Վիտամին B12-ը մասնակցում է արյան բջիջների՝ ձևավոր տարրերի արտադրությանը, ինչպես նաև ապահովում է նյարդերի նորմալ գործունեությունը։

Վիտամին B12-ը հայտնի է նաև որպես կոբալամին:

Ի՞նչն են հետազոտում

Այս թեստի միջոցով չափվում է արյան մեջ վիտամին B12-ի մակարդակը։ Սովորաբար, միաժամանակ հետազոտվում է նաև ֆոլատը։

Մենք այս վիտամինը ստանում ենք այնպիսի սննդամթերքներով, ինչպիսիք են՝ միս, թռչնամիս, ծովամթերքներ, կաթ, պանիր և ձու։

Վիտամին B12-ը կենսական նշանակություն ունի արյան կարմիր բջիջների (էրիթրոցիտներ) արտադրության, բջիջների և հյուսվածքների վերականգնման (ռեգեներացիա), ինչպես նաև նյարդային համակարգի նորմալ գործունեության համար։

Ինչո՞ւ է այս թեստը նշանակվում

Ձեր բժիշկը կարող է վիտամին B12-ի թեստ առաջարկել հետևյալ դեպքերում՝

սակավարյունության (անեմիայի) առկայության և տեսակի գնահատում
մինչև հղիությունն առողջության ընդհանուր ստուգում
նյարդային գործունեության գնահատում
սնուցման վիճակի ստուգում (հատկապես, եթե հումակեր եք)
հոգեկան վիճակի կամ վարքագծերի փոփոխության պատճառի ախտորոշում։

Ինչպե՞ս նախապատրաստվել այս թեստին

Լաբորատորիա պետք է այցելել սննդի վերջին ընդունումից առնվազն 6-8 ժամ հետո։

Արդյունքների մեկնաբանումը

Նորմայից ցածր վիտամին B12-ի մակարդակը նշանակում է, որ ձեր օրգանիզմում կա այս վիտամինի անբավարարություն։ Սակայն այս պատասխանը վիտամին B12-ի դեֆիցիտի պատճառի և ծանրության աստիճանի վերաբերյալ որևէ տեղեկատվություն չի պարունակում։

Վիտամին B12-ի դեֆիցիտ կարող է գրանցվել տարբեր հիվանդությունների և վիճակների ժամանակ։ Այն կարող է պատճառվել նաև խիստ բուսակերությամբ կամ հումակերությամբ։ Ուստի, ցանկացած պարագայում ներկայացրեք ձեր արդյունքները բժշկին, որ միասին քննարկեք այն։