Մեդիտացիա

2 րոպե

Մեդիտացիան հին արևելյան մեթոդ է, որն արևմտյան երկրներում դարձել է խիստ հանրաճանաչ որպես հոգեպես հանգստանալու և մտքերի վրա կենտրոնանալու գործիք։

Մեդիտացիան կարող է օգնել ձեր առօրյա կյանքում, որ նվազեցնեք սթրեսը և բարելավեք ընդհանուր ինքնազգացողությունը։

Ի՞նչ է մեդիտացիան

Մեդիտացիան «միտք-մարմին» կամ ռելաքսացիոն թերապիայի մեթոդ է։

Մեդիտացիայի ընթացքում դուք ձեր միտքը կենտրոնացնում եք ինչ-որ բանի վրա, ինչպիսիք են շնչառությունը, ձայները, մարմնի շարժումները, զգացողությունները կամ մանտրան (չանտ)։

Սա օգնում է, որ լարված կամ անհանգիստ ու տագնապած վիճակում ձեր ուղեղը մնա կենտրոնացած և խաղաղված՝ «հեռանալով» ձեզ անհանգստացնող մտքերից, ներքին հակասություններից կամ մտատանջություններից։

Որո՞նք են մեդիտացիայի առողջական օգուտները

Մեդիտացիան օգտակար է ինչպես ֆիզիկական, այնպես էլ հոգեկան առողջության համար։ Այն կարող է օգնել, որ մեղմացնեք բազմաթիվ առողջական խնդիրների ախտանիշներ, այդ թվում՝

• տագնապ և անհանգստություն
• դեպրեսիա
• սրտի իշեմիկ հիվանդություններ
• բարձր արյան ճնշում
• ցավ
• քնի խնդիրներ։

Մեդիտացիան նաև կարող է օգտակար լինել հոգեկան առողջության ոլորտում՝ օգնելով, որ՝

• կառավարեք սթրեսը
• բարձրացնեք ձեր ինքնագիտակցումը
• կենտրոնանաք ներկա պահի վրա։

Ինչպե՞ս մեդիտացվել

Այսօր ինտերնետում կամ այլ աղբյուրներից կարող եք գտնել մեդիտացիայի բազմաթիվ մեթոդների, սակայն դրանց բոլորի հիմնական գաղափարը նույնն է։

• Գտեք հանգիստ ու հարմար մի վայր, որտեղ ձեզ խանգարող չկա կամ դուք չեք կարող հեշտությամբ ձեզ ուշադրությունը շեղել այլ բաների վրա։
• Նստեք կամ պառկեք հարմարավետ դիրքում, օրինակ՝ նստեք բազկաթոռին կամ պառկեք փափուկ հատակին։
• Փակեք ձեր աչքերը։
• Ձեր ուշադրությունը կենտրոնացրեք կոնկրետ մեկ բանի վրա, օրինակ՝ շնչառություն, ձեր շուրջբոլորն առկա ձայներ կամ որևէ կոնկրետ առարկա։

Լավագույն արդյունքներ ստանալու համար անհրաժեշտ է մեդիտացիայով զբաղվել կանոնավոր կերպով, հատկապես, երբ այն դառնում է սովորույթ։

Մեդիտացիան ամրապնդելու խորհուրդներ

Մեդիտացիան կարող է կատարվել ցանկացած վայրում։ Այն ձեզնից շատ ժամանակ չի խլում։ Փորձեք օրական 1-2 րոպեից՝ շաբաթների և ամիսների ընթացքում աստիճանաբար երկարացնելով տևողությունը և հասցնելով 15-20 րոպե։ Կարևորն այն է, որ դուք ամեն օր կրկնեք ձեր մեդիտացիան։

Եթե դժվարությունների եք հանդիպում, կարող եք՝

• մասնակցել մեդիտացիայի ծրագրերին ու դասընթացներին
• օգտագործել մեդիտացիայի DVD կամ YouTube-ային հոլովակ
• օգտվել բջջային հավելվածներից: