Ռադիոթերապիա - Բուժումներ

Ճառագայթային թերապիան կամ ռադիոթերապիան ռենտգենյան ճառագայթների օգտագործմամբ քաղցկեղի բուժման մեթոդներից մեկն է:

Բուժման այս մեթոդի էությունը բարձր էներգիայով ռենտգենյան ճառագայթների միջոցով քաղցկեղային բջիջները ոչնչացնելն է կամ դրանց արագացած աճն արգելակելը: Այն կարող է կիրառվել առանձին՝ որպես քաղցկեղի առաջնային բուժման մեթոդ, սակայն ավելի հաճախ զուգակցվում է քաղցկեղի բուժման այլ մեթոդների հետ:

Ճառագայթումը երբեմն կարող է բուժել քաղցկեղը, սակայն ավելի հաճախ նշանակվում է քաղցկեղային ախտահարման օջախը փոքրացնելու կամ կրճատելու, դրա աճը և տարածումը դանդաղեցնելու կամ դադարեցնելու նպատակով:

Ինչպե՞ս է ճառագայթումն ազդում

Ռենտգենյան ճառագայթները վնասում կամ ոչնչացնում են քաղցկեղային բջիջները՝ դրանով իսկ դադարեցնելով այդ բջիջների աճը: Դուք կարող եք ճառագայթում ստանալ հետևյալ մեթոդներից մեկնումեկով՝

• հեռահար կամ ճառագայթային թերապիա արտաքին փնջով, երբ բարձր էներգիայի ճառագայթման աղբյուրը (սարքը) օրգանիզմից դուրս է
• կոնտակտային, երբ ռադիոակտիվ իմպլանտը ներդրվում է անմիջապես ձեր օրգանիզմի ներսում՝ քաղցկեղային հյուսվածքներին մոտ
• ռադիոնուկլեիդային (ռադիոիզոտոպային), երբ կուլ եք տալիս կամ ներերակային ճանապարհով ստանում եք ռադիոակտիվ նյութ, որն օժտված լինելով թիրախային հյուսվածքների նկատմամբ ընտրողականությամբ, կլանվում է դրանց կողմից և տեղում՝ այդ հյուսվածքներում ապահովում իրենց իսկ ճառագայթումը:

Որո՞նք են ճառագայթային թերապիայի կողմնակի ազդեցությունները

Որոշ մարդկանց մոտ ճառագայթումն առաջացնում է տարբեր կողմնակի ազդեցություններ, օրինակ՝

• բերանի չորություն
• կոկորդի չորություն և ցավեր
• ճառագայթման ենթարկված մաշկի չորություն, կարմրություն և քոր կամ նույն շրջանի այտուց
• թուլություն և հոգնածություն
• սրտխառնոց կամ մարսողական խնդիրներ
• հազ, օդի պակասի զգացում և հևոց
• ախորժակի անկում
• մազաթափություն:

Այս անցանկալի նշանների մեծ մասը զարգանում է ճառագայթային թերապիան մեկնարկելուց մեկից երկու շաբաթ հետո, սակայն բուժումն ավարտելուց հետո աստիճանաբար մեղմանում է:

Սեռական օրգանների կամ դրանց հարող շրջանների ճառագայթային թերապիան ինչպես տղամարդկանց, այնպես էլ կանանց մոտ կարող է առաջացնել պտղաբերության հետ կապված խնդիրներ՝ ընդհուպ մինչև անդառնալի անպտղություն: Զրուցեք այս թեմայի շուրջ ձեր բժշկի հետ:

Որոշ դեպքերում ճառագայթումը վնասում է ոչ միայն քաղցկեղային, այլև առողջ հյուսվածքները: Սակայն, բուժումն ավարտելուց հետո առողջ հյուսվածքները սովորաբար աստիճանաբար վերականգնվում են: