Լյամբլիայի արագ ՀԾ թեստ - Մակաբույծներ

Միջազգային անվանում (հապավում). Giardia liamblia, Rapid Ag test (GL Ag)

Նկարագրություն

Լյամբլիոզն աղիքային վարակ է, որը հարուցվում է Giardia intestinales մակաբույծով (այլ անվանումներից են՝ Giardia lamblia, Giardia duodenalis):

Giardia lamblia-ն միաբջիջ մակաբույծ է, որը հանդիպում է մարդկանց և կենդանիների աղիներում և փոխանցվում է վարակված մարդու կամ կենդանիների կղանքով:

Այս մակաբույծը պաշտպանված է թաղանթով (ցիստա), որը թույլ է տալիս տիրոջ օրգանիզմից դուրս երկար ժամանակ պահպանել կենսունակությունը: Լյամբլիան համարվում է ջրով մարդուն փոխանցվող հիվանդությունների ամենատարածված պատճառներից մեկը: Առավել բնորոշ ախտանիշներից են՝ փորլուծություն, ջրային կղանք և ստամոքսի (որովայնային) կծկանքներ, որոնք հայտնվում են վարակվելուց 1-2 շաբաթվա ընթացքում և կարող են շարունակվել 2-6 շաբաթ: Հիվանդների մոտ նաև դիտարկվում է ախտորժակի անկում, սրտխառնոց, փսխում, թեթև ջերմություն, գունատություն և ալերգիկ ցաներ: Լյամբլիոզի քրոնիկ ձևը պարբերաբար ի հայտ է գալիս որովայնքի փքվածությամբ, ստամոքսի շրջանի ցավերով և կղանքի ջրիկացմամբ:

Լյամբլիայի հակածնի հայտնաբերման թեստի հիմքում ընկած է միափուլ իմունաքրոմատոգրաֆիկ ռեակցիա, որի ընթացքում նմուշում առկա հակածնի և հատուկ պոլիկլոնալ հակամարմինների միջև առաջանում է գունավորմամբ ընթացող ռեակցիա: Այս գույնի առկայությունն էլ հաստատում է դրական թեստը, որը մեկնաբանվում է որպես մակաբույծի առկայություն:

Թեստը սքրինինգային է և թույլ է տալիս ենթադրել ախտորոշումը: Հաստատող ախտորոշումը դրվում է բժշկի կողմից միայն համալիր կլինիկական և լաբորատոր տվյալների հիման վրա:

Ցուցումներ

• ջրիկ արտաթորանքներով, որովայնային կծկանքներով (սպազմով) փորլուծություն

Կենսանմուշ

GL Ag թեսթի համար հանձնվող կենսանմուշն է՝ կղանք։

Կենսանմուշի հանձնում

Կղանքը հավաքվում է գդալիկով և կափարիչով տարայում՝ վերջինիս 1/3 չափով: Պահպանումը՝ +2...+8° С պայմաններում: Նմուշը պետք է բերել լաբորատորիա հավաքելուց 10-12 ժամվա ընթացքում:

Հավաստի պատասխանի համար թեստը պետք է անցկացնել հիվանդության ախտանիշները սկսվելուց մինչև 1 շաբաթվա ընթացքում:

Չափման միավորներ

Որպես որակական թեստ, չափման միավոր չունի:

Արդյունքների մեկնաբանություն

Թեստի արդյունքների մեկնաբանությունը տեղեկատվություն է տրամադրում բուժող բժշկի համար և չի համարվում ախտորոշում: Ճշգրիտ ախտորոշումը դնում է բժիշկը՝ հիմնվելով այս, այլ թեստերի, ձեր գանգատների ու ախտանիշների, ինչպես նաև անամնեզի վրա:

Դրական թեստ

Լյամբլիոզի սուր փուլ

Բացասական թեստ

Giardia lamblia-ով վարակման բացակայություն: