Դիաբետի սքրինինգ - Լաբորատոր թեստեր

Դիաբետը հիվանդությունների խումբ է, որոնց դեպքում մարդու օրգանիզմն ի վիճակի չի լինում պահպանելու արյան մեջ շաքարի առողջ մակարդակներ:

Արդյունքում, արյան մեջ շաքարի նորմալից բարձր մակարդակները (կոչվում է հիպերգլիկեմիա) ժամանակի ընթացքում առաջացնում են ամենատարբեր առողջական խնդիրներ:

Ինչ-որ մեկը կարող է ունենալ դիաբետ՝ առանց որևէ գանգատ զգալու: Ձեր բժիշկը կարող է առաջարկել որոշ լաբորատոր թեստեր, եթե կարծում է, որ ձեզ մոտ առկա է դիաբետի զարգացման ռիսկ:

Ո՞ւնեմ ես արդյոք դիաբետի ռիսկ

Դիաբետի զարգացման ձեր անհատական ռիսկերի մասին կարող եք հարցնել ձեր բժշկից: Դուք ինքներդ կարող եք որոշակի պատկերացում կազմել 2-րդ տիպի դիաբետի ռիսկի մասին` պատասխանելով մի շարք պարզ հարցերի: Ձեզ մոտ 2-րդ տիպի դիաբետի ռիսկը կարող է բարձրացած լինել, եթե դուք՝

• 55 տարեկանից մեծ եք
• 45 տարեկանից մեծ եք և ունեք ավելորդ քաշ կամ բարձր արյան ճնշում (հիպերտենզիա)
• ունեք 2-րդ տիպի դիաբետով ընտանիքի անդամ
• ֆիզիկապես ակտիվ չեք
• ծխող եք
• սննդակարգում քիչ եք ներառում բանջարեղեններ ու մրգեր։

Ո՞վ պետք է անցնի դիաբետի թեստեր

Բժիշկները սովորաբար մարդկանց առաջարկում են դիաբետի թեստեր, եթե նրանց մոտ առկա է 2-րդ տիպի դիաբետի զարգացման բարձր ռիսկ:

Դիաբետի զարգացման ռիսկը նաև բարձրանում է, եթե դուք՝

• ունեցել եք սրտամկանի ինֆարկտ կամ ինսուլտ
• կին եք և հղիության ընթացքում ունեցել եք գեստացիոն («հղիների») դիաբետ
• կին եք և ունեք ձվարանի պոլիկիստոզային համախտանիշ
• ընդունում եք փսիխոզի բուժման դեղեր:

Դուք պետք է առնվազն տարին մեկ անգամ անցնել դիաբետի հետազոտություններ, եթե ունեք նախադիաբետ:

Ի՞նչ է ներառում դիաբետի հետազոտությունը

Դիաբետը սովորաբար հետազոտվում է արյան շաքարի թեստով (կոչվում է գլյուկոմետրիա): Այս թեստի առավել ճշգրիտ արդյունք ստացվում է երակային արյան նմուշառմամբ:

Կան նաև դիաբետի վաղ հայտնաբերման արյան այլ թեստր ևս՝ ինչպես քաղցած վիճակում, այնպես էլ շաքարով «ծանրաբեռնվածության» (տոլերանտության) թեստեր: Երկրորդ դեպքում մի քանի ժամվա ընթացքում ձեզնից մի քանի անգամ նմուշառվում է արյուն՝ նախ քաղցած վիճակում, որից հետո քաղցրահամ հեղուկ ընդունելուց 2 ժամ անց:

Այսօր մեծ հանրաճանաչություն է ստացել նաև գլիկոզիլացված հեմոգլոբինի թեստը:

Ի՞նչ անել ստուգվելուց հետո

Անպայման կապ հաստատեք ձեր բժշկի հետ և քննարկեք ձեր թեստի արդյունքները: Հետագա քայլերը կախված են թեստի արդյունքներից և ձեզ մոտ դիաբետի զարգացման ռիսկի աստիճանից: