Լյարդային պրոբաներ - Լաբորատոր թեստեր

Լյարդի գործունեության թեստերը սովորաբար արյան թեստեր են որոնք տեղեկատվություն են տրամադրում այն մասին, թե ինչպես է գործում լյարդը:

Այս թեստերն այլ կերպ անվանվում են լյարդային թեստեր, լյարդային պրոֆիլ կամ լյարդային պանել, իսկ անցյալում նաև՝ լյարդային պրոբաներ:

Լյարդի գործունեության թեստերով չափվում են մի շարք սպիտակուցների և ֆերմենտների (էնզիմներ) մակարդակները, որոնք կամ արտադրվում են լյարդի բջիջների (հեպատոցիտներ) կողմից կամ հայտնվում են արյան մեջ, երբ լյարդի բջիջներն ախտահարված կամ վնասված են:

Ի՞նչն են հետազոտում

Լյարդը ձեր օրգանիզմի ամենամեծ մարսողական գեղձն է, որը գտնվում է որովայնի վերջին աջ շրջանում։ Այն իրականացնում է ավելի քան 500 գործառույթ, որոնցից են՝ ալկոհոլի և թմրամիջոցների տրոհում, թունավոր քիմիական նյութերի զտում, վիտամինների և միներալների պահպանում, լեղու, սպիտակուցների և ֆերմենտների արտադրություն:

Լյարդային թեստերի ժամանակ չափում են արյան մեջ սպիտակուցների, ֆերմենտների և այլ սուբստրատների մակարդակները: Դրանք կարող են ցույց տալ, թե արդյոք ձեր լյարդը նորմալ է գործում, թե առկա է լյարդի բջիջների վնասում կամ լյարդով արյան հոսքի խանգարում:

Ինչո՞ւ է այս թեստը նշանակվում

Բժիշկները հաճախ այս հետազոտությունները նշանակում են այն մարդկանց, ովքեր՝

• ունեն լյարդի հիվանդություն կամ վնասում
• վարակված են կամ գուցե վարակված են վիրուսային հեպատիտով
• չարաշահում են ալկոհոլ
• ունեն լյարդի հիվանդության վերաբերյալ ընտանեկան պատմություն
• օգտագործում են թմրամիջոցներ, որոնք կարող են վնասել լյարդը:

Բժիշկը կարող է ձեզ նշանակել լյարդային թեստեր, եթե ունեք՝

• դեղնուկ
• մուգ մեզ
• ընդհանուր թուլություն կամ հոգնածության զգացում
• ախորժակի անկում
• սրտխառնոց կամ փսխում
• որովայնային ցավ կամ ասցիտ (հեղուկի կուտակում որովայնում)
• անբացատրելի մաշկային քոր:

Ինչպե՞ս նախապատրաստվել այս թեստին

Եթե ձեր բժիշկը որևէ կոնկրետ ցուցում չի տվել, ապա որևէ նախապատրաստություն պետք չէ:

Ձեր արդյունքների մեկնաբանումը

Լյարդային թեստերից յուրաքանչյուրը ձեր լյարդի գործունեության վերաբերյալ տրամադրում է առանձնահատուկ տեղեկատվություն։ Լաբորատոր թեստի արդյունքները չեն կարող հաստատել որևէ առանձին հիվանդության առկայությունը, սակայն դրանց համալիր արդյունքները կարող են վկայել լյարդային հիվանդության կամ վնասման առանձնահատկությունների մասին:

Եթե ձեր լյարդի գործունեության թեստերը նորմայից շեղված են, ձեր բժիշկը նաև կարող է նշանակել լրացուցիչ հետազոտություններ, որ հայտնաբերի լյարդային հիվանդության կամ վնասման պատճառը:

Որոշ թեստեր կարող են փոփոխվել նաև արտալյարդային պատճառներից, օրինակ՝ ոսկրային և այլ հիվանդություններ։ Հնարավոր է նաև, որ այդ թեստերը նորմայից թեթև շեղվեն առանց որևէ առողջական խնդրի: Ուստի, բոլոր դեպքերում, կարևոր է, որ ձեր բժշկի հետ քննարկեք հետազոտության արդյունքները:

Լրացուցիչ տեղեկատվություն

Լյարդի գործունեության թեստերի մասին

Այցելեք մեր կայքի Մեդեքս-Lab բաժինը, որպեսզի իմանաք լյարդային թեստերի մասին ավելի մանրակրկիտ տեղեկություններ:

Արյան թեստերի մասին

Կարդացեք Մեդեքս-Health բաժնի արյան թեստերի ուղեցույցը, որ ընդհանուր տեղեկություններ իմանաք արյան թեստերի մասին, այդ թվում՝

• ինչի՞ մասին հոգ տանել մինչև լաբորատորիա այցելելը
• ի՞նչ է տեղի ունենում արյան հետազոտության ընթացքում
• ինչպիսի՞ ճշգրություն ունեն հետազոտության արդյունքները: