Հոգնածության բազմաթիվ դեպքեր պայմանավորված են սթրեսով, անբավարար քնով, վատ սննդակարգով և ապրելակերպի այլ գործոններով: Փորձեք այս խորհուրդները՝ ձեր կենսաուժի մակարդակը վերականգնելու համար:

Եթե զգում եք, որ հոգնածությունը դարձել է իրական խնդիր, որը չի վերանում հանգստի և քնելու միջոցով, ապա կարող եք ունենալ հիմքում ընկած որևէ առողջական խնդիր: Նման իրավիճակներում խորհրդատվության համար դիմեք ձեր ընտանեկան բժշկին:

Իմացե՛ք ավելին հոգնածության մասին:

Հաճախակի կերեք՝ հոգնածությունը հաղթահարելու համար

Օրվա ընթացքում ձեր էներգիան պահպանելու լավ միջոց է կանոնավոր կերպով՝ յուրաքանչյուր 3-4 ժամը մեկ, այլ ոչ թե ավելի հազվադեպ ճաշելը և առողջ նախուտեստներ ուտելը:

Շարժվեք

Դուք կարող եք սխալմամբ կարծել, որ ֆիզիկական վարժանքներին դիմելը վերջին բանն է, որ կարող է ձեր մտքով անցնել՝ հոգնածությունը հաղթահարելու գործում: Սակայն, իրականում, կանոնավոր վարժանքները երկարաժամկետ հեռանկարում թույլ են տալիս, որ ձեզ ավելի քիչ հոգնած զգաք, քանի որ ակտիվ կյանքը ձեզ ավելի շատ էներգիա է պարգևում:

Նույնիսկ մեկ 15 րոպեանոց զբոսանքը կարող է ձեզ էներգիա հաղորդել, իսկ օգուտներն աճում են ավելի հաճախակի ֆիզիկական ակտիվությամբ:

Սկսեք աստիճանաբար և հասեք ֆիզիկական ակտիվության ձեր նշակետին շաբաթների և ամիսների ընթացքում: Օրինակներից են հեծանիվ վարելը կամ արագ քայլքը:

Ազատվեք ավելորդ կիլոգրամներից՝ լրացուցիչ էներգիա ստանալու համար

Եթե ձեր մարմինը կրում է ավելորդ քաշ, այն կարող է հոգնեցնել: Ավելորդ քաշը նաև լրացուցիչ ծանրաբեռնում է ձեր սիրտը, ինչը կարող է ձեզ հոգնածություն պատճառել: Նիհարեք և ձեզ շատ ավելի եռանդուն կզգաք:

Առողջ սնվելուց բացի, նիհարելու և ձեր քաշն առողջ միջակայքում պահպանելու լավագույն միջոցը ֆիզիկապես ավելի ակտիվ լինելն է և ավելի շատ ֆիզիկական վարժանքներ կատարելը:

Քնեք լավ

Բազմաթիվ մարդիկ չեն քնում այնքան, որքան անհրաժեշտ է օրվա ընթացքում ակտիվ մնալու համար:

Բավարար քնելու մի քանի խորհուրդներից են՝

ամեն օր քնեք և առավոտյան վեր կացեք նույն ժամին
խուսափեք ցերեկային քնից կամ ննջելուց
անկողին մտնելուց առաջ ժամանակ հատկարեք ուղեղը և մարմինը թուլացնելու համար:

Կրճատեք սթրեսը ձեր կենսաուժը բարձրացնելու համար

Սթրեսը շատ էներգիա է պարպում։ Փորձեք ձեր առօրյայի մեջ ներառել թուլացնող (ռելաքսացիայի) պարզ մեթոդներ: Որոշ օրինակներից են՝

մարզասրահում մարզվելը
յոգա կամ թայ չի
երաժշտություն լսելը կամ ընթերցանությունը
ընկերների հետ ժամանակ անցկացնելը:

Բոլոր այն առողջ միջոցները, որոնք թուլացնում են ձեր մարմինն ու ուղեղը, բարելավում են ձեր ներքին էներգիան:

Խոսակցական թերապիան կարող է հաղթահարել հոգնածությունը

Որոշ տվյալներ կան այն մասին, որ խոսակցական թերապիաները, ինչպիսիք են խորհրդատվությունը կամ կոգնիտիվ վարքաբանական թերապիան, կարող են օգնել հոգնածության կամ սթրեսի, անհանգստության կամ ցածր տրամադրության հետևանքով առաջացած հոգնածությանը դիմագրավելուն:

Դիմեք այս հարցող ձեր բժշկին կամ նրա խորհրդով՝ հոգեթերապևտին:

Կրճատեք կոֆեինը

Կոֆեինը խթանիչ է, ինչը նշանակում է, որ այն ստիպում է ձեզ ավելի զգոն և ակտիվ զգալ: Բայց կոֆեինը նաև կարող է խախտել ձեր սովորական քնի ռիթմերը՝ հանգեցնելով քնի հետ կապված խնդիրների, որից հետո՝ ցերեկային հոգնածության:

Կոֆեինն առկա է հետևյալ արտադրանքներում՝

սուրճ
թեյ
գազավորված ըմպելիքներ
էներգետիկ ըմպելիքներ
որոշ ցավազրկողներ և բուսական միջոցներ:

Կոֆեինի ազդեցությունն օրգանիզմի վրա կարող է տևել մինչև 7 ժամ, ուստի կարող եք խուսափել կոֆեին պարունակող արտադրանքներից երեկոյան ժամերին, հատկապես, եթե ունեք քնելու հետ կապված խնդիրներ:

Նկատի ունեցեք նաև, որ կոֆեինը պետք է քչացնել աստիճանաբար, քանի որ կտրուկ դադարեցումը կարող է հանգեցնել անքնության և գլխացավերի:

Ավելի քիչ ալկոհոլ օգտագործեք

Թեև երեկոյան մի քանի բաժակ գինին կարող է օգնել, որ ավելի հեշտ քուն մտնեք, ալկոհոլ օգտագործելուց հետո դուք ավելի մակերեսային եք քնում: Հաջորդ օրը դուք հոգնած կլինեք, նույնիսկ եթե քնեք ամբողջ 8 ժամ։

Կրճատեք ալկոհոլի օգտագործումը քնելուց առաջ: Դուք ավելի լավ գիշերային հանգիստ կստանաք և ավելի շատ էներգիա կկուտակեք:

Տղամարդկանց և կանանց սովորաբար խորհուրդ է տրվում կանոնավոր կերպով չխմել ալկոհոլ շաբաթական 14 չափաբաժնից ավելի և փորձել շաբաթական մի քանի օր ընդհանրապես ալկոհոլ չօգտագործել: