Նկարագիր - Գլխացավ

Որպես կանոն, գլխացավը ներառում է գլխի, դեմքի և պարանոցի շրջանի ցավերը։

Գլխացավերի մեծ մասը լուրջ պատճառ չունի և առանց բուժման ինքնուրույն վերանում է։ Այսպիսի գլխացավ ունեցել է մեզնից յուրաքանչյուրը։

Սակայն, կան գլխացավի տեսակներ, երբ անհրաժեշտություն է առաջանում դիմել բժշկի, օրինակ՝

• դուք ունեք սոսկալի «կուրացնող» գլխացավ, որը հանկարծակի հայտնվում և աստիճանաբար սաստկանում է
• գլխացավի պատճառը գլխի տրավման է
• գլխացավն ի հայտ է եկել հանկարծակի՝ հազալուց, ծիծաղելուց, փռշտաալուց կամ գլուխը շարժելուց հետո
• գլխացավն ուղեկցվում է այլ նշաններով՝ սվաղված խոսք, շշմածություն, թուլություն, քնկոտություն, հիշողութան կորուստ (ամնեզիա) կամ քայլելու հետ կապված դժվարություններ
• առկա է նաև բարձր ջերմություն, պարանոցի մկանների ձգվածություն, մաշկի ցանավորում, տեսողության խնդիրներ, սուր ցավեր աչքերում։

Տարբերում են գլխացավերի երկու հիմնական տեսակներ՝

• առաջնային, որոնք հանդես են գալիս ինքնուրույն և կապված չեն մեկ այլ հիվանդության կամ տրավմայի հետ
• երկրորդային, որոց պատճառն այլ հիվանդություն է և առաջանում են որպես դրա ախտանիշներից մեկը։

Առաջնային գլխացավեր

Սրանք ամենահաճախ հանդիպող գլխացավերն են։ Առաջնային գլխացավերի ամենահայտնի օրինակներն են լարվածության գլխացավերը, միգրենը և փնջային (կլաստերային) գլխացավերը։

Առաջնային գլխացավերի պատճառները ներառում են՝

• սթրես
• աչքերի լարվածություն կամ շլություն
• ողնաշարի շեղումներ կամ ծռվածութուններ
• ջրազրկում
• մեծ քանակով ալկոհոլի օգտագործում
• վատ քուն
• հերթական կերակրի բաց թողում։

Որոշ դեպքերում գլխացավերի պատճառը ակնհայտ չէ և դժվար է որոշվում։

Երկրորդային գլխացավեր

Երկրորդային գլխացավերեն ունեն հստակ պատճառ կամ հիվանդություն։ Օրինակ՝ գլխի տրավմաներ և ուղեղի ցնցում, գլխուղեղի անոթային և ոչ անոթային հիվանդություններ, վարակներ և այլն։

Կանանց մոտ գլխացավի պատճառ կարող են դառնալ հորմոնային տեղաշարժերը, և որոշ կանայք կարող են նշել իրենց գլխացավերի և դաշտանի միջև առկա հստակ կապ։ Հորմոնային խանգարումները, դաշտանադադարը և հղիությունն իրենց հերթին կարող են զուգակցվել գլխացավերով։

Որոշ դեպքերում գլխացավը կարող է ի հայտ գալ որպես օգտագործված դեղի կողմնակի ազդեցություն։ Այլ դեպքերում գլխացավը կարող է ուղեկցել տարբեր հիվանդություններին և ինքնազգացողության վատթարացմանը, օրինակ, երբ մրսում ենք, հիվանդանում ենք սինուսիտով, գրիպով կամ ունենում ենք ալերգիկ ռեակցիա։

Կան բազմաթիվ հիվանդություններ, որոնք կարող են գլխացավերի պատճառ դառնալ։ Դիմեք բժշկին, եթե ձեր գլխացավը սովորականից ավելի ուժեղ է, սովորական ցավազրկողներով չի մեղմանում, բերում է քնի խանգարման և ազդում է ձեր առօրյա գործերի վրա։

Ջրազրկում

Օրգանիզմում հեղուկների պակասն իր հերթին հաճախ դառնում է գլխացավերի պատճառ։ Ջրազրկման պատճառներից են՝

• փսխումով կամ փորլուծությամբ ուղեկցվող հիվանդություններ
• ուժեղ ֆիզիկական ակտիվություն
• առատ քրտնարտադրություն
• ալկոհոլի չարաշահում
• կոֆեին պարունակող և միզամուղ ազդեցությամբ օժտված ըմպելիքների մեծ քանակների օգտագործում (սուրճ, թեյ կամ կոլա)
• շոգ եղանակին կամ բարձր ջերմաստիճանային պայմաններում աշխատելը։

Նման իրավիճակներում վերացրեք ջրազրկման պատճառը և գլխացավն ինքնուրույն կմեղմանա։

Իմացե՛ք ավելին, թե ինչպես տանը օգնեք գլխացավերի մեղմացմանը: