Հիմնային ֆոսֆատազ - Ֆերմենտներ

Միջազգային անվանում (հապավում). Alkaline Phosphatase (ALP)

Նկարագրություն

Հիմնային կամ ալկալինային ֆոսֆատազը (ALP) ֆերմենտ է, որը մասնակցում է ֆոսֆորական թթվի փոխանակման ռեակցիաներին, pH-ի 8,6-10,1 օպտիմալ արժեքների դեպքում։

ALP-ն կատալիզացնում է ֆոսֆորական թթվի բարդ եթերների և օրգանական միացությունների հիդրոլիզը: ALP-ի ամենաբարձր քանակները հայտնաբերվում են ոսկրային հյուսվածքներում (օստեոբլաստներ), հեպատոցիտներում, երիկամային խողովակիկների բջիջներում, աղիների լորձաթաղանթներում և ընկերքում:

ALP-ն մասնակցում է ոսկրերի աճի հետ կապված գործընթացներում, ուստի երեխաների մոտ այս ֆերմենտի շիճուկային մակարդակն ավելի բարձր է, քան չափահասների մոտ:

Արյան շիճուկում ALP-ի ակտիվության ախտաբանական բարձրացումը հիմնականում կապված է ոսկրային (ոսկրային հյուսվածքի ձևավորում) և լյարդային (լեղուղիների խցանում) հիվանդությունների հետ: Անհաս նորածինների, ակտիվ աճի փուլում գտնվող երեխաների, հղիների (վերջին եռամսյակ) մոտ կարող է գրանցվել ALP-ի մակարդակի ֆիզիոլոգիական բարձրացում:

Ցուցումներ

• ոսկրային հյուսվածքի հիվանդություններ՝ օստեոդիստրոֆիաներ, ոսկրային հյուսվածքի առաջնային ուռուցքներ և մետաստազներ
• լյարդի և լեղուղիների օբստրուկտիվ հիվանդություններ
• լյարդի առաջնային քաղցկեղ
• վարակային մոնոնուկլեոզ (հիվանդության առաջին շաբաթը)

Կենսանմուշ

ALP թեսթի համար հանձնվող կենսանմուշն է՝ երակային արյուն։

Կենսանմուշի հանձնում

Արյունը պետք է հանձնել առավոտյան ժամերին, ժամը 8-11-ի սահմաններում, քաղցած վիճակում (ցանկալի է սննդի վերջին ընդունումը ոչ պակաս, քան 8 ժամ և ոչ ավելի, քան 14 ժամ առաջ): Ջրի ընդունումը՝ սովորական ռեժիմով: Նախորդ օրը խուսափել սննդային ծանրաբեռնվածությունից:

Չափման միավորներ

Միջազգային չափման միավոր (SI համակարգ)

Մ/լ (միավոր/լիտր)

Այլընտրանքային չափման միավոր

μkat/L

Միավորների փոխակերպում

U/L x 0,0167 = μkat/L

Նորմալ (ռեֆերենս) միջակայքեր

Համընդհանուր օգտագործման միջակայքեր (SI համակարգ)

• Չափահաս տղամարդիկ՝ (40-130) Մ/լ
• Չափահաս կանայք՝ (35-105) Մ/լ

Այլընտրանքային միջակայքեր

Արդյունքների մեկնաբանություն

ALP-ի մակարդակի (ակտիվության) բարձրացում

• ոսկրային հյուսվածքի ախտահարումներ (օստեոբլաստների ակտիվության բարձրացմամբ կամ ոսկրային հյուսվածքի քայքայմամբ)՝ Պեջետի հիվանդություն (դեֆորմացնող օստեիտ), օստեոմալյացիա, Գոշեի հիվանդություն՝ ոսկրերի ռեզորբցիայով
• առաջնային կամ երկրորդային հիպերպարաթիրեոզ
• ռախիտ
• կոտրվածքների կպման շրջան
• օստեոսարկոմաներ և ոսկրային մետաստազներ
• լյարդային հիվանդություն (ցիռոզ, լյարդային հյուսվածքի նեկրոզ, առաջնային հեպատոկարցինոմաներ, լյարդի մետաստատիկ քաղցկեղ, ինֆեկցիոն, տոքսիկ, դեղորայքային հեպատիտներ, սարկոիդոզ, տուբերկուլոզ, պարազիտար ախտահարումներ
• ներ- և արտալյարդային խոլեսթազ (խոլանգիտներ, լեղաքարային հիվանդություններ, լեղուղիների ուռուցքներ)
• սնուցման խանգարումներ (սննդում կալցիումի և ֆոսֆորի դեֆիցիտ)
• երեխաների մոտ՝ ցիտոմեգալիա
• վարակային մոնոնուկլեոզ
• թոքերի, երիկամների ինֆարկտ
• ֆիզիոլոգիական (անհաս նորածիններ, արագ աճման փուլում երեխաներ, կանանց մոտ հղիության վերջին եռամսյակ, դաշտանադադարից հետ)
• հեպատոտոքսիկ դեղերի ընդունում՝ Մետոտրեքսատ, Քլորպրոմազին, լայն սպեկտրի ազդեցության հակաբիոտիկներ, սուլֆանիլամիդներ, վիտամին C-ի և մագնեզիումի մեծ դեղաչափեր

ALP-ի մակարդակի (ակտիվության) նվազեցում

• ժառանգական հիպոֆոսֆատազեմիա (ռեցեսիվ աուտոսոմալ հիվանդություններ, որոնք բնութագրվում են ոսկրի կալցիֆիկացիայի խանգարմամբ, կալցիումի և ֆոսֆորի մակարդակներն այս ժամանակ շիճուկում նորմալ են, բայց հիմնային ֆոսֆատազի շիճուկային ակտիվությունը խիստ ընկած է)
• ոսկրային աճի խանգարումներ (ախոնդրոպլազիա, կրետինիզմ, վիտամին C-ի դեֆիցիտ)
• թերակտիվ վահանաձև գեղձ (հիպոթիրեոզ)
• կվաշիորկոր
• սննդակարգում ցինկի և մագնեզիումի պակաս (դեֆիցիտ)
• որոշ դեղերի ընդունում՝ էստրոգեններ, բերանային (օրալ) հակաբեղմնավորիչներ, Դանազոլ, Ազաթիրպրին, Կլոֆիբրատ