Սինուսիտ

Սինուսիտ
Անգլերեն անվանումը՝ Sinusitis

Սինուսիտը դեմքի ոսկրերի հաստության մեջ գտնվող խոռոչների՝ ծոցերի բորբոքային հիվանդություն է։

Այս հիվանդության մեջ ընդգրկվում են քթի հարակից խոռոչները։ Հիվանդությունը կարող է ներառել մեկ կամ մի քանի ծոցերը ինչպես մեկ, այնպես էլ երկու կողմերում։

Դեպքերի մեծ մասի ժամանակ 1-2 շաբաթվա ընթացքում սինուսիտի նշաններն ինքնուրույն նահանջում են, սակայն որոշ դեպքերում առաջանում է բուժման անհրաժեշություն։

Սինուսիտը հաճախ զարգանում է ՍՇՎՎ-ից և գրիպից հետո։ Որոշ դեպքերում սինուսիտի պատճառ կարող են դառնալ բակտերիային, այլ ոչ թե վիրուսային վարակները։

Սինուսիտի հիմնական ախտանիշներից են շուրջքթային և մերձճակատային շրջաններում ծանրության զգացումը կամ գլխի կտրուկ շարժումների ժամանակ առաջացող ցավը։

Այցելեք ձեր բժշկին եթե՝

  • ձեր գանգատները ծանր են կամ գնալով ծանրանում են
  • ձեր գանգատները 7-10 օրվա ընթացքում չեն մեղմանում
  • ձեզ մոտ սինուսիտը հաճախ կրկնվում է։

Սինուսիտների բուժմամբ սովորաբար զբաղվում են քիթ-կոկորդ-ականջաբանները (ЛОР)։

Բժիշկը ձեզ կարող է նշանակել սովորական ցավամոքիչ դեղեր, քթի աղային սփրեյներ կամ դեկոնգեստանտներ («քթի կանգը» մեղմացնող կաթիլներ), որոշ դեպքերում՝ նաև ստերոիդ կամ որևէ հակաբիոտիկ դեղի ինհալյացիա՝ ապահովելու քթի հարակից խոռոչների դրենաժը (դատարկվելը)։ Բակտերիային սինուսիտի ժամանակ ձեզ կարող են նշանակել նաև հակաբիոտիկներ։

Դուք ևս կարող եք նպաստել սինուսիտի բուժմանը՝ տնային պայմաններում դիմելով որոշ միջոցների։

Եթե ձեզ մոտ սինուսիտը հաճախ կրկնվում է, այն կարող է կապ ունենալ ձեր ալերգիկ վիճակի հետ։

Սուր սինուսիտը չբուժվելու դեպքում կարող է վերածվել քրոնիկի։