Կրոնի հիվանդություն. պատճառներ

Կրոնի հիվանդություն. պատճառներ
Անգլերեն անվանումը՝ Causes of Crohn’s Disease

Կրոնի հիվանդությունը կարող է զարգանալ ցանկացած տարիքում, սակայն ավելի հաճախ սկսվում է 15-30 տարեկան երիտասարդների շրջանում:

Փորձագետները համոզված չեն, թե ինչու է որոշ մարդկանց մոտ առաջանում Կրոնի հիվանդություն, սակայն համընդհանուր համոզմունք կա, որ այն չի կարող առաջանալ միայն սննդակարգի կամ միայն սթրեսի պատճառով և, ամենայն հավանականությամբ, աղիների քրոնիկ բորբոքումը կարող է զարգանալ ժառանգական, միջավայրային և վարակային գործոնների ազդեցությամբ առաջացող իմունային շեղումների պատճառով:

Ժառանգականություն

Հետազոտությունները վկայում են, որ եթե ընտանիքի անդամներից մեկնումեկի մոտ ախտորոշվել է Կրոնի հիվանդություն, ապա մյուս անդամի մոտ նույն հիվանդության ռիսկը բարձրանում է: Էթնիկ որոշ խմբերի մոտ (օրինակ՝ եվրոպական ռասա) նույնպես Կրոնի հիվանդության տարածվածությունը քիչ ավելի բարձր է:

Հետազոտողները առանձնացրել են մի քանի գեներ, որոնք ավելի հաճախ են հայտնաբերվում Կրոնի հիվանդությամբ և խոցային կոլիտով մարդկանց շրջանում, սակայն գեների և այս հիվանդությունների միջև հստակ կապվածությունը դեռևս հետագա հետազոտման և ապացուցման կարիք ունի:

Միջավայր

Կրոնի հիվանդությունն ավելի հաճախ զարգանում է սոցիալ-տնտեսական զարգացած որոշ տարածաշրջաններում բնակվող մարդկանց շրջանում (Արևմտյան Եվրոպա, Ամերիկա, Ավստրալիա), քան Ասիայի և Աֆրիկայի զարգացող երկրներում: Հետազոտողները կարծում են, որ այս հիվանդության զարգացման մեջ կարող են դեր խաղալ արևմտյան, ժամանակակից ապրելակերպի առանձնահատկությունները, որոնք մարդկանց դարձնում են աղիների քրոնիկ բորբոքման նկատմամբ ավելի խոցելի:

Վարակ

Տարբեր գիտնականներ կարծում են, որ նախկինում կրած բակտերիային վարակը որոշ մարդկանց մոտ կարող է հանդես գալ որպես իմունային ոչ նորմալ պատասխանի դրդապատճառ (տրիգեր), որն էլ բերի Կրոնի հիվանդության զարգացման: Այս վարկածը դեռևս հետազոտվում է:

Հոդվածը վերանայվել է՝ 27-05-2019