Կան սինուսիտի ախտանիշները մեղմացնող որոշ միջոցներ, որոնք դուք կարող եք կիրառել տնային պայմաններում։
Սինուսիտը սովորաբար զարգանում է մրսածությունից (սուր շնչառական վիրուսային վարակ) և գրիպից հետո և ինքնուրույն լավանում է։ Տնային պայմաններում դուք կարող եք նպաստել սինուսիտի նշանների մեղմացմանը որոշ պարզ միջոցներով։
- Հակականգային դեղեր (դոկոնգեստանտներ). այս դեղամիջոցներն արտադրվում են հաբերի, քթային սփրեյի կամ կաթիլների ձևով։ Այս միջոցները կօգնեն, որ մեղմանա քթի լորձաթաղանթի այտուցը, թուլանա քթի փակվածությունը և վերականգնվի քթային արտահոսքը։ Սակայն հիշեք, որ հակականգային դեղերը չի կարելի օգտագործել երկար ժամանակ։ Մինչև դեղերի օգտագործելը ծանոթացեք դեղի պիտակին և խորհրդակցեք ձեր բժշկի հետ։
- Խմեք մեծ քանակությամբ հեղուկներ (ջուր). եթե ունեք ուղեկցող հիվանդություններ, ձեր բժշկից ճշտեք ջրի քանակները։
- Ժամանակ առ ժամանակ «փչելով» մաքրեք ձեր քիթը. ընդ որում, մաքրեք ոչ թե միաժամանակ երկու, այլ՝ առանձին-առանձին աջ ու ձախ քթանցքներով «փչելով»։
- Դեմքի ցավող շրջանում դրեք տաք կամ սառը թաշկինակ, նայած, թե որը ձեզ կօգնի։
- Ձեզ հանգիստ պահեք և խուսափեք ֆիզիակական գործերից, մինչև հիվանդության ախտանիշները կվերանան։
- Տան ջերմաստիճանը պահեք ոչ շատ տաք, ոչ էլ սառը վիճակում։
- Մի ծխեք և թույլ մի տվեք, որ ձեր բնակարանում ծխեն։
Այցելեք ձեր բժշկին եթե՝
- ձեր գանգատները ծանր են կամ գնալով ծանրանում են
- ձեր գանգատները 7-10 օրվա ընթացքում չեն մեղմանում
- ձեզ մոտ սինուսիտը հաճախ կրկնվում է։
Հոդվածը հրապարակվել է՝ 09-05-2018
Վերջին վերանայում՝ 22-04-2024