Աքիլեսյան ջլի վնասվածք - Տրավմա

Աքիլեսյան ջիլը կամ գարշապարը հաստ ու պինդ ջիլ է, որը դուք կարող եք զգալ կամ շոշափել ձեր սրունք-թաթային հոդի ետնամասում:

Դուք կարող եք գերձգել ձեր աքիլեսյան ջիլը ֆիզիկական վարժանք կատարելիս (տենդինիտ) կամ այն կարող է թուլանալ դեգեներատիվ փոփոխությունների պատճառով (տենդինոզ): Վերջապես, այս ջիլը նաև կարող է պատռվել:

Եթե կարծում եք, որ ունեք աքիլեսյան ջլի հետ կապված որևէ խնդիր, ճիշտ կլինի առանց ուշացնելու դիմել ձեր բժշկին:

Իմացե՛ք ավելին աքիլեսյան ջլի տենդինիտի և պատռվածքի մասին:

Աքիլեսյան ջլի վնասվածքների ախտանիշները

Աքիլեսյան ջլի վնասվածքի մասին սովորաբար կասկածում եք ֆիզիկական վարժանք կատարելու ընթացքում կամ դրանից հետո: Ամենահաճախ հանդիպող նշանը տվյալ շրջանի ցավն է:

Դուք նաև կարող եք զգալ ձեր կրունկի ետնամասում թուլություն, պնդացում կամ այտուցվածություն: Ջլի պատռվածքի ժամանակ կարող եք նշել կրուկի շրջանում հարվածին նմանվող զգացողություն: Կարող է խանգարվել ձեր քայլքը: Կրունկի տակ տեղակայված ցավը սովորաբար չի վկայում ջլի վնասման մասին:

Աքիլեսյան ջլի վնասվածքների ախտորոշումը

Բժիշկը ախտորոշում է ձեր աքիլեսյան ջլի հետ կապված խնդիրները՝ լսելով ձեր գանգատները, զննելով տվյալ շրջանը, իսկ անհրաժեշտության դեպքում՝ նշանակելով նույն շրջանի գերձայնային հետազոտություն (սոնոգրաֆիա) կամ ռենտգեն հետազոտություն:

Աքիլեսյան ջլի վնասվածքների բուժումը

Եթե կարծում եք, որ վնասել եք ձեր ոտքի աքիլեսյան ջիլը, առանց հետաձգելու այցելեք ձեր բժշկին:

Օգտակար կարող է լինել առաջին 2-3 օրվա ընթացքում «RICER» միջոցառումներ ձեռնարկելը`

• Հանգիստ (Rest). հանգիստ տվեք ձեր ոտնաթաթին (նստած կամ պառկած դիրք)
• Սառույց (Ice). սառցեպարկ կամ սառեցնող այլ միջոց դրեք տվյալ շրջանին (20 րոպե)
• Ճնշում (Compress). տվյալ շրջանում դրեք սեղմող վիրակապ (եթե ցավերն ուժեղանում են, ապա թուլացրեք վիրակապը)
• Բարձրացում (Elevate). բարձր դիրք տվեք տվյալ ոտքին (օրինակ՝ պառկեք և ոտնաթաթի տակ բարձ դրեք)։
• Ուղեգրում (Referral). դիմեք ձեր բժշկին:

Սովորական ցավազրկողները, օրինակ՝ Ացետամինոֆենը (Պարացետամոլ, Թայլենոլ և այլն), ըստ անհրաժեշտության կարող են օգնել ցավերի մեղմացմանը:

Կախված վնասվածքի բնույթից, ձեր բժիշկը կամ ֆիզիոթերապևտը կարող են առաջարկել՝

• կրճատել ոտնաթաթերի վրա ծանրաբեռնվածությունը (օրինակ՝ օգտագործել հենակներ)
• կատարել ձգող և ամրապնդող վարժանքներ
• վիրակապով ֆիքսել և սահմանափակել ոտնաթաթի շարժունակությունը
• օգտագործել կոշիկի ներսում դրվող ներբաններ (стильки):

Եթե ձեր աքիլեսյան ջիլը մասամբ կամ, առավել ևս՝ ամբողջապես պատռվել է, կարիք կառաջանա վիրահատությամբ այն վերականգնել: Սա կարող է նաև կրճատել ջլի կրկին պատռվելու հավանականությունը:

Հազվադեպ կարող է առաջանալ շաբաթներ կամ անգամ ամիսներ տևող երկարատև վերակագնման անհրաժեշտություն:

Աքիլեսյան ջլի վնասվածքների կանխարգելումը

Դուք կարող եք օգնել ձեր աքիլեսյան ջլի պաշտպանությանը հետևյալ եղանակներով՝

• կրեք օժանդակող կոշիկներ
• ծանր կամ կրկնվող վարժանքներից առաջ և հետո «տաքացրեք» ձեր ոտնաթաթերը նախավարժանքով
• հասեք ֆիզիկական վարժանքներով պայմանավորված ձեր ծանրաբեռնվածության մակարդակին աստիճանաբար
• ֆիզիկական աշխատանքի կամ վարժանքների ընթացքում պարբերաբար հանգստացեք
• կատարեք ձեր սրունքի ետնամասի մկանները (ձկնամկան) ամրապնդող վարժանքներ: