Մինչև 3 ամսական - Նորածնի զարգացում

Նորածնի զարգացումը սկսվում է ծնվելու պահից: Տեղեկացեք նորածինների զարգացման հիմնական փուլերի մասին՝ ծնվելուց մինչև 3-րդ ամիսը, և իմացեք, թե ինչ անել, երբ ինչ-որ բան այն չէ:

Երեխայի կյանքի առաջին երեք ամիսների ընթացքում բազմաթիվ բաներ են տեղի ունենում: Նորածինների մեծամասնությունը հասնում է այս տարիքին բնորոշ որոշակի նշակետերի, սակայն յուրաքանչյուր նորածին զարգանում է առանձնահատուկ ձևով: Ուստի, ակնկալեք, որ ձեր երեխան կաճի և կզարգանա իր սեփական տեմպերով: Հիշեք, որ վաղաժամ ծնված երեխայի զարգացումը կարող է ընթանալ որոշակի հետաձգումներով: Քանի դեռ ծանոթանում եք ձեր բալիկի հետ, տեղեկացեք նաև նորածինների զարգացման այս ամենավաղ փուլի ընդհանուր առանձնահատկությունների մասին:

Ի՞նչ ակնկալել

Սկզբում նորածնին խնամելը կարող է թվալ որպես կերակրման, տակդիրները փոխելու և նրա լացը հանգստացնելու անվերջ շրջան: Բայց շուտով ի հայտ կգան ձեր երեխայի աճի և զարգացման նշանները:

• Շարժողական (մոտոր) հմտություններ. ձեր նորածնի շարժումները, հավանաբար, սկզբում կտրուկ կլինեն՝ նման ջղաձգմանը: Սակայն, հաջորդ երկու ամսվա ընթացքում երեխաների մեծ մասը սկսում է վերահսկել շարժումները: Ձեր նորածնի պարանոցն այս ընթացքում նույնպես կուժեղանա: Երկրորդ ամսվա վերջում, երբ դուք գրկում եք ձեր երեխային, նա պետք է կարողանա ինքնուրույն պահել գլուխը: Երրորդ ամսվա վերջում նորածինների մեծ մասը փորի վրա պառկած վիճակում, արմունկներին հենվելով կարող է բարձրացնել գլուխը և կրծքավանդակը: Այս ընթացքում նորածինները նաև սովորում են աշխատացնել դաստակները: Երեխայի մատները սկսում են բացվել-փակվել, և երրորդ ամսվա վերջում նա արդեն կարող է վերցնել խաղալիքները և տանել դրանք դեպի բերանը:
• Լսողություն. նորածինները կարող են լսել, բայց դեռ չեն հասկանում, թե ինչ են նշանակում ձայները: 1 ամսականում նրանք սկսում են ճանաչել ծանոթ ձայները և կարող են դա ցույց տալ՝ շրջելով գլուխը: 3 ամսականում ձեր նորածինը կարող է զգացմունքային արձագանքել այս հնչյուններին: Կամ նա կարող է լռել՝ ձեր ձայնը լսելու համար:
• Տեսողություն. առաջին երեք ամսում երեխաները մեծ ուշադրություն են դարձնում դեմքերին: Այս ընթացքում ձեր բալիկն, ամենայն հավանականությամբ, ձեռք կբերի առարկային հետևելու ունակություն՝ երբ այն շարժվում է իր աչքերի առջև: Նորածիններն աստիճանաբար կարողանում են կենտրոնանալ ավելի հեռու գտնվող առարկաների վրա: Մոտ 2 ամսականում նրանք կարող են սկսել ժպտալ, երբ ուրիշները ժպտում են նրանց: Երրորդ ամսվա վերջում ձեր երեխան պետք է տեսողական կապ հաստատի: Նա նաև կարող է սկսել տարբերել գույները:
• Հաղորդակցություն. նորածիններն ընկալում են այնպիսի տեղեկություններ, ինչպիսիք են իրենց խնամողների ժեստերը (մարմնի լեզուն), արտահայտությունները և այն, թե ինչպես են իրենց գրկում: Բայց այն ձևը, որի օգնությամբ նորածինները հայտնում իրենց կարիքները, հիմնականում լացն է: 2 ամսական հասակում ձեր բալիկը կարող է ժպտալ և կրկնել ձայնավոր հնչյունները, երբ դուք խոսում եք կամ խաղում եք միասին: Եվ հաջորդ ամսվա ընթացքում ձեր երեխան կարող է սկսել փորձարկել այլ հնչյուններ՝ նման ճռռոցին կամ փչելուն: Նա կարող է նմանակել հնչյունները և ժպտալ ձեր ձայնի վրա:

Ինչպե՞ս նպաստել ձեր նորածնի զարգացմանը

Ձեր երեխայի հետ ձեր փոխահարբերությունները նրա զարգացման հիմքն են: Վստահեք ձեր երեխայի կարիքները բավարարելու ձեր ունակությանը:

Մի կարևոր բան, որ կարող եք անել ձեր երեխայի համար, ձեր մասին հոգ տանելն է: Որոշ նոր մայրեր առաջին ամսվա ընթացքում հայտնվում են հուզական փոթորիկների մեջ: Սա տարածված երևույթ է: Նման դեպքերում օգտակար կարող է լինել համոզվելը, որ քնում եք, երբ կարող եք: Օգտակար է նաև շարունակել անել այն, ինչ ձեզ դուր է գալիս: Եվ, ըստ անհրաժեշտության, օգնություն խնդրեք տնային գործերում կամ ձեր բալիկին պահելու հարցում: Այնուամենայնիվ, տեղեկացրեք ձեր բժշկին, եթե զգում եք, որ սաստիկ տխուր եք կամ տխուր եք զգում ավելի քան մի քանի շաբաթ:

Ընդհանուր առմամբ, ձեր նորածնի զարգացմանը կարող են օգնել հետևյալ խորհուրդները:

• Գրկեք ձեր երեխային. մաշկ-մաշկ շփումն օգնում է ձեր երեխայի գլխուղեղի զարգացմանը: Երեխային գրկելը նաև կարող է օգնել նրան, որ զգա անվտանգ, ապահով և սիրված: Թողեք, որ ձեր բալիկը բռնի ձեր ճկույթը և դիպչի ձեր դեմքին:
• Խոսեք ազատորեն. երբ ձեր բալիկը նայում է ձեզ, նրա հետ հաստատեք տեսողական կապ: Խոսեք ձեր երեխայի հետ և փոխեք ձեր արտահայտություններն ու ձայնի տոնը: Պարզ խոսքային հաղորդակցումը հիմք է դնում նորածնի լեզվի զարգացման համար: Երգեցեք։ Բարձրաձայն կարդացեք մի պատմություն: Արձագանքեք ձեր երեխայի ծիծաղներին և կարկաչներին:
• Պահպանեք հետաքրքրությունը․ տվեք ձեր երեխային տարբեր մակերևույթներով կամ վառ նախշերով խաղալիքներ: Ուշադրություն դարձնելով, երեխային պառկացրեք փորիկի վրա, որ խաղա: Հետաքրքրություն առաջացնող աղմուկ հանեք՝ ձեր երեխային խրախուսելու, որ բարձրացնի գլուխը: Շատ նորածիններ այնքան էլ չեն սիրում փորիկի վրա մնալը, և դա նորմալ է: Սկսեք փորիկի վրա պառկացնելու կարճատև փորձերից: Բայց շարունակեք փորձերը: Եթե նա հոգնում է, շուռ տվեք մեջքի վրա, որ քնի:
• Բայց ոչ չափից շատ հետաքրքիր․ նորածնի համար ամեն ինչ նորություն է, և նոր բաներ սովորելը կարող է նրա համար գերհոգնեցուցիչ դառնալ: Նրա լացը կարող է ձեզ հուշել, որ հանգստանալու կարիք ունի: Երեխաները, ովքեր շրջվում են ձեզնից կամ կորացնում են իրենց մեջքը, նույնպես կարող են ձեզ հասկացնել, որ իրենց զգայարանները գերծանրաբեռնված են (գերխթանված):
• Արագ արձագանքեք լացին․ նորածինների մեծամասնության մոտ լացի գագաթնակետը հասնում է ծնվելուց մոտ վեց շաբաթ հետո, այնուհետև աստիճանաբար նվազում է: Արագ արձագանքեք, երբ ձեր երեխան լաց է լինում: Դուք չեք վնասի ձեր երեխային չափազանց մեծ ուշադրությամբ: Ձեր խնամքն օգնում է ամուր կապ հաստատել ձեր նորածնի հետ: Բայց լացը նաև կարող է լինել երեխայի զգացմունքները կառավարելու միջոց: Հնարավոր է՝ ոչինչ չկարողանաք անել, բացի ձեր երեխայի կողքը լինելուց: Ուստի, թեև դժվար է լսել, թե ինչպես է ձեր բալիկը լացումը, մի՛ ընդունեք ձեր երեխայի լացը որպես վատ խնամքի արդյունք:

Երբ ինչ-որ բան այն չէ

Ձեր նորածին երեխան կարող է ժամանակից շուտ հասնել զարգացման որոշ նշակետերի կամ հետ մնալ մյուսներից: Սա սովորական է: Բայց լավ գաղափար է իմանալ զարգացման հետաձգման որոշ նախազգուշական նշանների մասին: Խոսեք ձեր երեխայի բժշկի հետ, եթե նկատում եք այս «կարմիր դրոշակներից» որևէ մեկը՝

• կերակրման հետ կապված խնդիրներ
• չի արձագանքում բարձր ձայներին
• աչքերով չի հետևում շարժվող առարկաներին
• ձեռքերը կամ ոտքերը թվում են կարկամված (ձգված) և քիչ շարժուն կամ հակառակը՝ վերջույթները թվում են խիստ թույլ:

Հիշեք, որ յուրաքանչյուր երեխա առանձնահատուկ է: Բայց ձեր բնազդները նույնպես կարևոր են: Եթե ձեր ներքին ձայնը ձեզ ասում է, որ զանգեք ձեր երեխայի բժշկին, արեք դա: Որքան շուտ հայտնաբերվի խնդիրը, այնքան շուտ հնարավոր կլինի այն բուժել: