Գլխացավերը հղիության ընթացքում

Կանանց մոտ գլխացավերը հաճախ կարող են կապված լինել հղիության ընթացքում հորմոնային փոփոխությունների հետ:

Ապագա մայրերը կարող են նշել գլխացավերի հաճախականության ավելացում կամ նվազում: Ձեր հղիության ուշ փուլերում անբացատրելի և հաճախ անհանգստացող գլխացավերը կարող են կապված լինել մեկ այլ լուրջ վիճակի՝ պրեէկլամպսիայի հետ: Ուստի, եթե ձեզ մոտ հղիության երրորդ եռամսյակում (տրիմեստր) ի հայտ են գալիս գլխացավեր, անպայման այցելեք ձեր բժշկին:

Հղիության ընթացքում գլխացավի պատճառները

Բազմաթիվ կանայք հղիության ընթացքում, հատկապես առաջին և երրորդ եռամսյակներում նշում են գլխացավեր: Եթե դուք հղի եք, կարող եք նշել գլխացավերի հաճախացում հղիության մոտ 9-րդ շաբաթականից սկսած։

Հորմոնային փոփոխություններից բացի, հղիության վաղ փուլերում ի հայտ եկած գլխացավերը կարող են հանդիսանալ հղիության վաղ նշաններից մեկը, որի հիմքում ընկած է ձեր օրգանիզմի կողմից արտադրվող արյան ծավալի մեծացումը:

Հղիության ընթացքում գլխացավերի այլ պատճառներից կարող են լինել՝

• անբավարար քուն
• սուրճի, թեյի կամ կոֆեին պարունակող ըմպելիքներից կտրուկ հրաժարում (կոֆեինից զրկանք)
• ցածր արյան շաքար (հիպոգլիկեմիա)
• ջրազրկում (դեհիդրատացիա)
• սթրեսի զգացում
• կեցվածքի կամ մարմնակառուցվածքի շեղում, հատկապես հղիության ուշ փուլերում
• դեպրեսիայի կամ տագնապի առկայություն:

Միգրեն

Միգրենը գլխացավի առանձնահատուկ տեսակ է, որը սովորաբար ի հայտ է գալիս գլխի մի կեսում: Գլխացավի ուժգնությունը կարող է լինել չափավորից մինչև անտանելի սասատիկ: Միգրենով մարդիկ նշում են նաև սրտխառնոց կամ փսխումներ, ինչպես նաև լույսի և ձայնի նկատմամբ գերզգայունություն:

Հղիության պայմաններում միգրենը կարող է առաջին մի քանի ամիսներին սաստկանալ, սակայն ավելի ուշ շրջաններում բազմաթիվ կանանց մոտ գանգատները մեղմանում են, որը կապում են էստրոգեն հորմոնի մակարդակի կայունացման հետ: Այլ կանայք կարող են միգրենի ընթացքի մեջ որևէ փոփոխություն չնշել: Որոշ կանանց մոտ տարբեր հղիությունների ժամանակ միգրենի ընթացքը կարող է լինել տարբեր:

Բուժում

Միգրենով հղի կանանց խորհուրդ չի տրվում օգտագործել միգրենի դեղեր: Գլխացավի մյուս տեսակների դեպքում նաև ցանկալի է, որ հղի կանայք հնարավորինս խուսափեն դեղեր ընդունելուց և փորձեն գանգատները մեղմացնել այլ՝ ոչ դեղորայքային մեթոդներով:

Օրինակ, դուք կարող եք՝

• կարգավորել ձեր քունը, ավելի շատ հանգստանալ կամ «թուլանալ» (ռելաքսացիա)
• փորձել յոգա կամ այլ վարժանքներ
• հատկապես հղիության ուշ շրջաններում սովորել իրանի ճիշտ կեցվածք պահելու հմտություններ
• սնվել կանոնավոր կերպով և սննդակարգը դարձնել առողջ
• եթե առկա է հարքթային ծոցերից պատճառված ցավեր (սինուսային գլխացավեր), ապա փորձել աչքերի և քթի շրջանի տաք միջոցներ (տաք սրբիչ)
• եթե առա է լարվածության գլխացավ, ապա փորձել պարանոցի հետին մասի սառը միջոցներ (սառցպարկ)
• պարանոցի և ուսերի մերսում:

Միգրեն ունեցող հղի կանայք նաև կարող են խուսափել այնպիսի գործոններից, որոնք նպաստում են գանգատների ի հայտ գալուն կամ ուժգնացմանը: Միգրենի գլխացավերի առաջացման այդպիսի նպաստող գործոններից են՝

• շոկոլադ
• յոգուրտ
• գետնանուշ (արախիս)
• հաց
• թթվասեր
• պահածոյացված միս
• հնեցված պանիր
• գլուտամատի մոնոսոդիում (MSG)
• կոֆեին (զրկանք)
• ուժեղ կամ առկայծող (թարթող) լույսեր
• սուր հոտեր
• ուժեղ ձայներ կամ աղմուկ
• համակարգչի կամ կինոէկրան
• ֆիզիկական ծանրաբեռնվածություն
• հուզական գործոններ, օրինակ՝ վիճաբանություն կամ սթրես:

Եթե դուք միգրենի կամ գլխացավի դեմ ստանում եք որևէ դեղ, ապա քննարկեք ձեր նշանակումները բժշկի հետ: Պարացետամոլը՝ կոդեինով կամ առանց դրա, ընդհանուր առմամբ, համարվում է հղի կանանց համար անվտանգ դեղ, սակայն դուք պետք է խուսափեք այլ ցավազրկողներից, ինչպիսիք են Ասպիրինը կամ Իբուպրոֆենը:

Ե՞րբ դիմել բժշկին

Եթե ձեզ մոտ առկա են հաճախակի գլխացավեր, որոնք Պարացետամոլով չեն անհետանում, չի բացառվում, որ այդ գանգատը կարող է լինել ավելի լուրջ առողջական խնդրի՝ պրեէկլամպսիայի նշաններից մեկը: Այս վիճակը սովորաբար ընթանում է արյան ճնշման բարձրացմամբ և երիկամների գործունեության խանգարմամբ: Պրեէկլամպսիան հաճախ զարգանում է հղիության երկրորդ կեսում:

Կապ հաստատեք ձեր բժշկի հետ, եթե գլխացավերից բացի ունեք կողերից ներքև տեղակայված ցավեր, այրոցքի զգացում, նկատում եք դեմքի, ձեռքերի կամ ոտքերի անսպասելի այտուցվածություն կամ տեսողության հետ կապված խնդիրներ: