Ծայրամասային նյարդերի հիվանդություններ -

​Ծայրամասային կամ պերիֆերիկ նյարդերը ներառում են ձեր գլխուղեղից և ողնուղեղից դուրս գտնվող նյարդերը։​

Դրանց են պատկանում, օրինակ, ձեր դեմքի, վերջույթների և մարմնի նյարդերը։ Այս նյարդերը նյարդահաղորդչական կապ են ստեղծում մի կողմից գլխուղեղի ու ողնուղեղի և մյուս կողմից մկանների, մաշկի և ներքին օրգանների միջև։

Ախտահարվելիս ծայրամասային նյարդերը չեն կարողանում պատշաճ կերպով իրականացնել նյարդահաղորդականությունը՝ աղճատելով կապը ձեր գլխուղեղի ու ողնուղեղի և մարմնի մյուս մասերի և ներքին օրգանների միջև։

Ծայրամասային նյարդերի ախտահարման հանրահայտ պատճառներից են՝

• ներզատական (էնդոկրին) համակարգի հիվանդություններ, օրինակ՝ շաքարային դիաբետ և թերակտիվ վահանձև գեղձ (հիպոթիրեոզ)
• վիրուսային ծագման հիվանդություններ, օրինակ՝ Գիյան-Բարրեի համախտանիշ
• նյարդերը ճնշող հիվանդություններ, օրինակ՝ կարպալ (դաստակային) թունելի համախտանիշ
• աուտոիմուն հիվանդություններ, օրինակ՝ ռևմատոիդ արթրիտ և համակարգային կարմիր գայլախտ (լուպուս)
• վարակներ, այդ թվում՝ վիրուսային, ինչպիսիք են գոտևորող որքինը, ցիտոմեգալովիրուսը, Էպշտեյն-Բարի վիրուսը և ՄԻԱՎ-ը
• երիկամային գործունեության խանգարում, երբ նյութափոխանակության թունավոր արգասիքները կուտակվում են օրգանիզմում և ախտահարում ծայրամասային նյարդերը
• քաղցկեղներ, որոնք ճնշում կամ սեղմում են հարակից նյարդերը կամ ուռուցքներ, որոնք ծագում են անմիջապես նյարդային հյուսվածքից
• քաղցկեղի ճառագայթային թերապիա, որը կարող է վնասել ծայրամասային նյարդերը
• որոշ դեղերի (քիմիոթերապիա, նեյրոտոքսիկ դեղեր), արտադրական թույների (կապար, սնդիկ, մկնդեղ) և ալկոհոլի նեյրոտոքսիկ ազդեցություն։

Ծայրամասային նյարդերը նաև կարող են վնասվել ֆիզիկական վնասվածքի (տրավմաներ), վիրահատական վնասվածքի և շարունակական լարվածության պատճառով։ Որոշ մարդիկ կարող են ծնվել ծայրամասային նյարդերի հիվանդություններով։

Եթե ունեք ծայրամասային նյարդի ախտահարում, կարող եք նշել հետևյալ գանգատները կամ ախտանիշները՝

• մկանային խնդիրներ, այդ թվում՝ թուլություն, մշտական ձգվածություն, ջղաձգումներ կամ մկանային ցնցումներ
• զգացողական (սենսոր) խանգարումներ՝ ծակծկոցներ, թմրածություն, այրող բնույթի կամ սուր ցավ
• մաշկային գերզգայունություն
• ցածր արյան ճնշում։

Կախված նրանից, թե որ նյարդն է ախտահարվել, դուք կարող եք նաև նշել աղիների գործունեության խանգարումներ (օրինակ՝ փորլուծություն կամ փորկապություն), տաք միջավայրի անտանելիություն, արյան ճնշման փոփոխություններ, որը կարող է ուղեկցվել գլխապտույտով։

Իմացե՛ք ավելին ծայրամասային նեյրոպաթիայի մասին: