Գրադարան

Գիտակցվածություն

Գիտակցվածություն

Time Read 2 րոպե

Գիտակցվածությունը ներկա պահի վրա կենտրոնանալն է, որն օգնում է բարելավելու ինքնազգացողությունը և կրճատելու սթրեսը։

Հետազոտողներն ուսումնասիրում են գիտակցվածությունը և հարակից մեթոդները, օրինակ՝ ռելաքսացիան, որ հասկանան, թե կարող են արդյոք այս մեթոդներն օգտակար լինել նաև ֆիզիկական և հոգեկան առողջության խնդիրները հաղթահարելիս։

Ի՞նչ է գիտակցվածությունը

Գիտակցվածությունն ամբողջ ուշադրությունը ձեր և շրջապատի վրա կենտրոնացնելն է՝ վայրկյան առ վայրկյան, առանց որևէ բան քննարկելու կամ դատողություններ անելու։ Սա թույլ է տալիս թուլացնել ձեր միտքը և մարմինը:

Գիտակցվածության վիճակում դուք ամեն վայրկյան «զննում եք» ձեր մտքերը, զգացումները, համի, հոտի, տեսողական, լսողական և այլ զգացողությունները։ Դուք նաև պետք է ամեն վայրկյան հետևեք, թե ինչ է կատարվում ձեր շրջապատում՝ ամեն մանրուքով։ Գիտակցվածության վիճակը կարող է օգնել, որ կենտրոնանաք և գնահատեք, թե ինչ ունեք՝ տեսնելով և զգալով շրջապատն այնպես, ինչպես կա: Այսպիսի գերզգոն վիճակը նաև կարող է օգնել, որ թարմացնեք ձեր զգացողությունները:

Առանց գիտակցվածության, դուք պարզապես ռեակցիա եք տալիս բացասական մտքերին և զգացողություններին: Գիտակցվածության վարժանքները կարող են օգնել, որ ավելի իրազեկված լինեք ձեր սեփական մտքերի և զգացողությունների մասին և կառավարեք դրանք դրական ուղղվածությամբ: Մտքերի և զգացողությունների վերահսկողությունը կարող է օգնել, որ մեղմացնեք սթրեսը և անհանգստությունը:

Գիտակցվածության մեթոդի արմատները հասնում են մինչև բուդդայական մեդիտացիայի ակունքներ։ Յուրաքանչյուր մարդ կարող է զբաղվել գիտակցվածության մեթոդով, որ բարելավի իր ինքնազգացողությունը և ինքնագիտակցումը։

Ե՞րբ ես գիտակցված չեմ

Բազմաթիվ մարդիկ ունեն որոշակի «օրակարգեր», օրինակ՝ զբոսանելը, շանը դուրս տանելը կամ աշխատավայր կամ դպրոց գնալը։ Երբ ինչ-որ բան եք անում ձեզ ծանոթ միջավայրում, գործում եք որպես «ավտոպիլոտ»՝ ինքնաբուխ և չեք նկատում, թե իրականում ինչպես եք ձեր գործն անում կամ ինչ է շրջապատում տեղի ունենում։ Օրինակ, երբ դուք հեռուստացույցի դիմաց նստած ուտում եք մի ամբողջ տուփ չիփս, առաջին մի քանի հատիկից հետո կարող եք չզգալ մնացած չիփսերի համը։

Որոշ մարդիկ զգալի ժամանակ են ծախսում՝ մտածելով անցյալի դեպքերի մասին կամ անհանգստանալով ապագայով։ Այդպիսի մտքերը կարող են դժվարացնել ննջելը և առաջացնել անքնություն։

Գիտակցվածության 3 հմտություններ

Բազմաթիվ անհատներ և կազմակերպություններ առաջարկում են գիտակցվածության դասընթացներ: Սակայն դուք կարող եք ինքնուրույն հասնել գիտակցված լինելու վիճակին՝ մի քանի փոքր վարժություններով:

  1. Մեկ րոպեանոց շնչառական վարժություն . Նստեք ուղիղ մեջքով, սակայն՝ թուլացած: Հաջորդ րոպեի ընթացքում ձեր ամբողջ ուշադրությունը սևեռեք ներշնչումների և արտաշնչումների վրա: Ուշադրություն դարձրեք, թե ինչպես է օդը մուտք գործում կամ դուրս գալիս ձեր քթանցքներով, ինչպես է ամեն շնչելու հետ ձեր որովայնը բարձրանում և իջնում: Եթե ձեր մտքերը սկսում են իրար խառնվել և ձեր կենտրոնացմանը խանգարել, աստիճանաբար թողեք, որ դրանք հեռանան և կրկին կենտրոնացեք ձեր շնչառության վրա:
  2. Ստուգեք ինքներդ ձեզ. բերեք ձեզ ներկա պահ՝ հարցնելով ինքներդ ձեզ՝ «ի՞նչ է կատարվում ինձ հետ այս պահին»: Դուք կարող եք պիտակավորել ձեր մտքերը և զգացողությունները, օրինակ՝ «սա տագնապային զգացողություն է», և թողնել, որ այն հեռանա: Դուք կարող եք սկսել ձեզ ընկալել և զգալ ավելի շատ որպես դիտորդ, քան թե ինչ-որ մեկը, ով ռեակցիա է տալիս իր սեփական մտքերին և զգացողություններին:
  3. Սնունդ ընդունեք գիտակցված. ուտելիս կենտրոնացեք ձեր սնունդ ընդունելու պրոցեսի վրա: Հաց ուտելուն զուգահեռ մի կարդացեք կամ մի դիտեք հեռուստացույց: Ուշադրություն դարձրեք, թե ինչպիսի տեսք ունեն սննդամթերքները, ինչպիսի հոտ և ինչպիսի համ: Դուք կարող եք զգալ, որ սննդամթերքները դարձել են ավելի համեղ ու հաճելի և կարողանում եք դադարեցնել սնունդ ընդունելը, երբ արդեն հագեցած եք, այլ ոչ թե ավտոմատ կերպով դատարկում եք ձեր ափսեն:

Հոդվածը տեղադրվել է՝ 19-05-2019 վերանայվել է՝ 14-03-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը: