Գրադարան

Ֆոլատի թեստ

Ֆոլատի թեստ

Time Read 2 րոպե

Ֆոլատը կարևոր սննդանյութ է, որը մասնակցում է նորմալ արյան կարմիր բջիջների (էրիթրոցիտների) արտադրությանը և բջիջների ու նյարդային հյուսվածքի վերականգնմանը։

Վիտամին B12-ի հետ միասին ֆոլատի թեստը նշանակվում է, որ ստուգվի արյան մեջ այս երկու վիտամինների մակարդակները։

Ի՞նչն են հետազոտում

Ֆոլատը սննդանյութ է, որը խիստ նման է ֆոլաթթվին։ Վերջինս հայտնի է նաև որպես վիտամին B9:

Ֆոլատը սովորաբար հայտնաբերվում է կանաչատերև բանջարեղեններում, մրգերում, չոր լոբիում և ոլոռում, ինչպես նաև ձավարեղենի տարբեր տեսակներում։ Այս սննդանյութը կարևոր է նորմալ աճի համար, հատկապես երեխաների զարգացման գործընթացում, ուստի ֆոլատն ավելացվում է հացին, ալյուրին և ձավարեղենին։

Ֆոլատի թեստով չափվում է այս սննդանյութի մակարդակը ձեր արյան մեջ (արյան շիճուկի ֆոլատ) կամ արյան կարմիր բջիջներում (էրիթրոցիտների ֆոլատ)։

Ինչո՞ւ է այս թեստը նշանակվում

Կան տարբեր պատճառներ, որոնք ֆոլատի թեստը դարձնում են կարևոր։ Օրինակներից են՝

  • ֆոլատի ցածր մակարդակները կարող են հանգեցնել արյան կարմիր բջիջների (էրիթրոցիտների) ոչ նորմալ հասունացման կամ ոչ բավարար քանակով առաջացման (անեմիա)
  • թեստը կարող է նշանակվել ձեր նյարդերի ախտահարման հետազոտման մեջ
  • որոշ հիվանդություններ, ինչպիսիք են Կրոնի հիվանդությունը կամ ցիստիկ ֆիբրոզը (մուկովիսցեդոզ), կարող են խոչընդոտել աղիներից ֆոլատի ներծծումը
  • գիտակցության խանգարման, օրինակ՝ խառնաշփոթ վիճակի կամ ապակողմնորոշման պատճառներից մեկը կարող է լինել ֆոլատի պակասը
  • ֆոլատը կենսական նշանակություն ունի պտղի գլխուղեղի և ողնուղեղի նորմալ զարգացման մեջ, ուստի բազմաթիվ կանայք անցնում են այս թեստը մինչև հղիանալը։

Ձեր բժիշկը նաև կարող է նշանակել ֆոլատի թեստ՝ հսկելու ֆոլատի կամ վիտամին B12-ի ցածր մակարդակների բուժումը։

Ինչպե՞ս նախապատրաստվել այս թեստին

Դուք պետք է լաբորատորիա այցելեք սննդի վերջին ընդունումից առնվազն 6-8 ժամ հետո։

Արդյունքների մեկնաբանումը

Կան արյան շիճուկում ֆոլատի ցածր մակարդակի տարբեր հնարավոր պատճառներ, օրինակ՝

  • ձեր սովորական սննդակարգում քիչ են կամ բացակայում են ֆոլատի բավարար քանակներ պարունակող մթերքները
  • խանգարված է ձեր աղիներից ֆոլատի ներծծումը
  • դուք կորցնում եք ձեր օրգանիզմի ֆոլատը որոշ դեղերի, լյարդային կամ երիկամային հիվանդության պատճառով
  • դուք սովորականից ավելի շատ ֆոլատի կարիք ունեք, օրինակ, երբ հղի եք։

Սա նշանակում է, որ դուք պետք է ձեր թեստի արդյունքները քննարկեք ձեր բժշկի հետ։

Լրացուցիչ տեղեկատվություն

Ֆոլատի թեստի մասին

Այցելեք մեր կայքի Մեդեքս-Lab բաժինը, որ իմանաք ֆոլատի և անեմիայի մյուս թեստերի մասին ավելի մանրակրկիտ տեղեկություններ։

Արյան թեստի մասին

Կարդացեք Մեդեքս-Health բաժնի արյան թեստերի ուղեցույցը, որ ընդհանուր տեղեկություններ իմանաք արյան թեստերի մասին, այդ թվում՝

  • ինչի՞ մասին հոգ տանել մինչև լաբորատորիա այցելելը
  • ի՞նչ է տեղի ունենում արյան հետազոտության ընթացքում
  • ինչպիսի՞ ճշգրություն ունեն հետազոտության արդյունքները։

Հոդվածը տեղադրվել է՝ 25-05-2019 վերանայվել է՝ 10-11-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով