Ամորձիների այտուց և ցավոտություն. ինքնօգնություն

Ամորձիների մեղմից մինչև չափավոր այտուցը և ցավը կարող են որոշակիորեն մեղմացվել տնային պայմաններում:

Ամորձիները գերզգայուն օրգաններ են, ուստի դրանց այտուցվածությունը և ցավը կարող են մեծ անհանգստություն պատճառել:

Դուք կարող եք դիմել որոշ միջոցների, որ մեղմացնեք առկա գանգատները: Սակայն նկատի ունեցեք, որ եթե ցավն ուժեղ է կամ առաջացել է հանկարծակի, պետք է ոչ թե ձեռնարկել ստորև ներկայացվող միջոցները, այլ շտապ այցելել մոտակա վիրաբուժական կենտրոն:

Մինչև բժշկի հետ կապ հաստատելը, ամորձիների ցավը և այտուցվածության հետ կապված անհարմարությունը (դիսկոմֆորտ) մեղմացնելու համար կարող եք ձեռնարկել հետևյալ պարզ միջոցառումները՝

• պառկեք և ձեր ոտքերի միջև, փոշտի տակ դրեք փաթաթված սրբիչ կամ այլ փափուկ բան այնպես, որ փոշտը ստանա վեր բարձրացած դիրք
• եթե ցավերի պատճառը վնասվածքն է և կա փոշտի վերք, լվացեք վնասված շրջանը գոլ ջրով և ծածկեք մաքուր սավանով կամ, եթե վերքն արյունահոսում է, մատներով սեղմեք և մոտ 10 րոպե սեղմած պահեք արյունահոսող մասը
• ամորձու այտուցվածության դեպքում դիմեք սառեցնող միջոցների (սառցեպարկ, սառույցի կտորներ՝ փաթաթված բարակ մաքուր սրբիչով), որոնք փոշտի շրջանում պետք է թողնել առնվազն 20 րոպե և օրվա ընթացքում կրկնել 4 անգամ
• առնանդամը կամ փոշտը մի փաթաթեք որևէ վիրակապով (բինտ) կամ կպչուն սպեղանիով
• փոխեք ձեր անդրավարտիքը, շալվարը և կրեք ավելի ազատ և ոչ սեղմող հագուստ
• հաճախակի ստուգեք ձեր ամորձիները՝ տեսնելու թե արդյոք այտուցի շատացում չկա: