Ցածր FODMAP սննդակարգ - Առողջ սննդակարգ

Ցածր FODMAP սննդակարգը նախատեսված է սննդակարգում որոշ մթերքների բացառման կամ կտրուկ սահմանափակման միջոցով որովայնային ախտանիշների մեղմացման համար:

Ի՞նչ է ցածր FODMAP սննդակարգը

FODMAP-ը հապավում է, որը բացվում է որպես՝

• ֆերմենտացվող օլիգոսախարիդներ (Fermentable Oligosaccharides)
• դիսախարիդներ (Disaccharides)
• մոնոսախարիդներ (Monosaccharides)
• պոլիոլներ (Polyols):

Սրանք որոշ շաքարների քիմիական անվանումներն են, որոնք բարակ աղիներից դժվարությամբ են ներծծվում դեպի արյան հուն:

Այս շաքարները կարող են նպաստել որոշ մարդկանց մոտ գրգռված աղու համախտանիշի (ԳԱՀ) գանգատների սրացմանը՝ փորլուծություն, աղիքային գազեր, որովայնի փքվածություն (մետեորիզմ), կծկանքներ (սպազմ), սրտխառնոց և փորկապություն: Սրանք գանգատներ են, որոնք կարող են առաջացնել մեծ անհարմարավետություն, սթրես և մշտական խնդիրներ՝ ի վերջո հանգեցնելով կյանքի որակի վատացմանը:

Ցածր FODMAP սննդակարգը կրճատում կամ բացառում է այն մթերքները, որոնք հարուստ են FODMAP-ով, օրինակ՝ որոշ հատիկավորներ, բանջարեղեններ, մրգեր և կաթնամթերք:

Ցածր FODMAP սննդակարգը մշակվել է ավստրալիացի գիտնականների կողմից:

Իմացե՛ք ավելին գրգռված աղու համախտանիշի մասին:

Ինչպիսի՞ մթերքներից պետք է խուսափել

FODMAP-ով հարուստ մթերքներից են՝

• սխտոր
• սոխ
• խնձոր
• կանաչ ոլոռ
• քիչ մարինացված միս
• կաթ
• յոգուրտ
• սիսեռ
• ցորենի, գարու և տարեկանի հաց:

ԳԱՀ-ի ախտանիշներով մարդկանց խորհուրդ է տրվում խուսափել FODMAP-ով հարուստ սննդամթերքներից և դրանք փոխարինել FODMAP-ից աղքատ այլ մթերքներով:

Ինչպիսի՞ մթերքներ պետք է օգտագործել

Ցածր FODMAP-ով մթերքներց են՝

• բիբաև (կապսիում, стручковый перец)
• լոբի
• նարինջ
• խաղող
• ձու
• սովորական մշակված միս
• վարսակ
• բրինձ
• մուգ շոկոլադ
• գետնանուշ:

Ո՞ւմ է խորհուրդ տրվում ցածր FODMAP սննդակարգը

Եթե ցանկանում եք փորձել ցածր FODMAP սննդակարգ, նախ խորհրդակցեք դիետոլոգի հետ: Դիետոլոգը ձեզ հետ կքննարկի, թե ձեր սննդակարգում որ փոփոխությունները կարող են դառնալ առավելագույնս օգտակար:

Նկատի ունեցեք, որ ցածր FODMAP սննդակարգին պետք է հետևել ոչ թե ողջ կյանքի ընթացքում, այլ միայն 2-6 շաբաթ՝ քանի դեռ ԳԱՀ-ի ախտանիշները չեն մեղացել, որից հետո աստիճանաբար կարելի է սահմանափակումները մեղմացնել կամ հանել:

Ցածր FODMAP սննդակարգի հնարավոր կողմնակի ազդեցությունները

Ցածր FODMAP սննդակարգը դուրս է թողնում բազմաթիվ օգտակար սննդամթերքներ, ուստի զրուցեք ձեր դիետոլոգի հետ, թե արդյոք դա կարող է ձեզ մոտ առաջացնել սննդանյութերի պակաս, և, եթե այո, ապա պետք է արդյոք ընդունել սննդային հավելումներ և վիտամիններ:

Ցածր FODMAP սննդակարգը նաև կարող է հանգեցնել բջջանքի և կալցիումի պակասի, որի համար դիետոլոգը կարող է կրկին օգտակար խորհուրդներ տալ: