Ընդհանուր նկարագրություն

Միոգլոբինը կմախքային մկաններում և սրտամկանում առկա սպիտակուց է, որն ապահովում է այս հյուսվածքներում թթվածնի պահուստավորումը:

Միոգլոբինի մոլեկուլը կազմված է եզակի պոլիպեպտիդային շղթայից և երկաթ պարունակող հեմից, որն իր կառուցվածքով և գործառույթներով նման է արյան հեմոգլոբինին:

Միոգլոբինը կապում է թթվածինը (առաջացնելով օքսիմիոգլոբին) և հանդիսանում կմախքային մկանների համար թթվածնի հիմնական մատակարարը: Թթվածնաքաղցի ժամանակ (օրինակ՝ ֆիզիկական գերծանրաբեռնվածություններ), թթվածինն ազատվում է միոգլոբինային կոմպլեքսից և մուտք գործում մկանային բջիջնների (միոցիտներ) միտոքոնդրիում, որտեղ իրականացվում է ԱԵՖ-ի արտադրությունը:

Միոգլոբինն օրգանիզմից հեռացվում է երիկամներով, անփոփոխ վիճակում: Կմախքային մկանների կամ սրտամկանի հյուսվածքների ցանկացած վնասվածքի, մեռուկացման (նեկրոզ) և քայքայման (լիզիս) ժամանակ միոգլոբինը մուտք է գործում արյան հուն: Սրտամկանի ինֆարկտի ժամանակ հիպերմիոգլոբինեմիայի արտահայտվածությունն ուղղակի կախվածության մեջ է գտնվում նեկրոզի չափերի հետ: Միոգլոբինն ինֆարկտի ամենավաղ հայնտաբերվող մարկերներից է (հայտնաբերվում է նոպայից արդեն 2 ժամ անց, մակարդակը կարող է բարձրանալ 10-ակի): Ենթադրվում է, որ նեկրոզի ժամանակ միոգլոբինի արյան հուն արագ մուտք գործելը պայմանավորված է համեմատաբար փոքր չափի մոլեկուլներով. նույն այս պատճառով բացատրվում է նաև երիկամներով արագ արտազատումը:

Միոգլոբինը սրտամկանի ինֆարկտի ոչ սպեցիֆիկ մարկեր է, ուստի ախտորոշումը պետք է հաստատվի սրտամկանի վնասման ավելի սպեցիֆիկ մարկերներով:

Հետազոտության ցուցումներ

  • սրտամկանի ինֆարկտի վաղ ախտորոշում, հսկողություն և կանխատեսում (պրոգնոզ)
  • կմախքային մկանների հիվանդություններ (նեկրոզ, տրավմա, իշեմիա)

Կենսանմուշ

«Միոգլոբին » թեսթի համար հանձնվող կենսանմուշն է՝ երակային արյուն։

Կենսանմուշի հանձնում

Արյունը ցանկալի է հանձնել առավոտյան ժամերին, քաղցած վիճակում (ցանկալի է սննդի վերջին ընդունումը ոչ պակաս, քան 8 ժամ և ոչ ավելի, քան 14 ժամ առաջ): Ջրի ընդունումը՝ սովորական ռեժիմով:

Չափման միավորներ

Միջազգային չափման միավոր (SI համակարգ)

մկգ/լ (միկրոգրամ/լիտր)

Նորմալ (ռեֆերենս) միջակայքեր

Համընդհանուր օգտագործվող միջակայքեր

14տ. բարձր անձինք՝ < 70 մկգ/լ

Արդյունքների մեկնաբանություն

Միոգլոբինի մակարդակի բարձրացում

  • սրտամկանի ինֆարկտ (միոգլոբինի մակարդակի բարձրացումն ունի անցողիկ բնույթ, դիտարկվում է ինֆարկտի ախտանիշների սկսվելուց 1-4 ժամվա ընթացքում և նորմալանում սրտի շրջանի ցավերը սկսվելուց հետո շուրջ 24 ժամվա ընթացքում)
  • կմախքային մկանների տրավմա
  • ցնցումներ
  • միոզիտներ
  • միոդիստրոֆիա
  • ռաբդոմիոլիզ
  • սուր երիկամային անբավարարություն
  • ֆիզիկական ծանրաբեռնվածություն
  • այրվածքներ

Միոգլոբինի մակարդակի նվազեցում

  • միոգլոբինի նկատմամբ շրջանառող հակամարմինների առկայություն (պիելոմիելիտ)
  • ռևմատոիդ արթրիտ

Միջազգային անվանումներ

Միջազգային (անգլերեն) լրիվ անվումը՝ Myoglobin

Միջազգային (անգլերեն) հապավումը՝ MYO

Ձեզ ներկայացված է մասնագիտական բնույթի նյութ: Հոդվածն ունի նաև ընդհանուր տեղեկատվական նշանակություն, սակայն, եթե դուք բժիշկ չեք, խիստ ցանկալի է որոշումներ կայացնել միայն ձեր բժշկի հետ միասին