Հիպոթերմիա - Առաջին օգնություն

​Հիպոթերմիան տեղի է ունենում, երբ ձեր մարմինը ջերմությունը կորցնում է ավելի արագ, քան կարող է արտադրել, և ձեր մարմնի ջերմաստիճանն ընկնում է 35°​ C և ավելի ցածր:​

Եթե մարմնի ջերմաստիճանի կտրուկ նվազեցումը մնա ուշադրությունից դուրս, կարող է հանգեցնել նույնիսկ կյանքին սպառնացող հետևանքների:

Հիպոթերմիան հաճախ զարգանում է ցուրտ եղանակային պայմանների ազդեցությամբ կամ սառը ջրի մեջ մնալուց: Այն կարող է նաև պատճառվել օդի 10° C պայմաններում դրսում երկար ժամանակ անցկացնելուց: Հիպոթերմիայի ռիսկն աճում է, եթե դուք հոգնած, քաղցած կամ ջրազրկված եք:

Հիպոթերմիայի ախտանիշները սովորաբար զարգանում են աստիճանաբար և կարող են ներառել՝

• դող և սարսուռ, որը կարող է դադարել, եթե մարմնի ջերմությունը կտրուկ ընկնում է
• աղավաղված և անհասկանալի խոսք
• դանդաղած և մակերեսային շնչառություն
• թույլ անոթազարկ (պուլս) և սրտազարկի դանդաղում (բրադիկարդիա)
• շարժումների սլացիկության կորուստ կամ կորդինացիայի խանգարում
• քնկոտություն կամ խիստ թուլություն
• շփոթվածություն կամ հիշողության կորուստ
• գիտակցության կորուստ
• բաց կարմիր և սառը մաշկ (նորածինների մոտ):

Իմացե՛ք ավելին հիպոթերմիայի մասին:

Շտապ դիմեք բժշկական օգնության

Եթե կասկածում եք, որ ինչ-որ մեկն ունի հիպոթերմիա, անհապաղ զանգեք 1-03 և կանչեք շտապ օգնություն:

Այնուհետև ձեռնարկեք այս քայլերը:

• Զգուշորեն տուժողին հանեք ցուրտ կամ սառը միջավայրից: Եթե որևէ փակ տարածք գտնելն անհնար է, ապա պաշտպանեք նրան քամուց, հատկապես գլխի և պարանոցի շրջանները: Հեռացրեք կամ մեկուսացրեք տուժողին սառը գետնից կամ հողից:
• Զգուշորեն հանեք նրա թաց շորերը: Փոխարինեք թաց հագուստը տաք, չոր բաճկոնով կամ վերմակով:
• Եթե անհրաժեշտ է տուժողին տաքացնել, արեք դա աստիճանաբար: Օրինակ, փորձեք տաքացնող միջոցներ (ոչ շատ տաք ջեռակ) պարանոցի, կրծքավանդակի և աճուկների շրջանում: Եթե օգտագործում եք տաք ջրով շշեր, նախ փաթաթեք դրանք բարակ սրբիչով, որպեսզի պատահաբար այրվածքներ չպատճառեք:
• Առաջարկեք տուժողին տաք (բայց ոչ՝ խիստ տաք) և քաղցր ոչ ալկոհոլային ըմպելիքներ:
• Եթե տուժողը կենդանության որևէ նշան ցույց չի տալիս, մի ենթադրեք, որ նա մահացած է։ Սկսեք իրականացնել սիրտ-թոքային վերակենդանացման միջոցառումներ։

Ուշադրություն

• Մի՛ փորձեք տաքացնել տուժողին խիստ արագորեն, օրինակ՝ տաքացնող լամպով կամ տաք լոգանքով:
• Մի՛ փորձեք տաքացնել նրա ձեռքերը և ոտքերը: Նման վիճակում վերջույթների տաքացումը կամ մերսումը կարող են լրացուցիչ լարվածություն ստեղծել սրտի և թոքերի գործունեության համար:
• Մի՛ փորձեք նրան տալ ալկոհոլ կամ ծխախոտ: Ալկոհոլը քողարկում է վերատաքացման գործընթացը, իսկ ծխախոտային ապրանքները վատթարացում են վերատաքացման համար անհրաժեշտ արյան շրջանառությունը: