որը նույն մատը ծռում-թեքում է դեպի ներս՝ դեպի ոտքի մյուս մատները:

Այս վիճակը կարող է առաջացնել հոդի կարմրություն և ցավոտություն, թեև այլ դեպքերում որևէ անհանգստություն կարող է չառաջացնել:

Ի՞նչ է ոտքի առաջին մատի վալգուսային դեֆորմացիան

Լատիներենից վալգուսը թարգմանվում է որպես կորացում: Սա մի վիճակ է, երբ ոտքի բթամատը ծռվում է դեպի ներս:

Այս վիճակը զարգանում է դանդաղորեն, և բազմաթիվ մարդիկ կարող են նկատել այն՝ առանց որևէ այլ խնդիր նշելու: Սակայն, որոշ մարդկանց մոտ՝

• բթամատի ծռվածությունը կարող է բերել ոտնաթաթի ձևափոխության
• բթամատը ոտնաթաթին միացնող հոդը ծածկող մաշկը կարող է կարմրել, բորբոքվել կամ առաջացնել կոշտուկ (мозоль)
• կարող է դժվարանալ կոշիկ հագնելը կամ քայլելը, ինչպես նաև առաջացնել ցավեր:

Որպես բարդություն՝ կարող է առաջանալ բուրսիտ (ձուսպապարկի բորբոքում) կամ արթրիտ (հոդաբորբ):

Որոշ մարդկանց մոտ կարող է առաջանալ ոտքի ճկույթ մատի ավելի փոքր բունիոն, որը հայտնի է որպես բունիոնետ:

Պատճառներ

Ոտնաթաթի առաջին մատի վալգուսային դեֆորմացիան կարող է ընթանալ ընտանիքներում, երբ ծնողներից ժառանգվում է ոտնաթաթի թույլ կամ արատավոր կառուցվածք:

Այս վիճակը կարող է պատճառվել նաև հետևյալ հիվանդություններից կամ վիճակներից՝

• որոշ վիճակներ, ինչպիսիք են ռևմատոիդ արթրիտը կամ գլխուղեղային լուծանքը (պարալիչ)
• հիվանդություններ, ինչպիսին է պոլիոմիելիտ
• ոտնաթաթի վնասվածքներ:

Խիստ նեղ կամ բարձրակրունկ կոշիկներ հագնելը կարող է այս վիճակի նկատմամբ հակում ունեցող մարդկանց մոտ բերել բթամատի դեֆորմացիայի: Որպես պատճառ, կոշիկների հետ կապված գործոնը դեռ քննարկվում է, սակայն այն, որ կոշիկի որոշ ձևեր կարող են վատթարացնել առկա վիճակը, կասկածից վեր է:

Ախտորոշումը

Ոտնաթաթի առաջին մատի վալգուսային դեֆորմացիան ախտորոշվում է ֆիզիկական զննմամբ (բուժզննում) և ռենտգենով: Անհրաժեշտության դեպքում ձեր բժիշկը կարող է ձեզ ուղեգրել օրթոպեդ-վիրաբույժի կամ այլ մասնագետի խորհրդատվության:

Բուժումը

Առաջին հերթին, պետք է հագնել հարմարավետ, ավելի թույլ (չսեղմող) և լայն ներբանով կոշիկներ, որը ոտնաթաթին տալիս է բավարար տարածք: Հնարավորության դեպքում քայլեք ոտաբոբիկ կամ ազատ սանդալով: Հաճախ սա թեթևացնում է անհարմարավետության զգացումը և դադարեցնում դեֆորմացիայի խորացումը:

Ցավերը և անհարմարավետությունը մեղացնող այլ միջոցներից են՝

• հատուկ հոդային սպեղանիների օգտագործում
• օրթոտիկ (կոշիկի ներդիրներ) կամ օրթոպեդիկ կոշիկների օգտագործում
• ցավերի և բորբոքման դեպքում բժշկի նշանակմամբ որոշ հակաբորբոքային դեղերի ընդունում, ինչպիսին է Իբուպրոֆենը (Մոտրին IB և այլն)
• կորտիզոնի ներհոդային ներարկումներ
• սառը կամ տաք միջոցառումներ:

Եթե այս միջոցները չեն օգնում, իսկ ձեր ոտնաթաթը խիստ ձևափոխվում է կամ պատճառում մշտական ցավեր, ձեր բժիշկը կարող է առաջարկել օրթոպեդիկ վիրահատություն:

Կանխարգելումը

Հոգ տարեք ձեր և ձեր երեխաների ոտնաթաթի մասին: Միշտ ընտրեք հարմարավետ լայն կոշիկներ, որոնք համընկնում են ձեր ոտնաթաթի չափսերին և չեն սեղմում ձեր մատները: