Ինչպես բազմաթիվ անձնային խանգարումների, այնպես էլ նարցիստիկ անձնային խանգարման հստակ պատճառը հայտնի չէ:
Ամենայն հավանականությամբ այս հիվանդությունը կարող է զարգանալ գեների, վաղ մանկական տարիքի փորձի և հոգեբանական գործոնների համակցված ազդեցության պատճառով:
Նարցիստիկ անձնային խանգարման առաջացմանը նպաստող վաղ մանկական տարիքի ռիսկի գործոններից են՝
- երեխայի նկատմամբ մշտական սառը և զգացմունքներից զուրկ վերաբերմունքը
- երեխային չափազանց գովաբանելը և այդ մասին բոլոր տեղերը բարձրաձայնելը, երբ ծնողները գերկենտրոնանում են իրենց երեխայի «կատարյալ» արտաքին տեսքի կամ որևէ «չլսված» հմտության («տաղանդի») վրա
- անկանխատեսելի կամ արհամարական խնամք
- չափից դուրս շատ կամ անտեղի հանդիմանություն և քննադատություն
- բռնություն
- տրավմա
- ծայրահեղացված բարձր ակնկալիքներ:
Այլ հնարավոր գործոններից են՝
- գենետիկ շեղումներ, որոնք հնարավոր է, որ ազդում են գլխուղեղի և վարքագծերի միջև փոխկապվածության վրա
- գերզգայուն բնավորություն:
Թեև նարցիստիկ անձնային խանգարման պատճառների վերաբերյալ բոլոր հարցերին չկա որևէ եզակի պատասխան, ոլորտի մասնագետները համակարծիք են, որ որքան շուտ է ախտորոշվում և սկսվում հիվանդության բուժումը, այդքան մեծանում է մարդու կյանքի որակի բարելավման հավանականությունը:
Հոդվածը հրապարակվել է՝ 14-04-2020
Վերջին վերանայում՝ 23-04-2024