Տղամարդկային տիպի մազաթափություն (ճաղատություն)

​Տղամարդկային կամ արական տիպի ճաղատությունը մազաթափության ամենահաճախ հանդիպող տեսակն է, որը որոշակի չափով ազդում է տարիքն առնող բոլոր տղամարդկանց վրա։

Ծանոթացեք նաև այս հոդվածի հետ ուղղակիորեն կապված այլ նյութերի հետ:

Հազվադեպ, այս մազաթափությունը կարող է սկսվել վաղ երիտասարդ տարիքում։ 60 տարեկան հասակում տղամարդկանց մեծ մասի մոտ առկա է տարբեր աստիճանի մազաթափություն։

Որոշ տղամարդկանց համար այս երևույթն այնքան էլ անհանգստացնող չէ։ Մյուսները, սակայն, կարող են ապրել հուզական դիսթրես, ինքնագնահատականի կորուստ, հազվադեպ՝ նաև դեպրեսիա։

Մազաթափության և ճաղատացման բնույթը սովորաբար ժառանգվում է և կարող է ազդել ինչպես տղամարդկանց, այնպես էլ կանանց վրա։ Այն զարգանում է, երբ մազապարկիկներն արական տեստոստերոն հորմոնից առաջացող դիհիդրոտեստոստերոնի նկատմամբ դառնում են գերզգայուն։ Եվ տղամարդկանց, և կանանց մոտ այս հորմոնը տարբեր քանակներով առկա է։

Տեստոստերոնի կապը ճաղատության հետ բերել է սխալ պատկերացման, թե իբր ճաղատությունը առնականության նշան է, մինչդեռ տղամարդկային տիպի ճաղատությամբ անձինք չունեն ավելի շատ արական հորմոն, քան մյուս անձինք։ Պարզապես ճաղատ տղամարդկանց մոտ մազապարկիկներն այս հորմոնների նկատմամբ ավելի զգայուն են։

Ճաղատացման ընթացքը

Առաջին փուլը սովորաբար ճակատի և քունքերի առաջային շրջանի «մերկացումն» է (մազագծի ետ շարժվելը), որին հաջորդում է գագաթային և քունքային շրջանների մազերի բարակումը և աստիճանական մազաթափումը։ Երբ այս երկու շրջանները միջին շրջանում ձուլվում են միմյանց, ձևավորվում է գլխի ետին մասը շրջանաձև գրկող պայտաձև մազածածկ շրջան՝ մնացած շրջանների ճաղատացմամբ։ Շարունակվելու դեպքում որոշ տղամարդկանց ամբողջ գլուխը ճաղատանում է։

male-pattern-baldness-illustration.jpg

Կարո՞ղ է արդյոք տղամարդկային տիպի ճաղատությունը բուժվել

Տղամարդկային տիպի մազաթափությունը և ճաղատությունը հիվանդություն չէ, ուստի այն չի կարող ազդել ձեր առողջական վիճակի վրա։ Այնուամենայնիվ, եթե այս վիճակը ձեզ մոտ առաջացնում է հոգեկան մեծ անհանգստություն, դիմեք ձեր բժշկին և հետևեք նրա խորհուրդներին։

Ըստ անհրաժեշտության, բժիշկը կարող է ձեզ ուղեգրել մաշկաբանի խորհրդատվության, իսկ վերջինս՝ նշանակել որոշ հետազոտություններ և բուժում։

Եթե ձեզ մոտ ճաղատացումը ժառանգական ծագում ունի, ապա ամենայն հավանականությամբ որևէ բուժում կամ միջոցառում չի կարող որևէ զգալի արդյունք տալ։ Բուժումը կարող է միայն որոշակիորեն դանդաղեցնել ճաղատացման ընթացքը, բայց չի կարող լիարժեք կանխել այն և վերականգնել մազերի աճը։ Սովորաբար նման դեպքում նշանակվում է Մինօքսիդիլ կամ Ֆինաստերիդ։ Մինօքսիդիլն արտադրվում է նաև լոսյոնի տեսքով։

Ձեզ կարող են առաջարկել նաև «մազերի կրակում», մազերի փոխպատվաստում կամ մեկ այլ պլաստիկ վիրահատություն, օրինակ՝ գանգամաշկի կրճատում։

Որպես կանոն, ավելի հեշտ է պահպանել առկա մազերը, քան դրանց թափվելուց հետո փորձել դրանք կրկին աճեցնել։ Մազապարկիկներն իրենց գործունեությունը կորցնելուց հետո չեն կարող այլևս վերականգնվել։

Հոդվածը վերանայվել է՝ 02-02-2021