Ոտնաթաթերում այրոց -

Ոտնաթաթերում այրոցի զգացողությունը, երբ կարծես դրանք ցավալու աստիճան տաքացել են, կարող է լինել թեթև կամ ծանր:

Որոշ դեպքերում ոտնաթաթերի այրոցը կարող է լինել այն աստիճան ուժեղ, որ խանգարի ձեր քունը:

Սովորաբար տհաճություն կամ անհանգստություն պատճառող այրոցի զգացողությունը տեղակայվում է ծնկներից ներքև՝ ներառելով սրունքները և ոտնաթաթերը: Ավելի հաճախ այրոցն ուղեկցվում է այլ գանգատներով՝ ծակծկոցներ (պարէսթեզիա) կամ թմրածություն: Ուստի ոտնաթաթերի այրոցը հաճախ դիտարկվում է ծակծկոցների կամ պարեսթեզիայի համատեքստում:

Պատճառներ

Եթե հոգնածությունը, օրինակ՝ երկար ժամանակ կանգնած վիճակում մնալիս կամ մաշկային վարակներն առաջացնում են ոտնաթաթերում ժամանակավոր այրոցի զգացում կամ բորբոքում, ոտնաթաթերի այրոցը հիմնականում նյարդային ախտահարման՝ ծայրամասային (պերիֆերիկ) նեյրոպաթիայի ախտանիշներից մեկն է: Նեյրոպաթիան ունի բազմաթիվ տարբեր պատճառներ, այդ թվում՝ շաքարային դիաբետ (դիաբետիկ նեյրոպաթիա), ալկոհոլի չարաշահում (քրոնիկ ալկոհոլիզմ), որոշ թույների ներգործություն, B վիտամիններից որոշների պակաս (դեֆիցիտ) կամ ՄԻԱՎ վարակ:

Իմացե՛ք ավելին նեյրոպաթիայի մասին:

Ոտնաթաթերի այրոցի այլ պատճառներից են՝

• «մարզիկի ոտնաթաթ»
• Չարոտ-Մարի-Թութի հիվանդություն՝ վերին և ստորին վերջույթների նյարդերի ախտահարմամբ ժառանգական խանգարումների խումբ
• քիմիոթերապիա
• քրոնիկ երիկամային հիվանդություն
• համալիր ռեգիոնալ ցավի համախտանիշ, որը նյարդային համակարգի գործունեության խանգարմամբ պայմանավորված քրոնիկ ցավ է
• վահանաձև գեղձի թերգործունեություն (հիպոթիրեոզ)
• կոնքային թունելի համախտանիշ
• վիտամին-դեֆիցիտային սակավարյունություն (անեմիա):

Ե՞րբ հանդիպել բժշկին

Դիմեք անհետաձգելի օգնության, եթե՝

• ոտնաթաթերի այրոցի զգացումը սկսվել է հանկարածի, հատկապես, եթե ենթարկվել եք որևէ թույնի ազդեցությանը
• ոտնաթաթի վրա առկա է բաց վարակված վերք, հատկապես, եթե ունեք շաքարային դիաբետ:

Այցելեք ձեր բժշկին, եթե՝

• մի քանի օրյա ինքնախնամքի կամ բուժման պայմաններում ձեր գանգատները շարունակվում են
• նշում եք, որ ոտնաթաթերի այրոցը դարձել է ավելի սաստիկ ու ցավոտ
• նշում եք, որ այրոցի զգացողությունը սկսել է տարածվել ողջ ստորին վերջույթով
• նշում եք, որ ոտնաթաթի կամ մատների զգացողությունը խիստ թուլացել կամ անհետացել է:

Եթե ոտքերում այրոցը կայուն է կամ առաջացել է առանց որևէ տեսանելի պատճառի, ձեր բժիշկը կարող է նշանակել որոշ հետազոտություններ՝ հայտնաբերելու ձեր գանգատի բուն պատճառը: