Էպշտեյն-Բարրի վիրուսի կապսիդային հակածնի IgM իմունոգլոբուլինններ

Միջազգային անվանում (հապավում). Epstein-Barr Virus Viral Capsid IgM (EBV VCA-IgM)

Նկարագրություն

Էպշտեյն-Բարրի վիրուսի կապսիդային հակածնի նկատմամբ IgM իմունոգլոբուլիննները հանդիսանում են նույն վիրուսով առաջնային վարակի մարկեր:

Էպշտեյն-Բարրի վիրուսը (EBV) հանդիսանում է մարդու հերպեսի IV տիպի վիրուս: Այն պատկանում է հերպես-վիրուսների ընտանիքին, g-հերպես-վիրուսների ենթաընտանիքին: Վիրուսային մասնիկը կազմված է նուկլեոիդից, կապսիդից և թաղանթից:

EBV-ի կապսիդային հակածնային կոմպլեքսի նկատմամբ IgM դասի հակամարմինները (EBV VCA-IgM) բնորոշ են սուր վարակին: Դրանք առաջանում են EBV վարակի վաղ փուլում և անհետանում սուր առաջնային վարակից 4-6 շաբաթվա ընթացքում: Նույն հակամարմիններն արյան մեջ հայտնվում են նաև վարակի վերաակտիվացման ժամանակ: Արյան մեջ EBV VCA-IgM-ի հայտնվելը հակա-EBNA IgG-ի բացակայության պայմաններում հաստատում է առաջնային վարակը:

Ցուցումներ

• սուր վարակային մոնոնուկլեոզի կլինիկական կասկածի դեպքում ախտորոշման լաբորատոր հաստատում
• վարակի ընթացքի/փուլի գնահատում
• Էպշտեյն-Բարրի վիրուսի հետ կապված լիմֆոպրոլիֆերատիվ և ուռուցքային հիվանդությունների ախտորոշում

Կենսանմուշ

EBV VCA-IgM թեսթի համար հանձնվող կենսանմուշն է՝ երակային արյուն։

Կենսանմուշի հանձնում

Հետազոտությանը հատուկ նախապատրաստվելու կարիքը չի զգացվում: Այնուամենայնիվ, խորհուրդ է տրվում արյունը հանձնել սննդի վերջին օգտագործումից 4 ժամ անց:

Չափման միավորներ

Համընդհանուր չափման միավոր

Գործակից (ինդեքս)

Նորմալ (ռեֆերենս) միջակայքեր

Համընդհանուր օգտագործվող միջակայքեր

• մինչև 0,8` բացասական
• (0,8-1,0)` սահմանային (գորշ գոտի)
• 1,0 և ավելի բարձր՝ դրական

Արդյունքների մեկնաբանություն

EBV VCA-IgM դրական պատասխան

• սուր կամ ոչ վաղ անցյալում (1-2 ամիս առաջ) կրած EBV վարակ
• վարակի վերաակտիվացում
• EBV-ային քրոնիկ ակտիվ վարակ

EBV VCA-IgM բացասական պատասխան

• EBV վարակի բացակայություն
• EBV վարակի ինկուբացիոն շրջան
• EBV հետվարակի վաղ և ուշ շրջաններ
• ատիպիկ առաջնային EBV վարակ կամ վերաակտիվացում

Տարբերակիչ ախտորոշում

Վարակի փուլ	VCA IgM	VCA IgG	EA-IgG	EBNA IgG
Վարակի բացակայություն կամ ինկուբացիոն շրջան (30-50 օրեր)	-	-	-	-
Առաջնային վարակի վաղ փուլի կասկած	+	-	-	-
Առաջնային վարակի սուր փուլ	++	++++	++	-
Ոչ վաղ վարակ (մինչև 6 ամիս)	+	++++	++	-
Տարած վարակ	-	+++	+/-	+
Քրոնիկ վարակ կամ վերջինիս վերաակտիվացում	-/+	++++	+++	-/+
Չարորակ նորագոյացություններ, կապված EBV-ի հետ	-	++++	+++	-/+