D-դիմեր

Միջազգային անվանում (հապավում). D-dimer (D-dim)

Նկարագրություն

D-դիմերը (D-dim) արյան մակարդուկի՝ թրոմբի առաջացման և ձևավորված թրոմբի տրոհման՝ ֆիբրինոլիզի մարկեր է:

D-դիմերի մակարդակը կարող է բարձրանալ մակարդելիության խթանմամբ ընթացող բազմաթիվ վիճակների ժամանակ՝ տարածուն ներանոթային մակարդման համախտանիշ, խորանիստ երակների թրոմբոզ, թոքային թրոմբոէմբոլիա, վիրահատական մեծ միջամտությունների ժամանակ հյուսվածքների տարածուն վնասում, սրտային անբավարարություն, վարակներ, բորբոքումներ, նորագոյացություններ և այլն:

Չնայած թեստի սահմանափակ սպեցիֆիկությանը, D-դիմերի որոշումը մակարդելիության և ֆիբրինոլիզի մյուս գործոնների համեմատ ունի մի շարք առավելություններ, քանի որ D-դիմերն առաջանում է միայն այն դեպքում, երբ առկա են երկու գործընթացները՝ մակարդումն ու ֆիբրինոլիզը միաժամանակ: Օրինակ, D-դիմերի մակարդակը չի փոփոխվում առաջնային ֆիբրինոլիզի, դիսֆիբրինոգենեմիաների ժամանակ:

D-դիմերի մակարդակի վրա կարող են ազդել այնպիսի գործոններ, ինչպիսիք են թրոմբի մեծությունը, կլինիկական նշաններն ի հայտ գալուց հետո հակամակարդիչներով բուժման սկիզբն ընկած ժամանակահատվածը, որոնց դեպքում D-դիմերի մակարդակն աստիճանաբար նվազում է, թրոմբոլիտիկ բուժումը, որը, հակառակը, առաջացնում է D-դիմերի մակարդակի բարձրացում:

Հղի կանանց մոտ հղիության վաղ փուլերից սկսած D-դիմերի մակարդակն արյան մեջ աստիճանաբար բարձրանում է: Հղիության ժամկետների ավարտին վերջինիս մակարդակը կարող է 3-4 անգամ գերազանցել սկզբնականը: D-դիմերի զգալի բարձր ցուցանիշներ գրանցվում է հղիության բարդությունների ժամանակ (գեստոզ, պրեէկլամպսիա), ինչպես նաև շաքարային դիաբետով, երիկամների հիվանդություններով հղիների մոտ:

D-դիմերի մակարդակն աճում է նաև 80 տարեկանից հետո:

Ցուցումներ

• թրոմբոտիկ վիճակների ախտորոշում
• խորանիստ երակների թրոմբոզ (բացառման թեստ)
• թոքային զարկերակների թրոմբոէմբոլիաներ (ԹԶԹԷ)
• դիսեմինացված (տարածուն) մակարդման համախտանիշ
• հղիության բարդացած ընթացք
• թրոմբոլիտիկներով բուժման վերահսկողություն

Կենսանմուշ

D-dim թեսթի համար հանձնվող կենսանմուշն է՝ երակային արյուն։

Կենսանմուշի հանձնում

Հատուկ նախապատրաստման կարիք չի զգացվում: Խորհուրդ է տրվում արյունը վերցնել ոչ շուտ, քան սննդի վերջին ընդունումից 4 ժամ անց:

Չափման միավորներ

Միջազգային չափման միավոր (SI համակարգ)

նգ/մլ (նանոգրամ/միլիլիտր)

Նորմալ (ռեֆերենս) միջակայքեր

Համընդհանուր օգտագործվող միջակայքեր

Տղամարդիկ և ոչ հղի կանայք՝ < 285 նգ/մլ

Հղի կանայք՝

• 1-ին տրիմեստր՝ < 286 նգ/մլ
• 2-րդ տրիմեստր՝ < 457 նգ/մլ
• 3-րդ տրիմեստր՝ < 644 նգ/մլ

Արդյունքների մեկնաբանություն

D-դիմերի մակարդակի բարձրացում

• զարկերակային և երակային թրոմբներ (այդ թվում՝ խորանիստ երակների թրոմբոզ, թոքային զարկերակի թրոմբոէմբոլիա)
• դիսեմինացված ներանոթային մակարդման համախտանիշ
• վարակներ, սեպսիս
• բորբոքումներ (թեթև բարձրացում)
• լյարդային հիվանդություն
• տարածուն արյունազեղումներ (հեմատոմա)
• հղիություն
• վիրահատական միջամտություններ
• 80 տարեկանից բարձր տարիք
• ուռուցքային հիվանդություններ
• թրոմբոլիտիկ բուժում