Կղանքի թեստ - Լաբորատոր թեստեր

Կղանքի թեստերն օգնում են, որ ստուգվի հաստ աղիների քաղցկեղը և որոնվի ստամոքս-աղիքային խանգարման հնարավոր պատճառը:

Կղանքի թեստի տեսակները

Կղանքի նմուշը հետազոտվում է լաբորատորիաներում: Կան տարբեր թեստեր՝ կախված դրանց նշանակման նպատակից: Այս հետազոտությունները նաև երբեմն անվանվում են ֆեկալ թեստեր:

Կղանքում թաքնված արյան թեստ

Կղանքում թաքնված արյան թեստը (FOBT) օգտագործվում է որպես առողջ մարդկանց մոտ հնարավոր հաստ աղիքի (կոլոռեկտալ) քաղցկեղի սքրինինգային հետազոտություն: Այս հետազոտության էությունը կղանքի մեջ արյան չնչին քանակների հայտնաբերումն է, որի դեպքում բժիշկը հավանաբար ձեզ կառաջարկի լրացուցիչ հետազոտություններ՝ պարզելու, թե արդյոք պատճառը հաստ աղու քաղցկեղն է կամ մեկ այլ հիվանդությունը:

Կղանքի մանրէաբանական հետազոտություն (ցանքս)

Այս հետազոտությունը թույլ է տալիս նույնականացնել որոշ ախտանիշների, օրինակ՝ փորլուծության հնարավոր պատճառ հանդիսացող բակտերիաները կամ մակաբույծները: Կղանքի ցանքսը թույլ է տալիս նաև հայտնաբերել Helicobacter pylori բակտերիան, որը կապված է ստամոքսի խոցի և ստամոքսի քաղցկեղի հետ:

Ինչպե՞ս հավաքել կղանքի նմուշը

Կղանքում թաքնված արյան թեստի համար կղանքի նմուշը կարելի է հեշտությամբ հավաքել տանը: Դուք նմուշառելու եք կանոնավոր աղիքային արտաթորանք, որը որևէ դժվարություն չի առաջացնում:

Սակայն, եթե պատրաստվում եք հանձնել ձեր կղանքը ցանքսի համար, պետք է առավելագույնս զգույշ լինել, որ վարակը չտարածվի: Սա նշանակում է, որ վերջում պետք է անպայման լվանալ ձեռքերը: Դուք պետք նաև համոզվեք, որ ձեր կղանքի նմուշը չի խառնվել մեզի հետ կամ չի դիպչել զուգարանի թղթին:

Միևնույն ժամանակ, հաշվի առեք, որ մանրէաբանական հետազոտության համար պիտանի է միայն ստերիլ ամանում (տարա) հավաքված կղանքը, որը պետք է հնարավորինս շտապ լաբորատորիա տեղափոխել փակ վիճակում: Եթե, այնուամենայնիվ, լաբորատորիա տեղափոխելն ուշացել է, տեղեկացրեք այդ մասին բժիշկ-լաբորանտին:

Ինչպե՞ս մեկնաբանել արդյունքները

Մոտավորապես 14 մարդուց 1-ի մոտ FOBT թեստը դրական է, այսինքն՝ կղանքում առկա է արյուն: Դրական արդյունքն անպայմանորեն չի նշանակում, որ դուք ունեք հաստ աղիքի քաղցկեղ: Այլ հիվանդությունները, ինչպիսիք են աղիքների պոլիպները, թութքը կամ բորբոքումը, նույնպես կարող են տալ դրական պատասխան:

Սակայն, եթե ձեր թեստը դրական է, բժիշկը կարող է խորհուրդ տալ այլ հետազոտություններ, օրինակ՝ կոլոնոսկոպիա:

Եթե FOBT թեստը մաքուր է, դա լավ է, սակայն չի նշանակում, որ դուք չեք կարող ապագայում ունենալ հաստ աղիքի քաղցկեղ: Ուստի 50-ն անց մարդկանց խորհուրդ է տրվում յուրաքանչյուր 2 տարին մեկ անցնել այս հետազոտությունը:

Եթե կղանքի մանրէաբանական հետազոտությամբ հայտնաբերվում է որևէ ախտածին բակտերիա կամ բակտերիալ հավասարակշռության խախտում, դիմեք ձեր բժշկին: Չի բացառվում, որ նա նշանակի որևէ բուժում կամ առաջարկի լրացուցիչ հետազոտություններ: