Դեմթի պարալիզ - Նյարդային հիվանդություններ

Դեմքի ծռվածության ժամանակ մի կողմի թուլացման պատճառով դեմքը դառնում է ոչ սիմետրիկ, որը նաև կարող է ուղեկցվել աչքերի կամ բերանի շարժունակության խանգարմամբ:

Հաճախ դեմքի ծռվածությունն ինքնուրույն անցնում է, սակայն որոշ դեպքերում կարող է լինել մեկ այլ, ավելի ծանր հիվանդության ախտանիշներից մեկը, ինչպիսին է ինսուլտը:

Ինսուլտի դեպքում դեմքի ծռվածությունն ի հայտ է գալիս հանկարծակի և հաճախ ուղեկցվում մարմնի մի կեսի մկանների կաթվածով կամ թուլացմամբ:

Եթե կասկածում եք, որ ձեզ մոտ կամ մեկ այլ մարդու մոտ զարգացել է ինսուլտ, անհապաղ զանգեք 1-03 և կանչեք շտապբ օգնություն:

Ի՞նչ է դեմքի ծռվածությունը

Դեմքի ծռվածությունն առաջանում է, երբ առկա է դեմքի մկանների նյարդերի ախտահարում կամ վնասում: Նյարդի ախտահարումը կարող է կրել ժամանակավոր կամ կայուն բնույթ: Ծռվածությություն կարող է զարգանալ նաև գլխուղեղի այն շրջանի ախտահարման պատճառով, որը նյարդային ազդանշաններ է ուղարկում դեպի դիմային մկաններ:

Երբեմն դեմքի ծռվածությունը դրսևորվում է դեմքի մի կեսի միայն ստորին շրջանների սահմաններում, այլ դեպքերում՝ ամբողջ մի կեսում: Դեմքի ծռվածություն առաջացնող պատճառը կարող է ազդել նաև ակնագնդերի շարժունակության, բերանի գործունեության կամ կլման վրա:

Դեմքի ծռվածության պատճառները

Եթե առողջական այլ խնդիրներ չունեք, դեմքի ծռվածության ամենահաճախ հանդիպող պատճառը Բելի պարալիզն է: Այն զարգանում է, երբ ձեր դեմքի նյարդերից մեկնումեկը բորբոքվում է: Նյարդի բորբոքումն ունի վիրուսային ծագում և սովորաբար ինքնուրույն լավանում է, սակայն դեմքի ծռվածությունը կարող է շարունակվել 3-9 ամիս:

Իմացե՛ք ավելին Բելի պարալիզի մասին:

Դեմքի ծռվածության մեկ այլ պատճառ գլխուղեղի ուռուցքն է: Այս դեպքում դեմքի ծռվածությունը սովորաբար զարգանում է դանդաղորեն և ուղեկցվում այլ ախտանիշներով, ինչպիսիք են գլխացավերը, ցնցումները կամ լսողության կորուստը:

Իմացե՛ք ավելին գլխուղեղի ուռուցքի մասին:

Երբեմն դեմքի ծռվածություն կարող է ի հայտ գալ նորածինների մոտ, որի պատճառը գլխուղեղի տրավման է, ներարգանդային զարգացման շեղումները կամ հազվադեպ հանդիպող ժառանգական համախտանիշները:

Դեմքի ծռվածության այլ պատճառներից են գլխուղեղի վարակները և դիմային նյարդը ճնշող ուռուցքները:

Դեմքի ծռվածության ախտորոշումը և բուժումը

Բուժումը կախված է պատճառից, որն ախտարոշելու համար բժիշկը կզրուցի ձեզ հետ, կզննի ձեր դեմքը, աչքերը, կստուգի ձեր տեսողությունը, լսողությունը, խոսքը և կլման ակտը, ինչպես նաև կնշանակի որոշ հետազոտություններ, ինչպիսիք են արյան թեստերը, նյարդամկանային հաղորդականության ստուգման կամ պատկերման հետազոտությունները և այլն:

Բելի պարալիզը սովորաբար ինքնուրույն լավանում է, սակայն որոշ դեղեր կարող են օգնել դեմքի ծռվածության լիարժեք վերացմանը և դեմքի մկանների գործունեության ավելի արագ վերականգնմանը:

Եթե դեմքի ծռվածության պատճառն ինսուլտն է, գլխուղեղի ուռուցքը կամ մեկ այլ հիվանդություն, բուժումն ուղղվում է այս վիճակների, այլ ոչ թե բուն ծռվածության վերացմանը:

Եթե դեմքի ծռվածության պատճառով ձեր մի աչքը երկար ժամանակ կամ կայուն կերպով բաց է մնում, ապա բժիշկը կառաջարկի լրացուցիչ բուժումներ (աչքերի խնամք, հազվադեպ՝ վիրահատություն): Նույն կերպ, դեմքի մկանների անկառավարելի շարժումները մեղմացնելու համար ձեզ կարող են առաջարկվել բոտոքս ներարկումներ, ֆիզիոթերապիա և այլ միջոցներ:

Դեմքի ծռվածության ինքնօգնությունը

Շատ կարևոր է, որ դեմքի ծռվածություն ունենալիս հոգ տանեք ձեր աչքերի առողջությունը պահպանելու համար և կանխարգելեք ձեր այս զգայարանի ախտահարումը: Դուք կարող եք դրսում կրել արևային ակնոցներ, սկլերայի չորացման դեմ օգտագործեք արհեստական արցունքի կաթիլներ: Առանց ուշացնելու դիմեք ձեր բժշկին, եթե առաջացել է աչքի գրգռվածություն, ցավ կամ տեսողության հետ կապված խնդիրներ:

Դեմքի ծռվածություն ունեցող մարդիկ կարող են ունենալ նաև հուզական խնդիրներ, ինչպես նաև տեսողության, լսողության, խոսքի, հեղուկներ և սնունդ ընդունելու հետ կապված խնդիրներ: Խոսեք ձեր բժշկի հետ, եթե ձեզ մոտ կան նման խնդիրներ և անպայման հետևեք նրա խորհուրդներին:

Ե՞րբ դիմել բժշկին

Դիմեք ձեր բժշկին, եթե զգում եք դեմքի թմրածություն կամ թուլություն:

Անհապաղ զանգեք 1-03 և կանչեք շտապ օգնություն, եթե դեմքի ծռվածության հետ միասին զարգանում է թվարկված նշաններից մեկնումեկը՝

• սաստիկ գլխացավ
• ցնցումներ
• կուրություն
• աջ, ձախ կամ երկու ձեռքերում թուլություն, թմրածություն կամ վեր բարձրացնելու անկարողություն
• խոսքի աղավաղում կամ այլ խնդիրներ
• կլման դժվարացում: