Ալանինամինոտրանսֆերազ - Ֆերմենտներ

Միջազգային անվանում (հապավում). Alanine Aminotransferase (ALT)

Նկարագրություն

Ալանին ամինոտրանսֆերազը (ALT) ներբջջային ֆերմենտ է, որը մասնակցում է ամինաթթուների փոխանակությանը:

ALT-б կատալիզացնում է ալանին ամինախմբի տեղափոխումը ալֆա-կետոգլուտարաթթվի վրա, որի արդյունքում առաջանում են պիրոխաղողաթթու և գլուտամինաթթու: Վերաամինավորումն իրականանում է պիրիդոքսալֆոսֆատ կոֆերմենտի ազդեցությամբ, որը հանդիսանում է վիտամին B6-ի ածանցյալը:

ALT-ի ամենամեծ ակտիվությունը հայտնաբերվում է լյարդում ու երիկամներում, իսկ ամենափոքրը՝ ենթաստամոքսային գեղձում, սրտամկանում և կմախքային մկաններում: Ֆերմենտը քիչ ավելի ակտիվ է տղամարդկանց մոտ:

ALT-ն ներբջջային ֆերմենտ է, և առողջ մարդկանց արյան շիճուկում դրա ակտիվությունը բարձր չէ: Սակայն, ALT-ով հարուստ բջիջների վնասման կամ քայքայման դեպքում (լյարդ, սրտամկան, կմախքային մկաններ, երիկամներ) ֆերմենտը դուրս է գալիս արյան հուն:

Վիրուսային հեպատիտների ժամանակ ALT-ի ակտիվության բարձրացման աստիճանը, որպես կանոն, համընկնում է հիվանդության ծանրության աստիճանին: Սուր դեպքերում ֆերմենտի ակտիվությունը կարող է գերազանցել նորմալ արժեքները 5-10 և ավելի անգամ: Ըստ որում, ֆերմենտի ակտիվությունը բարձրանում է դեռևս վաղ՝ նախադեղնուկային փուլում: Ի լրումն, ALT-ի մակարդակի աճ գրանցվում է նաև հիվանդության ոչ դեղնուկային ձևերի ընթացքում: Դինամիկայում, հիվանդության բարենպաստ ընթացքի ժամանակ ALT-ի ակտիվությունը դանդաղորեն նվազում և վերադառնում է նորմալ արժեքներին մի քանի շաբաթվա ընթացքում: Սակայն ALT-ի ակտիվության կտրուկ նվազեցումը հիպերբիլիռուբինեմիայի աճող նշանների հետ միասին կարող են վկայել անբարենպաստ ընթացքի մասին:

ALT-ի մակարդակի բարձրացում դիտվում է նաև սրտամկանի ինֆարկտի ժամանակ: Միաժամանակ երկու ամինոտրանսֆերազների՝ ALT-ի և ասպարտատ ամինոտրանսֆերազի (AST) որոշումը կարող է ստանալ կարևոր ախտորոշիչ նշանակություն:

Նորմայում ALT/AST հարաբերակցությունը (դե Ռիտիսի գործակից) կազմում է 1,33±0,42: Վիրուսային հեպատիտների ժամանակ այս գործակիցը նվազում է, իսկ սրտամկանի ինֆարկտի դեպքում՝ կտրուկ աճում:

Ցուցումներ

• լյարդային հիվանդության ախտորոշում և տարբերակիչ ախտորոշում
• հեպատիտի ոչ դեղնուկային ձևերի ախտորոշում
• դոնորների թեստավորում
• վիրուսային հեպատիտի օջախում կոնտակտավորների հետազոտություն
• սրտամկանի ախտահարում
• կմախքային մկանային հիվանդություն

Կենսանմուշ

ALT թեսթի համար հանձնվող կենսանմուշն է՝ երակային արյուն։

Կենսանմուշի հանձնում

Արյունը պետք է հանձնել առավոտյան ժամերին, ժամը 8-11-ի սահմաններում, քաղցած վիճակում (ցանկալի է սննդի վերջին ընդունումը ոչ պակաս, քան 8 ժամ և ոչ ավելի, քան 14 ժամ առաջ): Ջրի ընդունումը՝ սովորական ռեժիմով: Նախորդ օրը պետք է խուսափել սննդային ծանրաբեռնվածությունից:

Չափման միավորներ

Միջազգային չափման միավոր (SI համակարգ)

Մ/լ (միավոր/լ)

Նորմալ (ռեֆերենս) միջակայքեր

Համընդհանուր օգտագործվող միջակայքեր

• տղամարդիկ (չափահասներ, առանց PYP ակտիվացման)՝ < 41 Մ/լ
• կանայք (չափահասներ, առանց PYP ակտիվացման)՝ < 33 Մ/լ

Այլընտրանքային միջակայքեր

Արդյունքների մեկնաբանություն

ALT-ի մակարդակի (ակտիվության) բարձրացում

• ցանկացած ծագման լյարդային բջիջների մեռուկացում (վիրուսային հեպատիտներ, լյարդի տոքսիկ ախտահարում և այլն)
• շոկ (շոկային լյարդ)
• սրտային անբավարարություն
• կմախքային մկանների տարածուն վնասվածք և նեկրոզ
• լյարդի ցիռոզ
• խոլեստատիկ և մեխանիկական դեղնուկ
• լյարդի քաղցկեղ (առաջնային և մետաստատիկ)
• սրտամկանի ինֆարկտ
• միոկարդիտ, միոկարդիոդիստրոֆիաներ
• միոզիտ
• ճարպային հեպատոզ
• քրոնիկ ալկոհոլիզմ
• արտահայտված պանկրեատիտ
• ծանր այրվածքներ
• կարնիտինի առաջնային դեֆիցիտ
• հեպատոտոքսիկ դեղերով բուժում (հոգեմետ նյութեր, անաբոլիկ ստերոիդներ, հակաբեղմնավորիչներ, սալիցիլատներ, սուլֆանիլամիդներ, հակաբիոտիկներ, իմունոդեպրեսանտներ, հակաուռուցքային դեղեր, քիմիոթերապիայի և ընդհ. անզգայացման դեղեր)
• ծանր այրվածքներ

ALT-իմակարդակի (ակտիվության) նվազեցում

• լյարդի ծանր ախտահարում՝ տարածուն նեկրոզ, ցիռոզ (երբ ALT սինթեզող բջջիջների քանակը կտրուկ նվազում է)
• պիրիդօքսալֆոստատի (վիտամին В6) դեֆիցիտ