Ախտանիշներ - Կրոնի հիվանդություն

Կրոնի հիվանդության դեպքում ձեր բարակ կամ հաստ աղիքի ցանկացած հատված կարող է ներգրավվել բորբոքման մեջ:

Այն կարող է ներառել մի քանի հատվածներ, կամ բորբոքումը կարող է լինել շարունակական: Որոշ մարդկանց մոտ հիվանդությունը ներառում է միայն խթաղին (կոլոն), որը հաստ աղիքի մի մասն է:

Կրոնի հիվանդության գանգատներն ու ախտանիշները կարող են տատանվել մեղմից մինչև ծանր: Դրանք սովորաբար զարգանում են աստիճանաբար, սակայն երբեմն առաջանում են հանկարծակի՝ առանց նախազգուշական նշանների: Դուք նաև կարող եք ունենալ ժամանակաշրջաններ, երբ գանգատները կամ ախտանիշները բացակայում են (ռեմիսիա):

Երբ հիվանդությունն ակտիվ է (ախտադարձ կամ ռեցիդիվ), ախտանիշները սովորաբար ներառում են՝

• փորլուծություն
• ջերմություն
• հոգնածություն
• որովայնի ցավ և կծկանքներ (սպազմ)
• աղիների փքվածության զգացում (փորափքանք, մետեորիզմ) կամ վքնածություն
• արյուն ձեր կղանքում
• բերանի խոռոչի խոցեր
• ախորժակի նվազում և քաշի կորուստ` պայմանավորված աղիների ներծծման խանգարմամբ (մալաբսորբցիա) և թերսնուցմամբ
• ցավ կամ արտահոսք հետանցքի մոտ կամ շրջակայքում՝ բորբոքման պատճառով դեպի մաշկ բացված խուղակի պատճառով (ֆիստուլա):

Փորլուծության բնույթը պայմանավորված է բորբոքման տեղակայումից. եթե զստաղու (բարակ աղու վերջնահատված, իլեուս) բորբոքմանը բնորոշ է մեծ ծավալի ջրիկ կղանքը, ապա հաստ աղիքի բորբոքմանն ավելի բնորոշ է փոքր քանակության, սակայն հաճախակի փորլուծությունը։

Այլ գանգատներ և ախտանիշներ

Ծանր Կրոնի հիվանդությամբ մարդիկ կարող են նաև ախտանիշեր ունենալ աղիքային խողովակից դուրս: Այսպիսի արտաաղիթային ախտանիշները ներառում են՝

• մաշկի, աչքերի և հոդերի բորբոքում
• լյարդի կամ լեղուղիների բորբոքում
• երիկամների քարեր
• երկաթի անբավարարություն (սակավարյունություն կամ անեմիա)
• երեխաների մոտ աճի կամ սեռական զարգացման հետաձգում:

Ե՞րբ դիմել բժշկին

Այցելեք ձեր բժշկին, եթե ունեք ձեր աղիների դատարկման սովորույթի մշտական փոփոխություններ կամ եթե ունեք Կրոնի հիվանդության գանգատներից և ախտանիշներից որևէ մեկը, ինչպիսիք են՝

• որովայնային ցավ
• արյուն ձեր կղանքում
• սրտխառնոց և փսխում
• փորլուծություն, որը շարունակվում է ավելի քան երկու շաբաթ
• անբացատրելի քաշի կորուստ
• ջերմություն՝ ի լրումն վերը նշված ախտանիշներից որևէ մեկի: