Առողջական խնդիրներ
Ամորձու այտուց և ցավոտություն
1 րոպե
Ամորձիները շատ զգայուն են, ուստի դրանց նույնիսկ թեթեև վնասվածքը կարող է մեծ ցավ և անհանգստություն պատճառել:
Ցավը կարող է ծագել հենց ամորձու ներսից կամ դրա ետին եզրին գտնվող խողովակաձև գոյացությունից (մակամորձի):
Երբեմն ամորձիների շրջանը կարող է ցավոտ դառնալ աճուկում, որովայնում կամ որևէ այլ շրջանում առկա խնդիրների պատճառով, օրինակ՝ երիկամային քարեր կամ ճողվածքներ: Սակայն միշտ չէ, որ ամորձու ցավի պատճառը կարելի է հեշտությամբ հայտնաբերել:
Ամորձիները (ձվեր) կարող են այտուցվել կամ ցավոտ դառնալ տարբեր պատճառներից, այդ թվում՝
- վնասվածք (օրինակ՝ հարված, սեղմվածություն և այլն)
- վարակ («խոզուկ» կամ այլ հիվանդություն)
- փոշտային ճողվածք
- ամորձու բորբոքում (օրխիտ)
- ամորձու ոլորում
- ամորձու ջրակալում (հիդրոցելե)
- սերմնալարի երակների լայնացում (վարիկոցելե)
- սպերմատոցելե
- մակամորձու բորբոքում (էպիդիդիմիտ)
- ամորձու քաղցկեղ
- շագանակագեղձի բորբոքում (պրոստատիտ)
- միզուղիների վարակներ
- ամորձու նյարդերի, զարկերակների կամ երակների հետ կապված խնդիրներ:
Եթե ցավն ուժեղ է կամ առաջացել է հանկարծակի, դուք պետք է շտապ այցելեք մոտակա վիրաբուժական կենտրոն:
Դուք պետք է նաև անհապաղ կապ հաստատեք ձեր բժշկի հետ, եթե ամորձիների ցավոտությունն ուղեկցվում է դող-սարսուռով, մարմնի բարձր ջերմաստիճանով կամ մեզում արյան հայտնվելով:
Եթե ցավերը չափավոր են կամ ցավերը բացակայում են, բայց դուք զգում եք ամորձիներից մեկնումեկի այտուցվածություն, միևնույն է, պետք է առանց ձգձգելու այցելեք ձեր բժշկին:
Ամորձիների մեղմ կամ չափավոր ցավերի կամ այտուցվածության նշանները մեղմացնելու համար մինչև բժշկին դիմելը դուք կարող եք նաև տանը ձեռնարկել որոշ միջոցառումներ, օրինակ՝ ընդունել սովորական ցավազրկող դեղեր (Իբուպրոֆեն, Ացետամինոֆեն և այլն):
Հոդվածը տեղադրվել է՝ 25-04-2018 վերանայվել է՝ 10-03-2021
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
