Քաշի ավելացումը հղիության ընթացքում -

Դեռևս չծնված ձեր երեխայի աճին զուգահեռ ձեր մարմնի քաշն աստիճանաբար ավելանում է:

Ձեր քաշի ավելացման չափը մեծապես կախված է նրանից, թե ինչքան է եղել ձեր մարմնի զանգվածը մինչև հղիությունը:

Կանանց մեծ մասի քաշը հղիության ընթացքում ավելանում է 11,5-16 կիլոգրամով: Քաշի ավելացման վրա հիմնականում ազդում են այս գործոնները՝

• ձեր քաշը մինչև հղիությունը. եթե այն եղել է նորմայից ցածր (պակաս քաշ), հղիության ընթացքում դուք հավանաբար կհավաքեք ավելի շատ կիլոգրամներ, իսկ եթե նորմայից բարձր (ավելորդ քաշ)՝ ավելի քիչ
• պտուղների թիվ. բնական է, որ բազմապտուղ հղիությունը կբերի ձեր քաշի ավելի շատ մեծացման
• առավոտյան սրտխառնոցի առկայություն, որը կարող է բերել թերսնման և քաշի նվազեցման:

Կարևոր է, որ հղիության ընթացքում դուք սնվեք լավ. դրանով դուք ձեր երեխային տալիս եք առողջ մեկնարկի հնարավորություն: Սակայն դա չի նշանակում, որ դուք պետք է սնվեք «երկուսի փոխարեն», ինչպես կարող են սխալմամբ ձեզ խորհուրդ տալ, այլ ձեր սննդակարգը դարձնեք առողջ, որն ապահովում է պահանջվող սննդանյութերի բավարար քանակներ:

Հարցերք ձեր բժշկին, թե մարմնի որ քաշն է ձեզ համար լավագույնը:

Ինչո՞ւ է իմ քաշն ավելանում

Հղիության ընթացքում ձեր քաշն ավելանում է ոչ միայն չծնված երեխայի զանգվածի հաշվին: Հղիությունը բերում է ձեր մարմնի համապատասխան փոփոխությունների, այդ թվում՝ հավելյալ հյուսվածքների և օրգանների առաջացման, ինչպիսիք են ընկերքը, լրացուցիչ արյունը և այլ կենսահեղուկները:

Կա՞ արդյոք մարմնի «նորմալ քաշ»

Կանանց մեծ մասի մոտ հղիության ընթացքում քաշի ավելացման չափը կապված է մինչև հղիանալը մարմնի զանգվածի գործակցի հետ (ՄԶԳ կամ անգլերեն՝ BMI): ՄԶԾ-ի հաշվարկման բանաձևը հետևյալն է՝

Մինչև հղիությունը ձեր մարմնի կշիռ (կիլոգրամներով)՝ բաժանած ձեր հասակի (մետրերով) քառակուսու վրա:

Օրինակ, եթե մինչև հղիանալը ձեր քաշը եղել է 68 կգ և հասակը՝ 170 սմ (1,7 մետր), ապա ձեր ՄԶՑ-ի հաշվարկը կլինի՝ 68 /(1,7 x 1,7)= 23,5:

Դուք կարող եք օգտագործել Մեդեքսի ՄԶՑ առցանց հաշվիչը՝ տեղեկանալու մինչև հղիությունը ձեր ՄԶՑ մասին:

Եթե մինչև հղիանալը ձեր կշիռը եղել է առողջ, այն է՝ ընկել է ՄԶԳ-ի (18,5-24,9) միջակայքում, ապա հղիության վերջում ձեր քաշը պետք է լավագույն տարբերակում ավելանա սկսած 11,5-ից մինչև 16 կիլոգրամ, որից 1,5 կիլոգրամը՝ առաջին երեք ամիսների ընթացքում, որից հետո յուրաքանչյուր ամիս՝ 1,5-2-ական կգ-ով՝ մինչև երեխայի ծնվելը:

Եթե մինչև հղիանալը դուք ունեցել եք ավելորդ քաշ (ՄԶԳ ≥ 25), հղիության ընթացքում ձեր քաշն ավելի քիչ կավելանա, իսկ պակաս քաշի դեպքում (ՄԶԳ < 18,5)` շատ կավելանա:

Մարմնի քաշի կառավարում

Դուք կարող եք ձեր մարմնի քաշն առողջ միջակայքում պահելու գործում օգնել ինքներդ ձեզ հետևյալ տարբերակներով՝

• պահպանեք առողջ սննդակարգ, որը ներառում է թարմ մրգեր և բանջարեղեններ, չթեփազերծված հացամթերքներ և ձավարեղեն, լոբեղեն, անճարպ միս, ձկնեղեն և ցածր յուղայնության կաթնամթերք
• եղեք ֆիզիկապես ակտիվ կամ կանոնավոր զբաղվեք չափավոր ծանրաբեռնվածության վարժանքներով
• խուսափեք ճարպոտ (յուղոտ) և քաղցր մթերքներից և ըմպելիքներից:

Համոզվեք, որ դուք գիտեք, թե հղիության ընթացքում որ սննդամթերքներն են անվտանգ: Զրուցեք այս մասին ձեր բժշկի հետ:

Դուք հավանաբար կնկատեք, որ հղիության առաջին երեք ամսվա ընթացքում չեք զգում խիստ ավելացված կիլոկալորիաներ ստանալու պահանջ (ախորժակ): Պտղի աճին զուգահեռ, երկրորդ և երրորդ եռամսյակներին օրվա մեջ 1400-1900 կիլոջոուլ (335-455 կիլոկալորիա) սննդային էներգիայի ավելացումը բավարար է, որ ձեր հավելյալ քաշը լինի նորմալ միջակայքում: Լավագույն տարբերակն այն է, որ լրացուցիչ կիլոկալորիաներ ստանաք գերազանցապես առողջ սննդամթերքի միջոցով:

Դուք նաև պետք է համոզվեք, որ ձեր սննդակարգը պարունակում է բոլոր այն սննդանյութերը, որոնք ապահովում են ձեր և ձեր չծնված երեխային առողջությունը, ինչպիսիք են՝ ֆոլաթթու, երկաթ, կալցիում, յոդ և պրոտեին (սպիտակուց):

Բավարար չափով հեղուկներ խմելը նույնպես կարևոր է: Խորհուրդ է տվում օրական խմել մոտ 2 լ ջուր: Առավոտյան սրտխառնոցը կարող է ջրազրկել ձեզ, ուստի զրուցեք ձեր բժշկի հետ, եթե չեք կարողանում ստանալ (կամ խմելուց հետո՝ «պահել») բավարար քանակով ջուր:

Քանի դեռ բժիշկը ձեզ որևէ այլ բան խորհուրդ չի տվել, դուք կարող եք հղի վիճակում սկսել կամ շարունակել կանոնավոր վարժանքները՝ ձեր ծանրաբեռնվածությունը համապատասխանեցնելով հղիության փուլի հետ: Ամեն օր շուրջ 30 րոպե զբոսանքը, լողը կամ հղիության վարժանքի դասերը կարող են օգնել, որ պահպանեք մարմնի առողջ քաշ: Հիշեք, որ չի կարելի 20 րոպեից ավել զբաղվել արագ, կտրուկ շարժումներ կամ մկանների գերլարվածություն պահանջող վարժանքներով, որ խուսափեք մարմնի գերտաքացումից:

Խորհուրդ տրվող մարմնի քաշը գերազանցող կամ պակաս քաշ ունենալը կարող են առաջացնել առողջական խնդիրներ ինչպես ձեր, այնպես էլ երեխայի վրա, օրինակ, կարող են բարձրացնել գեստացիոն (հղիների) դիաբետի զարգացման ռիսկը: Նման դեպքերում զրուցեք ձեր բժշկի, բժիշկ-մանկաբարձի կամ նրանց խորհրդով՝ այլ մասնագետների հետ (դիետոլոգ, ներզատաբան և այլն):