Հոմեոպաթիան երբեմն օգտագործվում է որպես դասական բժշկությանն այլընտրանք կամ լրացում, սակայն այս մեթոդի արդյունավետությունը կամ անվտանգությունը հաստատող տվյալները խիստ աղքատիկ են կամ բացակայում են:

Ի՞նչ է հոմեոպաթիան

Հոմեոպաթիան հիմնված է այն գաղափարի վրա, որ, եթե ինչ-որ մի նյութ առողջ մարդու մոտ առաջացնում է ախտանիշներ, ապա նույն այդ նյութի խիստ փոքր քանակները կարող են բուժել հիվանդ մարդու մոտ առաջացող նույն այդ ախտանիշները:

Հոմեոպաթիկ միջոցները պատրաստվում են` վերցնելով ինչ-որ նյութ, հիմնականում՝ բուսական, կենդանական կամ քիմիական ծագման, և բազմակի անգամ ջրով կամ ալկոհոլով նոսրացնում: Հաճախ այդ նյութերն այնքան են նոսրացվում, որ սկզբնական նյութից որևէ մնացորդ չի մնում: Այսպիսի խիստ նոսրացված պատրաստուկները կարող են այնուհետև տրվել հաբերի, հեղուկների կամ քսուքների ձևով:

Արդյոք հոմեոպաթիան արդյունավե՞տ է

Որևէ ապացույց չկա այն մասին, որ հոմեոպաթիան կարող է կանխարգելել կամ բուժել որևէ հիվանդություն:

Արդյոք հոմեոպաթիան հանդիսանո՞ւմ է այլընտրանք մանկական պատվաստմանը

Ի տարբերություն հոմեոպաթիկ պատրաստուկների, բժիշկների կողմից նշանակվող «դասական» պատվաստանյութերը մինչև զանգվածային կիրառության թույլտվություն ստանալն անցնում են արդյունավետության և անվտանգության ստուգման մի շարք հետազոտություններ: Միևնույն ժամանակ, որևէ ապացույց չկա, որը կհաստատեր մանկական վարակային հիվանդությունների դեմ պաշտպանունակության գործում հոմեոպաթիկ պատրաստուկների օգտակարությունը:

Արդյոք հոմեոպաթիկ բուժումն անվտա՞նգ է

Ընդհանուր առմամբ, դժվար է իմանալ, թե արդյոք որևէ հոմեոպաթիկ պատրաստուկը բավարար անվտանգ է, քանի որ այդպիսի պատրաստուկները, որպես կանոն, չեն անցել արդյունավետության և անվտանգության ստուգման պատշաճ հետազոտություններ, որը պարտադիր պայման է հանդիսանում «դասական» դեղերի և պատրաստուկների համար:

Չի բացառվում, որ հոմեոպաթիկ դեղերը լինեն բավարար անվտանգ, եթե օգտագործվում են «դասական» դեղերի հետ միասին, սակայն դրանք չեն կարող անվտանգ համարվել առանձին օգտագործելիս, քանի որ առողջական խնդիր ունեցող մարդը փաստորեն զրկվում է ապացուցված բուժական ազդեցությամբ դեղերից):

Արդյոք հոմեոպաթիան կարո՞ղ է հանդիսանալ բուժման այլընտրանք

Ժամանակակից ուղեցույցները կտրուկ դեմ են արտահայտվում քրոնիկ կամ ծանր, ինչպես նաև ծանր բարդությունների ռիսկով հիվանդությունների բուժումը հոմեոպաթիկ միջոցներով:

Եթե դուք ընդհատեք բժշկի նշանակումները և դրա փոխարեն օգտագործեք հոմեոպաթիկ միջոցներ, կարող եք լուրջ վտանգի ենթարկել ձեր առողջությունը: