Հակաթրոմբին III

Միջազգային անվանում (հապավում). Antithrombin III (АТ III)

Նկարագրություն

Հակաթրոմբին III-ը հիմնական էնդոգեն հակամակարդիչ է, որն արգելակում է արյան մակարդման պլազմային գործոնները և հանդիսանում է հեպարինի պլազմային համագործոնը:

Հակաթրոմբին III-ը գլիկոպրոտեին է, որը հիմնականում արտադրվում է անոթների լորձաթաղանթում (էնդոթելիում) և լյարդի բջիջներում (հեպատոցիտներ): Այն ընկճում է արյան մակարդելիության գործընթացները՝ հանդիսանալով թրոմբինի ապաակտիվացման մեխանիզմի հիմնական պլազմատիկ սպիտակուցը:

Հակաթրոմբին III-ի ինքնուրույն ազդեցության դեպքում թրոմբինի ապաակտիվացումն ընթանում է դանդաղ, սակայն՝ հարաճուն։ Հեպարինի առկայությամբ ապաակտիվացման գործընթացը զարգանում է շատ արագ, այդ իսկ պատճառով հակաթրոմբին III-ը նաև անվանում են հեպարինի պլազմային համագործոն (կոֆակտոր): Միևնույն ժամանակ, հակաթրոմբին III-ի մակարդակի զգալի անկման պայմաններում հեպարինը գրեթե չի ցուցաբերում իր հակամակարդիչ ազդեցությունը:

Հակաթրոմբին III-ը նաև ակտիվ մասնակցություն ունի VIIa, IXa, Xa, XIa և XIIa գործոնների ապաակտիվացման մեջ: Հակաթրոմբին III-ի միջնորդությամբ ապաակտիվացման մեխանիզմը կայանում է կոմպլեքսի առաջացման մեջ, որում թրոմբինի և հակաթրոմբին III-ի մոլեկուլներն անդառնալի կերպով միանում են միմյանց:

Հակաթրոմբին III-ի մակարդակի նվազեցումը վկայում է թրոմբոզի զարգացման ռիսկի մասին:

Ցուցումներ

• հակաթրոմբին III ժառանգական դեֆիցիտի ախտորոշում
• թրոմբոլիտիկ բարդությունների կանխարգելման համար հակամակարդիչների օգտագործման վերահսկում

Կենսանմուշի հանձնում

Արյունը պետք է հանձնել առավոտյան ժամերին, քաղցած վիճակում (ցանկալի է սննդի վերջին ընդունումը ոչ պակաս, քան 8 ժամ և ոչ ավելի, քան 14 ժամ առաջ): Ջրի ընդունումը՝ սովորական ռեժիմով:

Հետազոտության նախորդ օրը պետք է խուսափել հոգեհուզական և ֆիզիկական լարվածություններից, ալկոհոլի ընդունումից:

Չափման միավորներ

Միջազգային չափման միավոր (SI համակարգ)

% (ակտիվության տոկոս)

Նորմալ (ռեֆերենս) միջակայքեր

Համընդհանուր օգտագործվող միջակայքեր

83-128 %

Արդյունքների մեկնաբանություն

Հակաթրոմբին III ակտիվություն (մակարդակի) բարձրացում

• բորբոքային գործընթացներ
• սուր հեպատիտ
• լեղու կանգ (խոլեսթազ)
• վիտամին K-ի դեֆիցիտ
• հակամակարդիչների ընդունում
• ծանր սուր պանկրեատիտ
• ենթաստանոքսային գեղձի քաղցկեղ
• դաշտան
• անաբոլիկ պատրաստուկների ընդունում

Հակաթրոմբին III ակտիվություն (մակարդակի) նվազեցում

• բնածին դեֆիցիտ
• աթերոսկլերոզ
• հղիության վերջին եռամսյակ
• հետվիրահատական շրջան
• լյարդի հիվանդություններ (քրոնիկ հեպատիտներ, ցիռոզ)
• սուր դիսեմինացված ներանոթային մակարդման (ԴՆՄ) համախտանիշ
• քրոնիկ լյարդային անբավարարություն
• թրոմբոէմբոլիա
• սեպսիս
• հեպարինի ընդունում
• հակաբեղմնավորիչ հաբերի ընդունում