Տարիքային մակուլյար դեգեներացիա - Աչքի հիվանդություններ

Մակուլյար դեգեներացիան աչքի ծանր և անդառնալի հիվանդություն է, որն առաջացնում է տեսադաշտի կենտրոնում տեսողության կորուստ:

Աչքի մակուլյար դեգեներացիան վերջնական բուժում չունի, սակայն դուք կարող եք նվազեցնել կամ ընդհատել տեսողության հետագա կորստի ռիսկը:

Ի՞նչ է մակուլյար դեգեներացիան

Մակուլյար դեգեներացիան աչքի քրոնիկ հիվանդություն է, որն առաջացնում է տեսողության կորուստ: Այն պատճառվում է ձեր աչքի նյարդերի վնասումից:

Մակուլյար դեգեներացիան առաջացնում է տեսողության աղոտացում կամ նույնիսկ կորուստ տեսադաշտի կենտրոնական շրջանում: Սա բերում է մարդկանց դեմքերը տեսնելու և ճանաչելու, ավտոմեքենա վարելու և այլ դժվարություններ: Ծանր դեպքերում հիվանդությունն ավարտվում է լիարժեք կուրությամբ:

Կան մակուլյար դեգեներացիայի երկու հիմնական տեսակներ՝

• չոր, որն ամենատարածված տեսակն է, զարգանում է դանդաղորեն և աստիճանաբար առաջացնում կենտրոնական տեսողության թույլից մինչև ծանր կորուստ
• թաց, որն ամենածանր տեսակն է, զարգանում է արագորեն, երբ մակուլայի տակ ի հայտ են գալիս ոչ նորմալ արյունատար անոթներ՝ բերելով վերջինիս այտուցի:

Մակուլյար դեգեներացիան հաճախ զարգանում է 50-ն անց մարդկանց մոտ, ուստի հայտնի է նաև որպես տարիքային մակուլյար դեգեներացիա:

Որքան շուտ ախտորոշվի հիվանդությունը, այդքան ավելի լավ: Երբեք մի՛ կարծեք, որ տեսողության որոշակի վատթարացումը պայմանավորված է միայն տարիքով: Տեսողության կանոնավոր ստուգումը կարող է օգնել, որ հիվանդությունը շուտ ախտորոշվի:

Իմացե՛ք ավելին չոր և թաց մակուլյար դեգեներացիայի մասին:

Մակուլյար դեգեներացիայի պատճառները

Մակուլյար դեգեներացիայի պատճառը հայտնի չէ: Սակայն այն ավելի հաճախ է հանդիպում ծխող, մարմնի ավելորդ քաշով, անառողջ սնունդ օգտագործող և այնպիսի հիվանդություններով կամ առողջական խնդիրներով մարդկանց շրջանում, որոնք ախտահարում են արյունատար անոթները, օրինակ՝ արյան բարձր խոլեստերին կամ դիաբետ:

Մակուլյար դեգեներացիայի ախտորոշումը

Ակնաբույժը կամ օկուլիստը կզննեն ձեր ակնահատակը հատուկ գործիքի միջոցով: Նրանք կարող են առաջարկել նաև ակնաբանական հատուկ հետազոտություններ, օրինակ՝ աչքի անգիոգրաֆիա:

Տեսողության կորստի չափը գնահատվում է տեսողության ստուգմամբ:

Մակուլյար դեգեներացիայի ախտանիշները

Մակուլյար դեգեներացիայի հիմնական ախտանիշը մոտիկ առարկաների վրա տեսողությունը կենտրոնացնելու դժվարությունն է, որի պատճառով կարող եք ունենալ՝

• աղոտ տեսողություն կամ տեսադաշտում մթնած շրջաններ
• տեսադաշտի կենտրոնում տեսողության նվազում կամ կորուստ
• փոքր տառաչափով գրվածքներն ընթերցելու դժվարություն
• մոտիկ աշխատանքի կամ կարդալու համար ավելի ուժեղ լույսի կարիք
• տարածությունները գնահատելու հետ կապված դժվարություններ
• դեմքերը ճանաչելու դժվարություն
• գույների ավելի մուգ ընկալում
• ուղիղ գծերի կորացած ընկալում:

Մակուլյար դեգեներացիայի բուժումը

Մակուլյար դեգեներացիան որևէ բուժում չունի, ուստի ակնաբույժը պետք է ձգտի, որ պահպանվի ձեր տեսողության տվյալ պահի մակարդակը: Դեղերը, վիրահատությունը կամ լազերային բուժումը նույնպես կարող են օգտակար լինել:

Թաց մակուլյար դեգեներացիայի ժամանակ ավելի հաճախ առաջարկվում է դեղերի հետակնագնդային ներարկում, որը կարող է նվազեցնել տեղային բորբոքումը և արյունալեցումը:

Երբեմն նշանակվում են նաև հատուկ վիտամինային հավելումներ, որոնց արդյունավետության վերաբերյալ հավաստի տվյալները բացակայում են:

Մակուլյար դեգեներացիայի կանխարգելումը

Դուք կարող եք կրճատել մակուլյար դեգեներացիայի զարգացումը կամ կանգնեցնել տեսողության կորուստը հետևյալ միջոցառումներով՝

• հրաժարվեք ծխելուց
• համոզվեք, որ ձեր արյան ճնշումը նորմալ է
• դարձրեք ձեր սննդակարգն առողջ, որը հարուստ է մրգերով, բանջարեղեններով և օմեգա-3 ճարպերով
• արևոտ օրերին աչքերը պաշտպանեք արևային ակնոցներով
• կարգավորեք ձեր քաշը և ֆիզիկապես ակտիվ ապրելակերպ վարեք
• ձեր բժշկի կամ դիետոլոգի խորհրդով խմեք հակաօքսիդանտային հավելումներ