Ֆիբրինոգեն

Միջազգային անվանում (հապավում). Fibrinogen (FG)

Նկարագրություն

Ֆիբրինոգենը (FG) ֆիբրինին նախորդող սպիտակուց է, որն արյունը մակարդվելիս կազմում է մակարդուկի հիմքը:

Ֆիբրինոգենը շուրջ 340 հզ դալտոն զանգվածով գլիկոպրոտեին է:

Միջազգային սահմանումներով ֆիբրինոգենը արյան պլազմայի մակարդելիության համակարգի առաջին (I) գործոնն է: Այն արտադրվում է լյարդում, որտեղից անցնում է արյան հուն: Կիսաքայքայման պարբերությունը շուրջ 100 ժամ է: Որպես մակարդուկի առաջացման ամենավերջին փուլ, ֆիբրինոգենի փոխակերպումը ֆիբրինի ընթանում է թրոմբինի ազդեցությամբ:

Ֆիբրինի ձևավորումն ընթանում է մի քանի փուլով` ֆիբրինի մոնոմերների առաջացում, պոլիմերիզացիա, մակարդուկի կայունացում: Այս փուլերի արդյունքում առաջացող ֆիբրինը, որը կազմում է մակարդուկի հիմքը, իրենից ներկայացնում է անլուծելի միացություն (I ֆիբրին՝ insoluble):

Ֆիբրինոգենի քանակն աճում է բորբոքային գործընթացների ժամանակ, ուստի ֆիբրինոգենը կարող է օգտագործվել որպես բորբոքման և հյուսվածքների նեկրոզի բավականաչափ զգայուն մարկեր: Ֆիբրինոգենը նաև արյան պլազմայի այն հիմնական սպիտակուցն է, որն ազդում է էրիթրոցիտների նստման արագության վրա (ֆիբրինոգենի մակարդակի աճը բերում է ԷՆԱ-ի արժեքի աճի):

Հղիության ընթացքում գրանցվում է արյան ֆիբրինոգենի մակարդակի ֆիզիոլոգիական աճ: Օրինակ՝ հղիության երրորդ եռամսյակում այն կարող է հասնել մինչև 6 գ/լ-ի:

Ցուցումներ

• արյան մակարդելիության խանգարումներ
• նախավիրահատական հետազոտում
• հղիների հետազոտում
• սրտանոթային հիվանդություններ
• բորբոքային վիճակներ

Կենսանմուշ

FG թեսթի համար հանձնվող կենսանմուշն է՝ երակային արյուն։

Կենսանմուշի հանձնում

Արյունը պետք է հանձնել առավոտյան ժամերին, պարտադիր քաղցած վիճակում (սննդի վերջին ընդունումը ոչ պակաս, քան 8 ժամ, ցանկալի է՝ 12 ժամ անց): Պետք է բացառել հյութերը, թեյը, սուրճը (հատկապես՝ շաքարով): Կարելի է ընդունել ջուր:

Չափման միավորներ

Միջազգային չափման միավոր (SI համակարգ)

գ/լ (գրամ/լիտր)

Այլընտրանքային չափման միավոր

մգ/դլ (միլիգրամ/դեցիլիտր)

Միավորների փոխակերպում

մգ/դլ х 0,01 = գ/լ

Նորմալ (ռեֆերենս) միջակայքեր

Համընդհանուր օգտագործվող միջակայքեր

Չափահասներ՝ (2,0-4,0) գ/լ (հեմոսթազի համար անհրաժեշտ է առնվազն 0,5 գ/լ)

Արդյունքների մեկնաբանություն

FG-ի մակարդակի բարձրացում (հիպերֆիբրինոգենեմիա)

• սուր բորբոքում և վարակներ (վիրուսային վարակներ, տուբերկուլոզ)
• ինսուլտ (առաջին օրեր)
• հղիություն
• թերակտիվ վահանաձև գեղձ (հիպոթիրեոզ)
• սրտամկանի ինֆարկտ
• այրվածքներ
• ամիլոիդոզ
• չարորակ ուռուցքներ
• էստրոգենների, բերանային (օրալ) հակաբեղմնավորիչների ընդունում

FG-ի մակարդակի նվազեցում (հիպոֆիբրինոգենեմիա)

• լյարդի հիվանդություններ
• դիսեմինացված ներանոթային մակարդման (ԴՆՄ) համախտանիշ
• աֆիբրինոգենեմիա
• С և В12 վիտամինների դեֆիցիտ
• հարպտղային ջրերով էմբոլիա (նորածինների մոտ)
• օձի թույն
• քրոնիկ միելոլեյկոզ
• պոլիցիտեմիա
• անաբոլիկ հորմոնների, անդրոգենների, ձկան յուղի, Վալպրոյաթթվի, հակամակարդիչների (ստերպտոկինազ, ուրոկինազ) ընդունում