Միջազգային անվանում (հապավում). Apolipoprotein В (ApoB)
Նկարագրություն
Ապոլիպոպրոտիեն В-ն (АpoB) համարվում է աթերոսկլերոզի ռիսկի մարկեր:
Ապոլիպոպրոտիեն В-ն հանդիսանում է բոլոր լիպոպրոտեիդների հիմնական սպիտակուցը, բացառությամբ բարձր խտության լիպոպրոտեիդների (HDL): Սա նշանակում է, որ АpoB-ն կարող է արտացոլել աթերոսկլերոզի զարգացման ռիսկը:
Մարդու մոտ տարբերում են АpoB-ի երկու տեսակ: Ամենատարածված տեսակը АpoB-100-ն է, որը սինթեզվում է լյարդում և հայտնաբերվում լիպոպրոտեիդներում: АpoB-48-ն, ինչպես ենթադրվում է, արտադրվում է աղիներում: АpoB-ի արտադրությունը և խիլոմիկրոնների ու խիստ ցածր խտության լիպոպրոտեիդների (VLDL) կազմության մեջ մտնելը կարևոր են այս մասնիկների ձևավորման և արյան շրջանառության հուն մտնելու համար, ինչը բարձրացնում է խոլեսթերինի լուծելիությունը և զարկերակների պատին վերջինիս կուտակվելը:
Դրանից բացի, АpoB-ն գլխավոր դերակատարությունն ունի գրեթե բոլոր բջիջների (բացառությամբ նյարդային բջիջների և էրիթրոցիտների) թաղանթների հատուկ ընկալիչների կողմից ցածր խտության լիպոպրոտեիդների (LDL) խոլեսթերինի ճանաչման և կապման գործընթացում:
Ըստ բազմաթիվ հետազոտությունների տվյալների, АpoB-ն համարվում է սրտի պսակային զարկերակների աթերոսկլերոզի ռիսկի գնահատման ավելի լավ մարկեր, քան LDL-խոլեսթերինը: АpoB-ի մակարդակի շեղումը թույլ է տալիս հայտնաբերել սրտանոթային հիվանդությունների նկատմամբ բարձրռիսկային այն մարդկանց, ում մոտ գրանցվել է HDL-խոլեսթերինի նորմալ ցուցանիշներ:
Սրտանոթային ռիսկի գնահատման համար նաև կիրառվում է АpoB/АpoА1 հարաբերակցությունը: Այս գործակցի տղամարդկանց մոտ > 0,9 և կանանց մոտ > 0,8 արդյունքները կարող են վկայել պսակային զարկերակների աթերոսկլերոզի ռիսկի մասին:
Լաբորատոր բաժնի հովանավոր
Այցելեք Յունիմեդ բժշկական կենտրոն ճշտգրիտ ախտորոշում ստանալու համար:
Ցուցումներ
- սրտի պսակային զարկերակների աթերոսկլերոզի ռիսկի գնահատում
- լիպիդային փոխանակության ժառանգական խանգարումների ախտորոշում
Կենսանմուշ
ApoB թեսթի համար հանձնվող կենսանմուշն է՝ երակային արյուն։
Կենսանմուշի հանձնում
Կենսանմուշը պետք է հանձնել քաղցած վիճակում՝ սննդի վերջին ընդունումից առնվազն 8-14 ժամ հետո: Հետազոտության նախորդ օրը պետք է բացառել հոգեհուզական և ֆիզիկական ծանրաբեռվածությունները (օրինակ՝ մարզական վարժանքներ և այլն) և ալկոհոլի ընդունումը:
Լրացուցիչ տեղեկատվություն և օգնություն
Չափման միավորներ
Միջազգային չափման միավոր (SI համակարգ)
գ/լ (գրամ/լիտր)
Նորմալ (ռեֆերենս) միջակայքեր
| Տարիք | Սեռ, ApoB գ/լ |
|---|---|
| 0 - 12 ամս. | Արական՝ 0,16 – 1,24 |
| Իգական՝ 0,17 – 1,20 | |
| 12 ամս. - 12 տ. | Արական՝ 0,48 – 1,25 |
| Իգական՝ 0,51 – 1,26 | |
| 12 - 60 տ. | Արական՝ 0,49 –1,73 |
| Իգական՝ 0,53 – 1,82 | |
| > 60 տ. | Արական՝ 0,54 – 1,63 |
| Իգական՝ 0,64 – 1,82 |
Արդյունքների մեկնաբանություն
АpoB-ի մակարդակի բարձրացում
- աթերոսկլերոզ
- կրծքահեղձուկ (ստենոկարդիա), սրտամկանի ինֆարկտ
- շաքարային դիաբետ
- հիպոթիրեոզ
- նեֆրոտիկ համախտանիշ
- քրոնիկ երիկամային անբավարարություն
- լյարդային հիվանդություն
- Քուշինգի համախտանիշ
- հիպեր-ապո-բետա-լիպոպրոտեինեմիա (նորմալ ԲԽԼ և բարձր АpoB)
- ժառանգական համակցված հիպերխոլեսթերինեմիա
- ժառանգական հիպերխոլեսթերինեմիա
- АpoB-100 ժառանգական դեֆեկտ
- պոլիգեն (սպորադիկ) հիպոխոլեսթերինեմիա
- հղիություն
АpoB-ի մակարդակի նվազեցում
- ա-բետա-լիպոպրոտեինեմիա կամ հիպո-բետա-լիպոպրոտեինեմիա
- թիրեոտոքսիկոզ
- աղիների ներծծման գործունեության խանգարում
- վարակներ և բորբոքումներ
- քրոնիկ անեմիա
- դեկոմպենսացված շաքարային դիաբետ
- ծանր այրվածքներ
Վարվեք այս կերպ
Լաբորատոր թեստի արդյունքների մեկնաբանումը վստահեք ձեր բժշկին: Նա ձեզ կբացատրի յուրաքանչյուր ցուցանիշը և դրա շեղման հնարավոր պատճառը:
Մի՛ փորձեք
Ինքնուրույն վերլուծել ձեր պատասխանները և, առավել ևս, ինքնուրույն փոխել ձեր դեղամիջոցները կամ դրանց դեղաչափերը:
Հոդվածը հրապարակվել է՝ 21-04-2019
Վերջին վերանայում՝ 01-06-2023