Կուլ տված օտար մարմին -

Ուտելու համար ոչ պիտանի առարկան կուլ տալը մանկահասակ տարիքի երեխաների շրջանում տարածված երևույթ է:

Որոշ դեպքերում այն կարող է պատճառել լուրջ բարդություններ և պահանջել անհետաձգելի բուժօգնություն:

Ի՞նչ է կուլ տված օտար մարմինը

Երեխաները սիրում են ամեն ինչ տանել դեպի իրենց բերանը: Կուլ տված փոքր ոչ թունավոր առարկաները կարող են անարգել անցնել մարսողական խողովակով և կղանքով դուրս գալ՝ առանց որևէ առողջական խնդիր առաջացնելու:

Այս առարկաները սովորաբար որևէ լուրջ խնդիր չեն առաջացնում՝

• փոքր կամ մանր քարեր կամ խճաքարեր
• մրգերի կորիզներ կամ սերմեր
• ինքնուրույն պոկված ատամներ:

Սակայն, որոշ առարկաներ կուլ տալուց հետո կարող են դառնալ խիստ վտանգավոր: Դրանցից են՝

• փոքր մարտկոցներ («կոճակ»)
• ավելի քան 6 սմ երկարության կամ 2,5 սմ լայնության մեծ առարկաներ
• մագնիս, հատկապես երկու և ավելի մագնիսներ
• կապարից պատրաստված առարկաներ:

Ե՞րբ է պետք զանգել 1-03 կամ շտապել անհետաձգելի բաժանմունք

Զանգեք 1-03 և կանչեք շտապ օգնություն, եթե օտար մարմին կուլ տված մարդը՝

• ունի ծանր շնչառական խնդիր՝ շնչահեղձություն, շնչարգելություն կամ հևոց
• անդադար հազում է
• շնչում է խզզոցներով կամ շնչելիս լսվում են սուլող աղմուկներ
• անընդհատ թքահոսում է
• կորցրել է գիտակցությունը
• կուլ է տվել փոքր փոքր մարտկոց:

Պետք է շտապ այցելել մոտակա անհետաձգելի բաժանմունք, եթե դուք կամ ձեր երեխան կուլ եք տվել մագնիսներ, մարտկոցներ կամ մեծ առարկաներ:

Սրածայր մարմինները (օրինակ՝ ատամփորիչներ կամ հավի կոտրված ոսկրեր) շատ հազվադեպ են կուլ տալուց անմիջապես հետո խնդիրներ առաջացնում: Առաջին օրերին կարող է որևէ գանգատ չլինել, սակայն մեկ կամ երկու օր անց ի հայտ գան մարսողական խողովակի ստորին հատվածների (ստամոքս կամ աղիքներ) վնասվածքի նշաններ: Եթե ձեր երեխան կուլ է տվել սրածայր կամ սուր եզրերով առարկա, տեղեկացրեք այդ մասին ձեր բժշկին կամ այցելեք մոտակա հիվանդանոց:

Ի՞նչ անել մինչև շտապ օգնության ժամանելը

Մի՛ փորձեք ուտել կամ խմել ինչ-որ բան, քանի դեռ չեք խոսել բժշկի հետ: Չի բացառվում, որ կուլ տված առարկան հեռացնելու անհրաժեշտություն առաջանա, որի դեպքում ձեր ստամոքսը պետք է դատարկ լինի:

Շատ կարևոր է նաև, որ երբեք չփորձեք ինքնուրույն փսխում առաջացնել, քանի որ սա փսխման ընթացում օտար մարմինը կարող է ձեր կամ երեխայի վերին շնչուղիների խցանման և շնչահեղձության պատճառ դառնալ:

Որո՞նք են օտար մարմին կուլ տալու ախտանիշները

Օտար մարմին կուլ տված երեխան հաճախ կարող է որևէ գանգատ կամ նշան չդրսևորել: Սակայն դուք կարող եք կասկածել, եթե նա դժվարությամբ է սնունդ կուլ տալիս, անընդհատ թքահոսում է կամ դրսևորում է պարանոցի կամ կրծքոսկրի շրջանում ցավերի կամ տարօրինակ զգացողությունների առկայության նշաններ:

Եթե օտար մարմինը կանգ է առել ստամոքսում, կարող են ի հայտ գալ շարունակվող փսխումներ, որովայնի վերջին շրջանի ցավեր, աղիքային արտաթորանքներում՝ արյուն կամ ջերմություն:

Եթե վնասվել է երեխայի մարսողական խողովակը, կարող եք նկատել թքի մեջ արյան հետքեր կամ կղանքի սևացում:

Օտար մարմինը կուլ տալու պատճառները

Դեպքերի գերակշռող մեծամասնության ժամանակ ուտելու համար ոչ պիտանի առարկան կամ իրը կարող է կուլ տրվել պատահականորեն: Օրինակ, ամեն ինչով հետաքրքրվող և բերանը տանող> մանկահասակ երեխան կարող է օտար մարմինը մտցնել իր բերանը՝ հասկանալու համը: Այս առումով ամենավտանգավոր տարիքը 6 ամսականից մինչև 4 տարեկանն է:

Որոշ մարդիկ ինքնակամ կարող են որևէ առարկա կուլ տալ, որ իրենք իրենց վնաս պատճառեն: Ինքնավնասման այսպիսի փորձը կամ արարքը պահանջում է հոգեկան առողջության ոլորտի մասնագետի խորհրդատվություն:

Ինչպե՞ս է կուլ տված օտար մարմինը հայտնաբերվում

Հիվանդանոցում բժիշկները կարող են հարցերի միջոցով նախնական պատկերացում կազմել, թե ինչ առարկա եք դուք կամ ձեր երեխան պատահաբար կուլ տվել: Եթե նրանք կարծում են, որ պատկերային հետազոտություններով կուլ տված մարմինը կերևակվի, նաև կարող են նշանակել ռենտգեն:

Ի՞նչ բուժում կարող է առաջարկվել կուլ տված օտար մարմնի ժամանակ

Եթե որևէ ցավ, շնչառության հետ կապված խնդիր չկա կամ երեխան ի վիճակի է ազատորեն ուտել կամ խմել, բժիշկը կարող է առաջարկել հետագա հսկողություն՝ առանց որևէ միջամտություն նախաձեռնելու: Եթե հիվանդանոցից դուրս գրվելուց հետո ի հայտ են գալիս գանգատներ, պետք է կրկնակի այցելել հիվանդանոց:

Սովորաբար օտար մարմինը կղանքով հեռանում է 4-6 օրվա ընթացքում, և այս ժամանաշրջանում դուք պետք է ուշադրություն դարձնեք ձեր կամ երեխայի աղիների գործունեությանը և մանրակրկիտ զննեք կղանքային արտաթորանքները՝ փորձելով գտնել կուլ տված առարկան: Եթե երկու շաբաթվա ընթացքում որևէ բան չեք գտնում, այցելեք ձեր բժշկին լրացուցիչ խորհուրդներ ստանալու համար: Իսկ եթե կուլ տված օտար մարմինը մրգի կորիզ կամ շատ փոքր ոչ սրածայր առարկա է, կղանքը զննելու կարիք չկա:

Այնուամենայնիվ, կուլ տված որոշ օտար մարմիններ կարող են հեռացվել միայն վիրահատական միջամտությամբ:

Ինչպե՞ս կանխարգելել օտար մարմնի կուլ տալը

Դուք կարող եք որոշակիորեն կանխարգելել ձեր մանկահասակ երեխայի կողմից որևէ առարկա կուլ տալը հետևյալ մեթոդներով՝

• սնունդ տալ միայն նստած վիճակում
• հիշեցնել և խրախուսել երեխային, որ նա սնունդը կուլ տա միայն լավ ծամելուց հետո
• մինչև 5 տարեկան երեխաների համար սնունդը մանրացնել փոքր կտրոների և խուսափել պինդ մրգերից և ընկուզեղենից
• փոքր առարկաներն ու իրերը պահել երեխայի տեսադաշտից և հասանելիությունից հեռու
• համոզվել, որ երեխայի խաղալիքները չեն կարող բաժանվել փոքր մասերի
• փոքր մարտկոցները պահել երեխայի տեսադաշտից և հասանելիությունից հեռու
• համոզվել, որ խաղալիքների և այլ սարքերի մարտկոցները չեն կարող հեշտությամբ բնիկից հանվել:

Բարդություններ

Երբեմն կուլ տված առարկաները կարող են «քարանալ» կերակրափողում՝ առանց տեշարժվելու դեպի ստամոքս: Փոքր մարտկոցները կարող են այրել կերակրափողի լորձաթաղանթը՝ առաջացնելով ծանր վնասում կամ մահ: