Դիալիզ - Բուժումներ

Երիկամները գործում են որպես օրգանիզմի զտիչ՝ արյունը մաքրելով նյութափոխանակության մնացորդային նյութերից և դրանք օրգանիզմից հեռացնելով մեզի միջոցով:

Երբ ձեր երիկամները նորմալ չեն գործում, ձեր օրգանիզմի թափոնային կամ վնասակար նյութերը չեն զտվում երիկամներում, այլ մնում և կուտակվում են ձեր արյան մեջ: Դիալիզը կարող է օգնել վատ աշխատող երիկամներին՝ դրանց փոխարեն կատարելով արյան քամազատումը:

Ի՞նչ է դիալիզը

Դիալիզն արյունն արհեստականորեն զտելու մեթոդ է, որին դիմում են, երբ երիկամները չեն կարողանում կամ չեն հասցնում բնական ճանապահով արյունը քամազատել նյութափոխանակության թունավոր արգասիքներից կամ թափոնային նյութերից:

Կան դիալիզի երկու հիմնական տեսակներ՝

• հեմոդիալիզ, երբ ձեր արյունը զտվում է ձեր մարմնից դուրս հատուկ սարքի՝ դիալիզի օգնությամբ
• պերիտոնեալ դիալիզ, երբ արյունը մաքրվում է ձեր օրգանիզմի ներսում՝որպես զտիչ օգտագործելով ձեր որովայնի խոռոչի օրգանները ծածկող թաղանթը՝ որովայնամիզը:

Ե՞րբ է դիալիզի անհրաժեշտությունը ծագում

Դիալիզը սովորաբար նշանակվում է երիկամային անբավարարության բուժման մեջ:

Երիկամային անբավարարությունը երբեմն կարող է զարգանալ հարաբերականորեն կարճ ժամանակի ընթացքում (օրեր կամ շաբաթներ): Նման իրավիճակի պատճառ կարող են դառնալ ծանր հիվանդությունները, վնասվածքները կամ թունավորումները: Սա կոչվում է սուր երիկամային անբավարարություն և կարող է պահանջել մեկ կամ մի քանի օր տևող դիալիզ:

Ավելի հաճախ երիկամային անբավարարությունը դրսևորվում է որպես քրոնիկ երիկամային հիվանդության վերջնական փուլ, երբ երիկամների գործունեությունը կրճատվում է 90%-ով կամ ավելի շատ: Նման դեպքերում դիալիզը շարունակվում է մարդու ողջ կյանքի ընթացքում:

Ինչպե՞ս է դրսևորվում դիալիզի բուժական ազդեցությունը

Հեմոդիալիզ

Հեմոդիալիզի ժամանակ ձեր արյունն անոթային հատուկ խողովակների՝ կաթետերների միջոցով դուրս է հանվում օրգանիզմից, մաքրվում է հատուկ սարքերի՝ դիալիզի ապարատի միջոցով, որոնք պարունակում են հատուկ զտիչներ (ֆիլտրներ) և նորից վերադարձվում անոթային համակարգ:

Պերիտոնեալ դիալիզ

Պերիտոնեալ դիալիզի ժամանակ որովայնամզի խոռոչ ներմուծվում և հեռացվում են ստերիլ հեղուկներ, որոնք, անցնելով այս խոռոչով, մաքրում են որովայնամզով զտված նյութերը: Այն կարող է իրականացվել մանուալ կամ ավտոմատ՝ հատուկ սարքի միջոցով:

Դիալիզի արդյունքները

Դիալիզը զուտ հիվանդի կյանքը երկարացնող միջամտություն չէ: Այն թույլ է տալիս բարձրացնել քրոնիկ երիկամային հիվանդություններով մարդկանց կյանքի որակը: Մասնավորապես, բարձորակ և ճիշտ վերահսկվող դիալիզը թույլ է տալիս, որ նման մարդիկ շարունակեն իրենց՝

• աշխատանքը
• ֆիզիկապես ակտիվ կյանքը
• առողջ սննդակարգը
• հանրային ակտիվությունը
• ինտիմ հարաբերությունները
• կարճատև շրջագայությունները: