Առողջական խնդիրներ
Մեզի թեստ
2 րոպե
Մեզի թեստն ընդհանուր առողջական վիճակը գնահատող, ինչպես նաև որոշ հիվանդությունների ախտորոշմանն օգնող ոչ թանկարժեք ախտորոշիչ թեստ է:
Այն նաև ինչպես երեխաների, այնպես էլ չափահաս մարդկանց շրջանում ամենահաճախ նշանակվող լաբորատոր թեստն է:
Ինչո՞ւ է մեզի թեստը նշանակվում
Մեզի նմուշը կարող է հետազոտվել տարբեր նպատակներով: Ավելի հաճախ մեզի թեստ նշանակվում է հետևյալ խնդիրները լուծելու համար՝
- կնոջ հղիության հաստատում կամ ժխտում (հղիության թեստ)
- տարբեր, հատկապես՝ միզուղիների վարակները վարակների ախտորոշում
- մի շարք հիվանդությունների ախտորոշում կամ վերահսկում, օրինակ՝ շաքարային դիաբետ (շաքարախտ), միզապարկի քաղցկեղ կամ սեռական ճանապարհով փոխանցվող վարակներ
- երիկամների գործունեության ստուգում
- մեզում արյան կամ արյան կարմիր բջիջների (էրիթրոցիտների) հայտնաբերում
- թմրամիջոցների օգտագործման հաստատում կամ վերահսկում:
Ինչպե՞ս է պետք վերցնել մեզի նմուշը
Անալիզի պատասխանի ճշտությունը բարձրացնելու համար խիստ կարևոր է, որ մեզի նմուշը չաղտոտվի այլ նյութերով և միջավայրերով: Այս նպատակով՝
- մինչև մեզի նմուշը վերցնելը լվացեք և լավ չորացրեք ձեր սեռական օրգանները
- մեզը հավաքելիս մեզի փորձանոթը մի հպեք ձեր սեռական օրգաններին
- եթե բժիշկն այլ հրահանգ չի տվել, հավաքեք միայն առավոտյան առաջին մեզի միջին չափաբաժինները (ոչ միզարձակության սկզբում, ոչ էլ ավարտից առաջ հոսած մեզը)
- ձեր բժշկին տեղեկացրեք անալիզը հանձնելուց ոչ շատ առաջ ընդունած բոլոր այն դեղամիջոցների մասին, որոնք կարող են ազդել թեստի արդյունքների վրա
- թեստի նախորդ օրը խուսափեք մեզի գույնը և թթվայնությունը փոփոխող սննդի ընդունումից (օրինակ՝ գունավոր բանջարեղեններ)
- թեստի նախորդ օրվանից սկսած մի՛ ընդունեք ալկոհոլային խմիչքներ
- մեզը հավաքելուց հետո ամուր փակեք տարայի կափարիչը՝ պիտակի վրա գրելով ձեր անունը-ազգանունը և նմուշառման ամսաթիվն ու ժամը
- հավաքած մեզով տարան առանց ուշացնելու տեղափոխեք լաբորատորիա կամ, հակառակ դեպքում, եթե կարող եք լաբորատորիա այցելել մի քանի ժամվա ընթացքում, պահեք այն սառնարանում (ոչ սառցարանում):
Ձեր բժիշկը նաև կարող է նշանակել 24-ժամյա մեզի հետազոտություն: Նման հետազոտությունները սովորաբար օգնում են ձեր բժշկին, որ գնահատի ձեր երիկամների գործունեությունը: 24 ժամվա ընթացքում ձեր հավաքած մեզը պետք է պահել սառնարանային պայմաններում՝ գրանցելով նաև միզարձակության ժամերը, իսկ որոշ դեպքերում՝ նաև յուրաքանչյուր միզարձակման մոտավոր ծավալը:
Ի՞նչ է մեզի ստրիպը
Մեզի ստրիպը մեզի որոշ ցուցանիշներն անմիջապես ցույց տվող ձողիկ է: Այն չի համարվում ճշգրիտ հետազոտություն, այլ մոտավոր պատկերացում է տալիս մեզի որոշ ցուցանիշների մասին (օրինակ՝ մեզում սպիտակուցներ, էրիթրոցիտներ, լեյկոցիտներ, բիլիռուբին, կետոններ և այլն):
Սեռավարակների համար հանձնվող մեզի թեստ
Մեզը կարող է հետազոտվել նաև բակտերիալ ծագման որոշ սեռավարակներ հայտնաբերելու նպատակով: Օրինակ, մեզի մանրադիտակային կամ մանրէաբանական հետազոտությամբ կարող են հայտնաբերվել քլամիդիան և գոնորեան:
Հոդվածը տեղադրվել է՝ 13-04-2018 վերանայվել է՝ 18-03-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
