Նկարագիր - Երիկամային կիստա

​Երիկամի կիստան դեղնավուն հեղուկ պարունակող և բարակ շարակցահյուսվածքային պատիճով սահմանազատված կլորավուն գոյացություն է, որն առաջանալուց հետո ինքնուրույն չի ներծծվում և չի անհետանում​։

Երիկամի կիստաները հեղուկով լցված կլորավուն բշտեր են, որոնք առաջանում են երիկամների վրա կամ ներսում: Դրանք կարող են կապված լինել երիկամային գործունեությունը վնասող ծանր հիվանդությունների հետ, սակայն, ավելի հաճախ իրենցից ներկայացնում են այսպես կոչված երիկամի հասարակ կիստաներ, որոնք քաղցկեղային չեն և հազվադեպ են բարդություններ առաջացնում:

Դեռևս պարզ չէ, թե ինչու են որոշ մարդկանց երիկամներում առաջանում հասարակ կիստաներ: Երիկամներից մեկնումեկի մակերեսին սովորաբար ձևավորվում է միայն մեկ բուշտ, սակայն կարող են ձևավորվել նաև բազմաթիվ բշտեր ինչպես մեկ, այնպես էլ երկու երիկամներում: Երիկամի հասարակ կիստան նույն այն կիստան չէ, որն առաջանում է պոլիկիստոզային երիկամային հիվանդության ժամանակ:

Երիկամի հասարակ կիստաները հաճախ հայտնաբերվում են պատահաբար՝ մեկ այլ հիվանդության կապակցությամբ նշանակված որևէ պատկերային հետազոտության միջոցով: Սովորաբար որևէ գանգատ կամ այլ ախտանիշ չառաջացնող հասարակ կիստաները բուժման կարիք չունեն: Այլ դեպքերում գուցե առաջանա վիրահատության կարիք: