Ախտանիշներ - Փոփոխված մեզի գույն

Մեզի սովորական գույնը փոփոխական է:

Մեզի գույնը կախված է նրանից, թե որքան ջուր եք խմում: Հեղուկները նոսրացնում են մեզին դեղին գույն հաղորդող գունանյութերը (պիգմենտները), ուստի, որքան շատ եք խմում, այնքան ավելի մաքուր՝ թափանցիկ և անգույն է ձեր մեզը: Երբ քիչ եք խմում կամ ջրազրկված եք, հակառակը, մեզի դեղին գույնն ավելի արտահայտիչ է դառնում։

Սակայն մեզը նաև կարող է ստանալ տարբեր՝ անսովոր գույներ կամ երանգներ: Օրինակ, մեզը կարող է դառնալ՝

• կարմիր կամ վարդագույն
• կապույտ
• կանաչ
• նարնջագույն
• մուգ շագանակագույն
• պղտոր սպիտակավուն:

Ե՞րբ դիմել բժշկին

Պայմանավորվեք և այցելեք ձեր բժշկին, եթե նկատել եք ձեր մեզի հետևյալ փոփոխությունները:

• Արյուն ձեր մեզի մեջ. սա տարածված է միզուղիների վարակների և երիկամների քարերի դեպքում: Այս խնդիրները հաճախ ուղեկցվում են ցավերով։ Անցավ արյունահոսությունը կարող է լինել ավելի լուրջ խնդրի նշան, ինչպիսին է քաղցկեղը:
• Մուգ կամ նարնջագույն մեզ․ սա կարող է հուշել այն մասին, որ ձեր լյարդը ճիշտ չի գործում, հատկապես, եթե նաև ունեք գունազրկված կղանք, դեղնավուն մաշկ ու աչքեր: