Գրադարան

Մալաբսորբցիայի համախտանիշ

Մալաբսորբցիայի համախտանիշ

Time Read 3 րոպե

Բարակ աղին մարսում է ձեր ընդունած սննդի մեծ մասը:

Եթե ունեք մալաբսորբցիայի համախտանիշ, ձեր բարակ աղին չի կարողանում արյան հուն ներծծել սննդամթերքներից տրոհումից ստացվող սննդանյութերը:

Ի՞նչ դեր ունի բարակ աղին

Բարակ աղին (նրբաղիք) սկսվում է ստամոքսաելքից և, իր ճանապարհին մի շարք օղակաձև գալաներ առաջացնելով, վերջանում է հաստ աղիքի սկզբում։ Ամբողջ նրբաղիքի երկարությունը չափահաս մարդկանց մոտ շուրջ 7 մետր է:

Բարակ աղին բաժանվում է երեք մասի`

  • տասներկումատնյա աղի (դուոդենում)
  • աղիճ աղիք (յեյունում)
  • զստաղիք (իլեում):

Իրականում այս բաժանումը պայմանական է, որովհետև թվարկված երեք հատվածների միջև որոշակի անատոմիական սահման չկա։

Բարակ աղու լորձաթաղանթը բազմաթիվ աղիքային թավիկներով ծածկված լինելու շնորհիվ ունի թավշի տեսք։ Թավիկները մոտ 1 մմ բարձրությամբ լորձաթաղանթային ելուններ են՝ ծածկված, ինչպես և ինքը՝ լորձաթաղանթը, գլանաձև էպիթելով և կենտրոնում ունեն ավշային ծոց ու արյան անոթներ։ Թավիկների գործառույթը սննդանյութերի ներծծումն է, ընդ որում սպիտակուցները և ածխաջրերը ներծծվում են երակային անոթներով և դռներակի համակարգով տեղափոխվում են լյարդ, իսկ ճարպերը, անցնելով ավշային անոթներով, թափվում են երակային արյան մեջ։ Բարակ աղու ամբողջ երկարությամբ լորձաթաղանթում դասավորված են բազմաթիվ աղիքային գեղձեր, որոնք արտազատում են աղիքային հյութ։

Բարակ աղու լորձաթաղանթի ներծծող մակերեսը բավականին մեծանում է նրա վրա գտնվող լայնական ծալքերի շնորհիվ (մինչև 200 քառակուսի մետր), որոնք կոչվում են շրջանաձև ծալքեր և բաղկացած են միայն լորձային և ենթալորձային թաղանթներից: Շրջանաձև ծալքերը մնայուն են և չեն անհետանում նույնիսկ աղիքային խողովակի լայնացման ժամանակ։

Ի՞նչ է մալաբսորբցիայի համախտանիշը

Ձեր բարակ աղու հիմնական դերը, ինչպես նշվեց վերևում, թավիկների միջոցով պատի հաստությամբ սննդանյութերի և հեղուկների ներծծումն է դեպի արյան հուն: Մալաբսորբցիայի համախտանիշը մի շարք հիվանդությունների խումբ է, որոնց դեպքում խանգարվում է բարակ աղիու այս գործառույթը:

Մալաբսորբցիայի համախտանիշն ընթանում է ինչպես մակրոսննդանյութերի (սպիտակուցներ, ածխաջրեր և ճարպեր), այնպես էլ միկրոսննդանյութերի (վիտամիններ և միներալներ) ներծծման խանգարմամբ:

Մալաբսորբցիայի համախտանիշի պատճառները

Մալաբսորբցիայի համախտանիշ կարող է զարգանալ բազմաթիվ տարբեր պատճառներից՝ սկսած որոշ հիվանդություններից մինչև բնածին (ժառանգական) արատներ:

Հնարավոր պատճառներ

Մալաբսորբցիայի համախտանիշի զարգացման պատճառային գործոններից են՝

  • աղիների վարակային, բորբոքային, վնասվածքային (այդ թվում՝ վիրահատական) ախտահարումներ
  • հակաբիոտիկների տևական օգտագործում
  • այլ հիվանդություններ, օրինակ՝ ցելիակա, Կրոնի հիվանդություն, քրոնիկ պանկրեատիտ կամ կիստոզ ֆիբրոզ (մուկովիսցեդոզ)
  • լակտազ ֆերմենտի դեֆիցիտ կամ լակտոզի (կաթնաշաքարի) անտանելիություն
  • որոշ բնածին արատներ, օրինակ՝ բիլիար ատրեզիա, երբ լեղուղիները նորմալ զարգացած չեն և լեղին լյարդից չի կարողանում արտահոսել դեպի բարակ աղի
  • լեղապարկի, լյարդի կամ ենթաստամոքսային գեղձի հիվանդություններ
  • մակաբուծային հիվանդություններ
  • ճառագայթային թերապիա, որը կարող է վնասել բարակ աղու լորձաթաղանթը
  • որոշ դեղերի ընդունում, որոնք կարող են վնասել բարակ աղու լորձաթաղանթը (օրինակ՝ Տետրացիկլին, Կոլխիցին կամ Խոլեսթիրամին):

Այս համախտանիշը կարող է պատճառվել նաև մարսողական խնդիրներով: Օրինակ, ձեր ստամոքսը կարող է չարտադրել որոշ սննդատեսակների մարսողությանը մասնակցող ֆերմենտներ կամ կարող է խանգարված լինել սննդախյուսի՝ ստամոքսահյութով և ֆերմենտներով խառնվելու գործընթացը:

Հազվադեպ պատճառներ

Կան նաև որոշ հազվադեպ հանդիպող խանգարումներ, որոնք կարող են բերել մալաբսորբցիայի, օրինակ՝ կարճ աղու համախտանիշ, արևադարձային սպրու և իրենից բակտերիալ վարակ ներկայացնող Ուիփլի հիվանդություն և այլն:

Մալաբսորբցիայի համախտանիշի ախտանիշները

Մալաբսորբցիայի համախատանիշի նշաններն ի հայտ են գալիս, երբ չներծծված սննդանյութերը սկսում են անցնել մարսողական խողովակով և հեռանալ օրգանիզմից:

Այս ախտանիշները կարող կարող են տարբերվել՝ կախված այն հանգամանքից, թե որ սննդանյութը կամ սննդանյութերն են մնում ոչ բավարար ներծծված: Այլ ախտանիշները կարող են զարգանալ՝ կախված տվյալ սննդանյութի կամ սննդանյութերի դեֆիցիտից:

Եթե խանգարված է ձեր բարակ աղու կողմից ճարպերի, սպիտակուցի, որոշ շաքարների կամ վիտամինների ներծծումը, կարող են զարգանալ հետևյալ ախտանիշները:

  • Ճարպեր. դուք կարող եք ունենալ բաց գույնի և խիստ տհաճ հոտով թուլացած և ջրոտ կղանք, որը զուգարանակոնքում դժվար մաքրվող մեծ հետքեր է թողնում:
  • Սպիտակուց. դուք կարող եք ունենալ չոր մազեր, մազաթափություն կամ օրգանիզմում հեղուկների պահպանում, որը կարող է դրսևորվել այտուցների զարգացմամբ:
  • Որոշ շաքարներ. դուք կարող եք ունենալ աղիների փքվածություն, ավելցուկային աղիքային գազեր կամ սուր (անզուսպ) փորլուծություն:
  • Որոշ վիտամիններ. դուք կարող եք ունենալ սակավարյունություն (անեմիա), թերսնուցում, ցածր արյան ճնշում (հիպոտոնիա), մարմնի քաշի կորուստ կամ մկանների ատրոֆիա:

Մալաբսորբցիան կարող է տարբեր սեռի կամ տարիքի անձանց մոտ առաջացնել տարբեր ախտահարումներ: Օրինակ, կանանց մոտ կարող է դադարել դաշտանը (վաղ դաշտանադադար), իսկ երեխաների մոտ կարող է դիտվել աճի և զարգացման հապաղում: Երեխաների մոտ մալաբսորբցիայի մեկ այլ նշան կարող է դառնալ որոշ սննդամթերքներից ինքնակամ համառ հրաժարվելը:

Մալաբսորբցիայի համախտանիշի ռիսկի գործոնները

Մալաբսորբցիայի զարգացման ռիսկի գործոններից են՝

  • մուկովիսցեդոզի կամ մալաբսորբցիայի ընտանեկան պատմություն (ժառանգականություն)
  • ալկոհոլի մեծ քանակների ընդունում
  • աղիների վրա տարած վիրահատական միջամտություն
  • որոշ դեղերի օգտագործում, օրինակ՝ լուծողականներ և միներալային յուղեր
  • ուղևորություն դեպի որոշ տարածաշրջաններ (կարիբյան ափ, Հնդկաստան, Հարավային Ասիայի այլ շրջաններ):

Մալաբսորբցիայի համախտանիշի ախտորոշումը

Բժիշկը կարող է ձեզ մոտ կասկածել մալաբսորբցիա, եթե դուք ունեք քրոնիկ փորլուծություն, սննդանյութերի դեֆիցիտ կամ, չնայած առողջ սննդակարգին, նիհարում եք: Որոշ հետազոտություններ կարող են հաստատել ախտորոշումը:

  • Կղանքի թեստ. այս թեստով կարող է ստուգվել կղանքի նմուշում ճարպերի քանակը: Սա թերևս ամենահուսալի թեստն է, քանի որ մալաբսորբցիայի ժամանակ սովորաբար կղանքում հայտնվում է ճարպ:
  • Արյան թեստեր. այս թեստով չափվում է արյան մեջ որոշ սննդանյութերի մակարդակը, օրինակ՝ վիտամին B12, վիտամին D, ֆոլատ, երկաթ, կալցիում, կարոտին, ֆոսֆոր, ալբումին և պրոտեին: Այս շարքից որևէ սննդանյութի դեֆիցիտը դեռևս չի նշանակում, որ ունեք մալաբսորբցիա: Արյան մեջ սննդանյութերի նորմալ մակարդակները կարող է վկայել այն մասին, որ ձեզ մոտ մալաբսորբցիա չկա (կամ այն դեռևս խնդրահարույց չէ):
  • Շնչառական թեստեր. սա կարող է նշանակվել լակտոզի նկատմամբ անտանելիությունն ախտորոշելիս:
  • Պատկերային հետազոտություններ. գերձայնային կամ ռենտգեն հետազոտությունները կարող են հայտնաբերել մարողական կամ այլ օրգանների տարբեր հիվանդությունների ժամանակ տեղ գտնող նույն օրգանների կառուցվածքային շեղումներ: Օրինակ, սոնոգրաֆիայով կարող է հայտնաբերվել լյարդ-լեղապարկի կամ ենթաստամոքսային գեղձի հիվանդություններ, իսկ համակարգչային շերտագրով (ԿՏ)՝ Կրոնի հիվանդության ժամանակ բարակ աղիների պատի բարակեցում:
  • Բիոպսիա. սա կարող է նշանակվել էնդոսկոպիկ հետազոտության ընթացքում, երբ ձեր բարակ աղիներից վերցվում և մանրադիտակային հետազոտության է ենթարկվում փոքր հյուսվածքային նմուշ:

Մալաբսորբցիայի համախտանիշի բուժումը

Բժիշկը հավանաբար ձեր բուժումը կսկսի՝ նախ նշանակումներ անելով առավել անհանգստություն պատճառող խնդրի դեմ: Օրինակ, եթե ձեզ անհանգստացնում է մշտական փորլուծությունը, նա կարող է նշանակել Լոպերամիդ:

Բժիշկը նաև կցանկանա փոխարինող բուժում նշանակել այն սննդանյութերի և հեղուկների համար, որոնք ձեր օրգանիզմը չի կարողանում ներծծել և յուրացնել: Նման դեպքերում նա կարող է նաև վերահսկել ձեզ մոտ ջրազրկման նշանները (օրինակ՝ մշտական ծարավի զգացում, մեզի քչացում, բերանի, մաշկի կամ լեզվի չորություն):

Հաջորդը, բժիշկը կնշանակի բուժում՝ ուղղված բարակ աղիներում ներծծման խնդիրն առաջացնող պատճառի դեմ: Օրինակ, եթե ձեզ մոտ լակտոզի անտանելիություն է, նա խորհուրդ կտա խուսափել կաթից և այլ կաթնամթերքից կամ ընդունել լակտոզ ֆերմենտ պարունակող հաբեր: Նույն կերպ, նա բուժում կնշանակի, եթե ունեք պանկրեատիտ, գաստրիտ և այլն:

Այս փուլում բժիշկը կարող է ձեզ ուղեգրել դիետոլոգի խորհրդատվության, ով կարող է առաջարկել՝

  • ֆերմենտային հավելումներ
  • վիտամինային հավելումներ
  • սննդակարգի որոշակի փոփոխություններ:

Ձեր բժիշկը դիետոլոգի հետ միասին կմշակեն կոնկրետ դեպքի համար լավագույնս օգնող բուժման և սննդակարգի ծրագիր:

Հոդվածը տեղադրվել է՝ 06-04-2020 վերանայվել է՝ 12-05-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը: