Ինչպես նախապատրաստրաստվել լաբորատոր թեստին -

Լաբորատոր հետազոտությունից առաջ պետք է պահպանել մի շարք կանոններ, որոնք կերաշխավորեն ստացված արդյունքների առավելագույնս ճշգրտությունը:

Արյան անալիզ

• Արյան հետազոտությունների մեծ մասի համար քաղցած լինելը պարտադիր է։ Սա նշանակում է, որ մինչև անալիզը հանձնելը վերջին սնունդ կարելի է ընդունել լաբորատորիա այցելելուց առնվազն 8-12 ժամ առաջ։ Այս ընթացքում կարելի է ջուր խմել սովորական ռեժիմով: Լաբորատոր հետազոտության համար լավագույն ժամը առավոտյան 09:00-11:00 շրջակայքն է, երբ հոգնած չեք և կարող եք արյունը հանձնելուց հետո նախաճաշել։
• Լաբորատորիա այցելելու նախորդ օրը պետք է խուսափել սովորականից ավելի շատ սնունդ ընդունելուց, ալկոհոլային խմիչք օգտագործելուց և ֆիզիկական գերծանրաբեռնվածությունից։
• Եթե դեղեր եք ընդունում, անպայման խորհրդակցեք բժշկի հետ, թե արդյոք պետք է տվյալ հետազոտությունից առաջ ժամանակավորապես դադարեցնել դրանց ընդունումը:
• Եթե ծխող եք, ապա հիշեք, որ արյունը հանձնելուց առաջ առնվազն մի քանի ժամ պետք է չծխել:
• Լաբորատորիա այցելելուց հետո, հատկապես, եթե ճանապարհին հոգնել եք, ցանկալի է սպասասրահում նստել և հանգստանալ 10-15 րոպե:
• Հիշեք, որ ցանկալի չէ լաբորատոր հետազոտության համար արյուն հանձնել ֆիզիոթերապևտիկ, գործիքային կամ որևէ այլ միջամտություններից անմիջապես հետո: Նման դեպքերում խորհրդակցեք բուժող բժշկի հետ՝ նախատեսելու հետազոտության օրը:
• Եթե հետազոտվում եք կրկնակի, որպեսզի վերահսկեք որևէ ցուցանիշի փոփոխությունները, ցանկալի է արյունը հանձնել նույն լաբորատորիայում և օրվա նույն ժամին:
• Որոշ հետազոտություններ ունեն հատուկ պահանջներ և ժամկետներ, որոնց մասին անհրաժեշտ է տեղեկանալ բուժող բժշկից:

Մեզի անալիզ

Մեզը հանձնելու նախորդ օրը

• Մի՛ ընդունեք ալկոհոլային խմիչքներ, այդ թվում` նաև թույլ ոգելից խմիչքներ (գարեջուր)
• Մի՛ ընդունեք այնպիսի մրգեր կամ բանջարեղեններ, որոնք կարող են գունավորել մեզը՝ փոխելով վերջինիս բնական գույնը (օրինակ՝ ճակնդեղ, բազուկ, գազար և այլն):
• Խորհուրդ չի տրվում ընդունել միզամուղներ: Նման դեպքերում խորհրդակցեք բժշկի հետ՝ մեկ օրով դրանց ընդունումը դադարեցնելու նպատակահարմարության մասին

Նմուշառման պահանջներ

• Մեզի նմուշը հավաքեք միանգամյա օգտագործման ստերիլ ամանում (տարայում), որը կարող եք գնել դեղատնից):
• Մեզի նմուշը հավաքելուց անմիջապես առաջ լվացեք սեռական օրգանները:
• Եթե կին եք, պետք չէ մեզի անալիզը հանձնել դաշտանի օրերին:
• Մեզի անալիզի համար հավաքեք առավոտյան մեզի միջին բաժինները՝ մոտ 50 մլ ծավալով:
• Մեզը հավաքելուց հետո անմիջապես փակեք ամանի կափարիչը։
• Ցանկալի է, որպեսզի մեզի տարայի պիտակին գրվի ձեր անուն-ազգանունը, տարիքը և մեզը հավաքելու ամսաթիվը և ժամը։
• Մեզի նմուշն առանց ուշացնելու տեղափոխեք լաբորատորիա։ Հակառակ դեպքում պահպանեք այն սառը պայմաններում (+2 մինչև +8 °С):

Կղանքի մանրէաբանական անալիզ (դիսբակտերիոզ)

Ընդհանուր պահանջներ

• Կղանքի նմուշառումը և հետազոտությունը պետք է կատարվի հակաբիոտիկներով, հակաբակտերիալ կամ հակասնկային դեղերով բուժումը սկսելուց առաջ (և ոչ թե նման բուժումը սկսելուց հետո):
• Կղանքի նմուշառումը պետք է կատարվի հիվանդության վաղ փուլերում:
• Կղանքի նմուշառումը պետք է կատարվի ստերիլ պայմաններում (մեկանգամյա օգտագործման ստերիլ նյութեր՝ պետքանոթ, փորձանոթ, շպատել, գդալիկ և այլն):
• Մինչև նմուշառումը և դրանից հետո անհրաժեշտ է գոլ օճառաջրով լավ լվանալ ձեռքերը:

Նմուշառման պահանջներ

• Հետազոտության համար համար պիտանի է միայն նոր արտաթորված կղանքը:
• Կղանքի նմուշառումը կատարվում է նախապես մանրէազերծած և տաք ջրով լավ պարզաջրված պետքանոթից (սուդնո, սավան և այլն):
• Կղանքի նմուշը պետք վերցնել ստերիլ մեկանգամյա օգտագործման շպատելով կամ գդալիկով:
• Կղանքը պետք է նմուշառել ստերիլ մեկանգամյա օգտագործման տարայի մեջ, որից անմիջապես հետո պետք է զգուշությամբ կիպ փակել կափարիչը:
• Նմուշառված կղանքը պետք է լաբորատորիա տանել հնարավորինս արագ՝ վերցնելուց հետո ոչ ուշ քան 1 ժամվա ընթացքում: Հակառակ պարագայում նմուշը պետք է պահել սառնարանային (ո՛չ սառցարանային) պայմաններում (2-6°С, ոչ ավելի քան 24 ժամ): Այնուամենայնիվ, արդյունքների հավաստիությունն էապես բարձրանում է, եթե հետազոտվում է նոր արտաթորված կղանքը:

Չի՛ թույլատրվում

• սառեցնել կենսանմուշը (պահելով այն սառցարանում)
• երկարատև պահպանել կենսանմուշը (ավելի քան 5-6 ժամ)
• պահել կղանքի նմուշը ոչ կիպ փակած տարայում
• լաբորատորիա բերել նախորդ օրը վերցված կղանքի նմուշը:

Սերմնահեղուկի անալիզ

• Սերմնահեղուկը հանձնեք սեռական հարաբերություններից զերծ մնալուց ոչ շուտ, քան 48 ժամ և ոչ ուշ, քան 7-օրյա ժամկետում:
• Այս ընթացքում զերծ մնացեք ալկոհոլային խմիչքներ օգտագործելուց, շոգեբաղնիքներ այցելելուց, ֆիզիոթերապևտիկ տեղային միջոցառումներից:
• Սերմնահեղուկը հավաքեք դեղատնից գնված ստերիլ միանգամյա օգտագործման ամանում՝ զերծ մնալով պահպանակի օգտագործումից:
• Հիշեք, որ սերմի հետազոտության համար պիտանի է ոչ ուշ, քան 1 ժամ առաջ ստացված սերմնահեղուկը:
• Մինչև լաբորատորիա տեղափոխելը կենսանմուշը պետք է պահպանել տաք՝ +27° մինչև +37°С պայմաններում:

Միզասեռական քսուք

Մինչև լաբորատորիա գնալը (կանայք և տղամարդիկ)

• Հետազոտությունից առնվազն 1-2 օր առաջ պետք է զերծ մնալ սեռական հարաբերություններից:
• Հետազոտության նախորդող օրը երեկոյան պետք է խուսափել լոգանք ընդունելուց:
• Հետազոտության նախորդ և բուն հետազոտության օրը չի կարելի լվանալ սեռ. օրգանները:
• Հետազոտության ներկայանալու օրն առավոտյան պետք է չմիզել՝ քսուքը վերցնելուց առնվազն 2-3 ժամ առաջ:

Լաբորատորիայում (տղամարդիկ)

• Հանվել՝ լիարժեքորեն մերկացնելով սեռ. օրգանները:
• Ձախ ձեռքով զգուշությամբ ետ քաշել առնանդամի գլխիկի վրայի մաշկն այնպես, որ գլխիկը լիարժեք բացվի:
• Քսուքի համար Ձեզ տրված առարկայական ապակին վերցնել աջ ձեռքով ու պահել՝ մատներով բռնելով ապակու կողային («սուր») մակերեսները՝ առանց հպվելու հարթ մակերևույթին:
• Աջ ձեռքով առարկայական ապակու հարթ մակերեսը պինդ հպել առնանդամի բացված գլխիկի ու միզուկի բացվածքի լորձաթաղանթին այնպես, որ ապակու այդ մակերևույթին ի հայտ գա տեսանելի «դրոշմ» կամ արտադրուկ:
• Նմուշառված ապակին զգուշությամբ տեղադրել Ձեզ տրամադրված տարայի մեջ:
• Լվանալ ձեռքերը օճառաջրով: