Նախածննդյան թեստեր - Հղիության հսկողություն

Հղիության ընթացքում ձեզ կառաջարկեն տարբեր հետազոտություններ, այդ թվում՝ արյան թեստ և գերձայնային հետազոտություն:

Այս հետազոտությունների «փաթեթը» կազմված է այնպես, որ ստուգվի այն ամենը, ինչ կարող է խնդիր առաջացնել ձեր հղիության ընթացքում կամ ծննդաբերությունից հետո:

Ինչպես ցանկացած այլ, այնպես էլ այս հետազոտությունները կամավոր են: Այնուամենայնիվ, կարևոր է հասկանալ ձեզ առաջարկվող հետազոտությունների նպատակը, որ կարողանաք դրանց վերաբերյալ կայացնել տեղեկացված որոշում: Եթե ունեք հարցեր, ճիշտ կլինի դրանք ուղղել ձեր բժշկին հետազոտություններից առաջ, և ոչ թե հետո (թեև կարող եք հարցերի մի մասը թողնել արդյունքները ստանալուց հետո):

Մարմնի կշիռ և հասակ

Ձեր առաջին այցի ընթացքում բուժքույրը կառաջարկի կշռվել և չափել հասակը: Այս ցուցանիշներն անհրաժեշտ են, որպեսզի հաշվարկվի ձեր մարմնի զանգվածի գործակիցը (ՄԶԳ, անգլերեն՝ BMI): Այն կանայք, ում քաշը հասակի նկատմամբ բարձր է (ավելորդ քաշ կամ գիրություն), ունեն հղիության ընթացքում խնդիրներ ունենալու ավելի բարձր ռիսկ:

Կանանց մեծ մասը հղիության ընթացքում «ծանրանում է» 11-16 կիլոգրամով, որի մեծ մասը՝ 20 շաբաթականից հետո: Ավելացած քաշի մեծ մասը պայմանավորված է աճող երեխայով, սակայն ձեր մարմինը նաև պահեստավորում է ճարպի աղբյուրներ, որոնք օգտագործելու է ծննդաբերությունից հետո կրծքի կաթ արտադրելիս: Հղիության ընթացքում շատ կարևոր է, որ ստանաք ճիշտ սնունդ և կատարեք կանոնավոր մարզանքներ:

Օգտվեք Մեդեքսի ՄԶԳ առցանց հաշվիչից՝ տեղեկանալու մինչև հղիությունը ձեր ՄԶԳ-ի մասին:

Գերձայնային հետազոտություններ

Հղիության ընթացքում ձեզ մի քանի անգամ կառաջարկեն գերձայնային հետազոտություն (սոնոգրաֆիա):

Նախ, 10-14 շաբաթական հղիության ընթացքում սոնոգրաֆիան թույլ է տալիս ճշտել հղիության ժամկետը (կոչվում է հղիության սոնոգրաֆիկ ժամկետ, որը կարող է տարբերվել վերջին դաշտանով հաշվարկված օրացուցային ժամկետից), ինչպես նաև չափել այսպես կոչված պտղի օձիքային գործակիցը, որը թույլ է տալիս հայտնաբերել պտղի զարգացման քրոմոսոմային արատները վաղ փուլերում:

Հաջորդ, 20-24 շաբաթականում կատարված սոնոգրաֆիայով չափվում է պտուղը, գնահատվում է ընկերքի վիճակը և պտղաջրերի քանակը: Դարձյալ, բժիշկ-սոնոգրաֆիստը համոզվում է պտղի քրոմոսոմային արատների նշանների բացակայության մեջ: Ըստ անհրաժեշտության, նաև անցկացվում է պտղի դոպլերոգրաֆիա:

Վերջապես, 32-34 շաբաթականում բժիշկ-սոնոգրաֆիստը գնահատում է պտղի վիճակը, դիրքը և համոզվում հղիության ուշ շրջանում ի հայտ եկող զարգացման արատների բացակայության մեջ:

Այս երեք պլանային սոնոգրաֆիաներից բացի, ըստ անհրաժեշտության ձեզ կարող են առաջարկել նաև լրացուցիչ գերձայնային հետազոտություններ:

Մեզի թեստ

Ձեր անտենատալ այցերի ժամանակ ձեզ կխնդրեն հանձնել մեզի թեստ, որ ստուգվեն մի շարք ցուցանիշներ, այդ թվում՝ սպիտակուց (պրոտեին) կամ ալբումին, որոնք կարող են վկայել բուժման ենթակա վարակի առկայության մասին: Մեզում սպիտակուցը կամ ալբումին կարող են լինել նաև հղիությամբ պայմանավորված բարձր արյան ճնշման (հիպերտենզիա) նշաններից մեկը, որը կարող է վկայել պրեէկլամպսիայի մասին:

Արյան ճնշում

Ձեր արյան ճնշումը չափվում է յուրաքանչյուր անտենատալ այցի ժամանակ: Տարածված երևույթ է, երբ հղիության կեսերին ձեր ճնշումը նորմայից քիչ ցածր է: Սա խնդրահարույց վիճակ չէ, թեև արագ կանգնելիս կարող է առաջացնել թույլ գլխապտույտ: Եթե այս երևույթը ձեզ անհանգստացնում է, խոսեք այդ մասին ձեր բժշկի հետ: Հղիության ուշ շրջանում արյան ճնշման բարձրացումը կարող է լինել պրեէկլամպսիայի նշան:

Արյան թեստեր

Հղիության ընթացքում ձեզ մի քանի անգամ կարող են առաջարկել նաև արյան թեստեր: Սա կարող է ներառել արյան ընդհանուր քննությունը (սակավարյունության ստուգում), ռեզուս (RhD) գործոնի որոշումը, երկաթի մակարդի որոշումը, արյան գլյուկոզի (շաքարի) որոշումը (գեստացիոն դիաբետի ստուգում), վարակների ստուգումը և այլն:

Իմացե՛ք ավելին հղիության ընթացքում արյան հետազոտությունների մասին:

Արգանդի վզիկի սքրինինգային հետազոտություն

Վզիկի սքրինինգային հետազոտությունը փոխարինել է նախկինում հայտնի ՊԱՊ թեստին, քանի որ ավելի ճշգրտորեն է հայտնաբերում մարդու պապիլոմավիրուսը (HPV): Սա տարածված վիրուս է, որը կարող է փոփոխության ենթարկել վզիկի բջիջները, որն էլ հազվադեպ նպաստի քաղցկեղի առաջացմանը:

B խմբի ստերպոկոկ

B խմբի ստրեպտոկոկը բակտերիա է, որն առկա է մարդկանց 30%-ի մոտ, սակայն հազվադեպ է առաջացնում ախտահարում կամ ախտանիշներ: Կանանց մոտ այն հայտնաբերվում է աղիներում և հեշտոցում և հղիների մեծ մասի մոտ որևէ խնդիր չի առաջացնում, սակայն, քիչ թվով հղիների մոտ կարող է վարակել երեխային: Վարակը երեխային կարող է անցնել ծննդաբերությունից անմիջապես առաջ կամ բուն ծննդաբերության ընթացքում՝ առաջացնելով լուրջ հիվանդություն:

Եթե արդեն ունեցել եք երեխա, ով ունեցել է B խմբի ստրեպտոկոկային վարակ, բժիշկը կարող է ծննդաբերության ընթացքում առաջարկել հակաբիոտիկ, որ նվազեցնի նոր երեխայի մոտ նույն վարակի զարգացման ռիսկը: Եթե հղիության ընթացքում ունեք B խմբի ստրեպտոկոկով հարուցված միզուղիների վարակ (օրինակ՝ ցիստիտ), ծննդաբերության ժամանակ ձեզ կրկին կարող են նշանակել որևէ հակաբիոտիկ:

B խմբի ստրեպտոկոկի թեստի համար ձեզնից վերցնում են հեշտոցից քսուք, սովորաբար՝ 36 շաբաթականում: Դրական պատասխանի դեպքում բժիշկը կարող է նախատեսել ծննդաբերության ընթացքում հակաբիոտիկի օգտագործում: