Էստրիոլ ազատ - Հորմոններ

Միջազգային անվանում (հապավում). E3 (E3-free)

Նկարագրություն

Ազատ էստրիոլը(E3-F) իգական սեռական հորմոն է՝ հղիության հիմնական էստրոգենը:

Այն արտադրվում է ընկերքում և շատ քիչ քանակներով առաջանում կնոջ օրգանիզմում էստրոնի ծայրամասային փոխակերպումից:

Էստրիոլը պակաս ակտիվ է, քան էստրադիոլը (E2) և էստրոնը:

Էստրիոլի ազդեցությունները խիստ կախված են արյան պլազմայում վերջինիս մակարդակից: Հղիությունից դուրս էստրիոլն արյան մեջ հայտնաբերվում է ցածր մակարդակներով, մինչդեռ, հղիության ընթացքում, սկսած ընկերքի ձևավորման փուլից, այս հորմոնի մակարդակը կտրուկ աճում է:

Էստրիոլը հանդիսանում է հղիության գլխավոր էստրոգենը, որը բարձրացնում է արգանդի անոթներով արյունահոսքը՝ նվազեցնելով դրանց դիմադրողականությունը, ինչպես նաև նպաստում է հղիության ընթացքում կաթնածորանների զարգացման գործընթացներին:

Հորմոնի մակարդակը համարժեքորեն արտացոլում է ֆետո-պլացենտար կոմպլեքսի գործունեությունը: Հղիության նորմալ ընթացքի դեպքում ազատ (չկոնյուգացված) էստրիոլի մակարդակն ընկերքի ձևավորման փուլերից սկսած հարաճուն աճում է: Ֆետո-պլացենտար կոմպլեքսի գործունեության խանգարումների ժամանակ հորմոնի մակարդակի նվազեցումը գրանցվում է մինչև կլինիկական դրսևորումների զարգանալը: Որքան հորմոնի մակարդակն իջած է, այդքան բարձր է ախտաբանական վիճակների զարգացման հավանականությունը: Սպառնացող է համարվում ազատ էստրիոլի մակարդակի նվազեցումն ավելի քան 40%-ով:

Ազատ էստրիոլի մակարդակի որոշումը մտնում է այսպես կոչված հղիության երկրորդ եռամսյակի «եռակի թեստի» մեջ, որով հղիության 15 և 20-րդ շաբաթականների միջև գնահատվում է պտղի զարգացման արատների ռիսկը: Ազատ էստրիոլից բացի այս սքրինինգային հետազոտությունը ներառում է նաև ալֆա-ֆետոպրոտեինի (AFP) և մարդու խորիոնային գոնադատրոպինի (HCG) թեստերը:

Ցուցումներ

• 35 տարեկանից բարձր հղիություն
• ապագա հոր տարիքը՝ բարձր 45 տարեկանից
• քրոմոսոմային հիվանդությունների ընտանեկան անամնեզ
• նախորդ երեխաների մոտ զարգացման արատներ
• զույգերից մեկնումեկի մոտ ճառագայթային և այլ վնասական ազդեցություն
• ցիտոստատիկների կամ հակացնցումային դեղերի ընդունում
• հղիության սովորական անտանելիություն
• ուլտրաձայնային հետազոտությամբ ընկերքի կալցինատների, պտղի հիպոտրոֆիայի և այլ շեղումների հայտնաբերում
• ֆետո-պլացենտար կոմպլեքսի վիճակի ախտորոշում հղիության 12-15-րդ շաբաթականից սկսած (խորհուրդ է տրվում ամենամսյա հսկողություն)
• ձգձգված հղիության տարբերակիչ ախտորոշում

Կենսանմուշ

E3-free թեսթի համար հանձնվող կենսանմուշն է՝ երակային արյուն։

Կենսանմուշի հանձնում

Հատուկ նախապատրաստում չի պահանջվում: Խորհուրդ է տրվում արյունը վերցնել սննդի վերջին ընդունումից առնվազն 4 ժամ հետո:

Չափման միավորներ

Միջազգային չափման միավոր (SI համակարգ)

նգ/մլ (նանոգրամ/միլիլիտր)

Այլընտրանքային չափման միավոր

նմոլ/լ (նանոմոլ/լիտր)

Միավորների փոխակերպում

նգ/մլ х 3,466 = նմոլ/լ

Նորմալ (ռեֆերենս) միջակայքեր

Համընդհանուր օգտագործվող միջակայքեր

Հղի կանայք

• 15 շաբաթական` (1,0-4,4) նգ/մլ
• 16 շաբաթական` (1,4-6,5) նգ/մլ
• 17 շաբաթական` (1,5-6,6) նգ/մլ
• 18 շաբաթական` (1,6-8,5) նգ/մլ
• 19 շաբաթական` (1,9 -11,0) նգ/մլ
• 20 շաբաթական` (2,1-13,0) նգ/մլ
• 21 շաբաթական` (3,8-10,0) նգ/մլ
• 22 շաբաթական` (4,5-13,0) նգ/մլ
• 23-24 շաբաթական` (4,9-14 ,0) նգ/մլ
• 25-26 շաբաթական` (5,3-16,0) նգ/մլ
• 27-28 շաբաթական` (8,0-24,0) նգ/մլ
• 29-30 շաբաթական` (8,0-30,0) նգ/մլ

Արդյունքների մեկնաբանություն

E3-F-ի մակարդակի բարձրացում

• բազմապտուղ հղիություն
• խոշոր պտուղ
• լյարդի հիվանդություններ (սպիտակուցային սինթեզի ընկճում)

E3-F-ի մակարդակի նվազեցում

• ֆետո-պլացենտար անբավարարություն
• հղիության ընդհատման կամ վաղաժամ ծննդաբերության վտանգ
• բշտիկային զանգված
• ժամկետանց հղիություն
• պտղի մակերիկամների հիպոպլազիա
• պտղի անցեֆալիա
• պտղի մոտ Դաունի համախտանիշ
• ներարգանդային վարակներ
• մոր կողմից գլյուկոկորտիկոիդների, հակաբիոտիկների ընդունում