Ընդհանուր նկարագրություն

Ֆրուկտոզամինը գլյուկոզի և արյան շիճուկի սպիտակուցների կոմպլեքսն է (գլիկոզիլացված սպիտակուց):

Ֆրուկտոզամինը գլխավորապես ներկայացված է գլիկոզիլացված ալբումինով, որն առաջանում է գլյուլոզի և ալբումինի ոչ ֆերմենտային միացման արդյունքում: Շիճուկային այս սպիտակուցների կիսահեռացման պարբերությունն ավելի կարճ է, քան էրիթրոցիտների կյանքի միջին տևողությունը, ուստի, ի տարբերություն գլիկոզիլացված հեմոգլոբինի, ֆրուկոզամինն արտացոլում է արյան գլյուկոզի մակարդակի կայուն կամ ժամանակավոր բարձրացումը ոչ թե հետազոտությանը նախորդող 3-4 ամիսների, այլ՝ միայն 1-3 շաբաթների ընթացքում:

Երեխաների մոտ ֆրուկտոզամինի մակարդակը մի փոքր ցածր է, քան չափահասների մոտ: Հեմոգլոբինը, ասկորբինաթթուն և ցերուլոպլազմինն արգելակում են ֆրուկտոզամինի առաջացումը:

Այս հետազոտությունը նպատակահարմար չէ անցկացնել պրոտեինուրիայի և արտահայտված հիպոպրոտեինեմիայի ժամանակ: Շաքարային դիաբետով հիվանդների շրջանում ածխաջրատային փոխանակության բավարար կոմպենսացիայի դեպքում ֆրուկտոզամինի մակարդակը կարող է լինել 286 - 320 մկմոլ/լ, իսկ դեկոմպենսացիայի ժամանակ աճել մինչև 370 մկմոլ/լ և ավելի բարձր:

Հետազոտության ցուցումներ

  • Շաքարային դիաբետով հիվանդների շրջանում հիպեերգլիկեմիայի կարճատև հսկողություն, հատկապես նորածինների և ոչ հղի կանանց շրջանում:

Կենսանմուշ

«Ֆրուկոզամին» թեսթի համար հանձնվող կենսանմուշն է՝ երակային արյուն։

Կենսանմուշի հանձնում

Արյունը պետք է հանձնել առավոտյան ժամը 08:00 - 11:00 սահմաններում, քաղցած վիճակում: Խորհուրդ է տրվում հետազոտվել սննդի վերջին ընդունումից ոչ շուտ, քան 8 ժամ և ոչ ուշ, քան 14 ժամ հետո, այս ընթացքում ընդունելով միայն ջուր: Հետազոտման նախորդ օրը խորհորդ է տրվում նաև զերծ մնալ սննդային գերբեռնվածությունից:

Չափման միավորներ

Միջազգային չափման միավոր (SI համակարգ)

մկմոլ/լ (միկրոմոլ/լիտր)

Նորմալ (ռեֆերենս) միջակայքեր

Համընդհանուր օգտագործվող միջակայքեր

մինչև 319 մկմոլ/լ

Արդյունքների մեկնաբանություն

Ֆրուկտոզամինի մակարդակի բարձրացում

  • շաքարային դիաբետ (դիաբետով հիվանդների շրջանում ածխաջրատային փոխանակության բավարար կոմպենսացիայի դեպքում ֆրուկտոզամինի մակարդակը կարող է լինել 286 - 320 մկմոլ/լ, իսկ դեկոմպենսացիայի ժամանակ աճել մինչև 370 մկմոլ/լ և ավելի բարձր)
  • երիկամային անբավարարություն
  • հիպոթիրեոզ
  • IgA-ի բարձրացում

Ֆրուկտոզամինի մակարդակի նվազեցում

  • արտահայտված հիպոպրոտեինեմիա (հիպոալբումինեմիա), օրինակ՝ նեֆրոտիկ համախտանիշ
  • դիաբետիկ նեֆրոպաթիա
  • հիպերթիրեոզ
  • ասկորբինաթթվի (վիտամին C) ընդունում

Միջազգային անվանումներ

Միջազգային (անգլերեն) լրիվ անվումը՝ Fructosamine

Միջազգային (անգլերեն) հապավումը՝ FRUC

Ձեզ ներկայացված է մասնագիտական բնույթի նյութ: Հոդվածն ունի նաև ընդհանուր տեղեկատվական նշանակություն, սակայն, եթե դուք բժիշկ չեք, խիստ ցանկալի է որոշումներ կայացնել միայն ձեր բժշկի հետ միասին