Թրոմբոցիտներ

Ընդհանուր նկարագրություն

Թրոմբոցիտները անկորիզ բջիջներ են, որոնք իրենց գրանուլներում և մակերեսին պարունակում են բազմաթիվ ակտիվ նյութեր և արյան մակարդման գործոններ, որոնք մուտք են գործում արյան հուն թրոմբոցիտների ակտիվացման դեպքում:

Թրոմբոցիտները կամ արյան թիթեղիկները (Thrombocytes, PLT) 2-5 մկմ տրամագծով, անկորիզ սկավառակաձև բջիջներ են: Կյանքի տևողությունը 7-10 օր է:

Թրոմբոցիտներն ունեն բարդ կառուցվածք. պլազմատիկ թաղանթն արտաքինից պատված է նուրբ շերտով, որը հարուստ է մակարդիչ գործոններով, իսկ անմիջապես պլազմատիկ թաղանթի վրա դասավորված գլիկոպրոտեիդների մոլեկուլները տարբեր մեխանիզմներով մասնակցում են թրոմբոցիտների ադհեզիային և ագրեգացիային: Պլազմատիկ թաղանթի տակ դասավորված միկրոխողովակներրը մտնում են բջջի կծկողական ապարատի մեջ: Գրգռված թրոմբոցիտի կծկողական համակարգի կծկման շնորհիվ հիալոպլազման և օրգանոիդները սեղմվում են, նրանց պարունակությունը բաց անցուղիների միջոցով մղվում է շրջապատող միջավայրի մեջ:

Թրոմբոցիտի պարունակությունն ունի բարդ քիմիական բաղադրություն, այդ թվում՝ յուրահատուկ մակարդիչ գործոններ, որոնք կոչվում են թրոմբոցիտային (թրոմբոցիտային թրոմբոպլաստին, հակահեպարինային գործոն, ֆիբրինոգեն, թրոմբոստենին, սերոտոնին, ագլյուտինացիայի գործոն): Թրոմբոցիտներից անջատվել է նաև թրոմբոցիտների աճի գործոն, որը խթանում է անոթների հարթ մկանունքի աճը և պահպանում էնդոթելային շերտի ամբողջականությունը:

Թրոմբոցիտները կարող են արտադրել բազմաթիվ նյութեր, որոնք մասնակցում են արյան մակարդման բոլոր փուլերում, այդ թվում՝ գորոծոն 3 (թրոմբոցիտային թրոմրպլաստին), գործոն 4 (հակահեպարինային գործոն), գործոն 5 (մակարդիչ գործոն կամ ֆիբրինոգեն), գործոն 6 (թրոմբոստենին), գործոն 10 (սերոտոնին) և գործոն 11 (միացքավորման գործոն):

Թրոմբոցիտների ֆունկցիաները բազմազան են և որոշվում են յուրահատուկ հատկություններով (ագլյատինացիայի հատկություն, ադհեզիա (կպչման) և միացքավորում (ագրեգացիա), կեղծ ոտիկնրի առաջացում): Թրոմբոցիտները ունեն պաշտպանական ‎ֆունկցիաներ, դրանցից մեկը դրսևորվում է մանր և խոշոր անոթներից արյունահոսություների ժամանակ, որի դեպքում նրանց մասնակցությամբ գոյացած խցանը փակում է վնասված անոթի լուսանցքը և կանխում հետագա արյունահոսությունը:

Արյան 1 մմ³ ծավալում նրանց քանակը 200-400 հազար է, որից ավելի բարձր քանակի ավելացումը կոչվում է թրոմբոցիտոզ, իսկ պակասումը՝ թրոմբոցիտոպենիա: Թրոմբոցիտոպենիայի կլինիկական նշանները (արյունահոսության հակում՝ ընդհուպ մինչև կյանքին վտանգ սպառնացող) զարգանում է այս բջիջների՝պակաս քան 50 հզ/մկլ քանակների դեպքում:

Թրոմբոցիտների քանակն ավելանում է մարսողության, ծանր մկանային աշխատանքի, հղիության ժամանակ: Առկա է նաև օրական տատանում հույզերից, իսկ գիշերվա ընթացքում նրանց քանակը պակասում է:

Հետազոտության ցուցումներ

• պլանային կանխարգելիչ հետազոտություն
• հոսպիտալացմանը նախորդող հետազոտություն
• վարակիչ, բորբոքային և արյունաբանական հիվանդությունների ախտորոշում
• հիվանդության ընթացքի կամ բուժման արդյունավետության հսկողություն

Կենսանմուշ

«Թրոմբոցիտներ» թեսթի համար հանձնվող կենսանմուշն է՝ երակային արյուն։

Կենսանմուշի հանձնում

Կենսանմուշը պետք է հանձնել առավոտյան ժամերին, քաղցած վիճակում: Սննդի վերջին ընդունումը՝ ոչ պակաս, քան 8 ժամ, ցանկալի է՝ 12 ժամ առաջ: Բացառել հյութերը, թեյը, սուրճը (հատկապես՝ շաքարով): Կարելի է ընդունել ջուր:

Հնարավորության սահմաններում հետազոտության նախորդ օրը պետք է խուսափել ֆիզիկական և հուզական ծանրաբեռնվածություններից:

Չափման միավորներ

Միջազգային չափման միավոր (SI համակարգ)

10⁹ բջիջ/լ (միլիարդ հատ մեկ լիտրում)

Այլընտրանքային չափման միավոր

10³ բջիջ/մկլ (հազար հատ 1 միկրոլիտրում)

Միավորների փոխակերպում

10⁹/լ = 10³/մկլ

Նորմալ (ռեֆերենս) միջակայքեր

Համընդհանուր օգտագործվող միջակայքեր

• թրոմբոցիտների բացարձակ թիվ (չափահասներ)՝ 150-400 x 10⁹/լ
• խոշոր թրոմբոցիտների ֆրակցիա (P-LCR)` 15-35%
• թրոմբոցիտների անիզոցիտոզի ցուցանիշ, ստանդարտ շեղում (PDW)` 9-14 fl.
• թրոմբոցիտների միջին ծավալ (նմուշի ընդհանուր ծավալում) (MPV)` 8-12 fl.

Այլընտրանքային միջակայքեր

Տարիք	PLT, հազ./մկլ (103 բջիջ/մկլ)
Երեխաներ	տղաներ	աղջիկներ
1-14 օր.	218 - 419	144 - 449
14 օր. - 4,3 շաբ.	248 - 586	279 - 571
4,3 շաբ. - 8,6 շաբ.	229 - 562	331 - 597
8,6 շաբ. - 6 ամս.	244 - 529	247 - 580
6 ամս. - 2 տ.	206 - 445	214 - 459
2 - 6 տ.	202 - 403	189 - 394
≥ 6 տ.	150 - 400

Արդյունքների մեկնաբանություն

Թրոմբոցիտների թվաքանակի բարձրացում (թրոմբոցիտոզ)

• ֆիզիկական գերբեռնվածություն
• սուր և քրոնիկ բորբոքային հիվանդություններ
• հեմոլիտիկ անեմիաներ
• սուր և քրոնիկ արյան կորստի հետևանքով անեմիաներ
• վիճակ կրած վիրահատական միջամտությունից հետո
• վիճակ փայծաղի հեռացումից հետո (սպլենէկտոմիա)
• ուռուցքային հիվանդություններ, այդ թվում՝ հեմոբլաստոզներ

Թրոմբոցիտների թվաքանակի նվազեցում (թրոմբոցիտոպենիա)

• հղիություն
• վիտամին B12-դեֆիցիտային և ֆոլիաթթվադեֆիցիտային անեմիաներ
• ապլաստիկ անեմիաներ
• վիրուսային և բակտերիալ վարակներ
• բնածին թրոմբոցիտոպենիաներ
• փայծաղի մեծաում (սպլենոմեգալիա)
• աուտոիմուն հիվանդություններ
• վիճակ զանգվածային արյան փոխներարկումից հետո
• թրոմբոցիտների արտադրությունն ընկճող դեղերի ընդունում

Միջազգային անվանումներ

Միջազգային (անգլերեն) լրիվ անվումը՝ Thrombocytes (Platelets)

Միջազգային (անգլերեն) հապավումը՝ PLT